ສື່ມວນຊົນຂອງທາງການຊູດານ ລາຍງາຍວ່າ ນາຍົກລັດຖະມົນຕີ ແມ່ນປອດໄພແລ້ວ ຫຼັງຈາກ ມີການພະຍາຍາມລອບສັງຫານທ່ານ ໃນວັນຈັນມື້ນີ້.
ໂທລະພາບຂອງທາງການ ລາຍງານອີກວ່າ ທ່ານອັບດາລລາ ຮາມດົກ ພວມເດີນທາງໄປສຳນັກງານຂອງທ່ານ ເມື່ອຂະບວນລົດຂອງທ່ານ ຕົກເປັນເປົ້າໝາຍ ໃນການໂຈມຕີດ້ວຍລະເບີດ ທີ່ນະຄອນຫຼວງ ຄາຣ໌ທູມ.
ຍັງບໍ່ມີຜູ້ໃດອອກມາອ້າງເອົາຄວາມຮັບຜິດຊອບ ໃນການໂຈມຕີດັ່ງກ່າວ ໃນທັນທີທັນໃດເທື່ອ.
ທ່ານຮາມດົກ ໄດ້ກາຍມາເປັນນາຍົກລັດຖະມົນຕີຂອງຊູດານ ໃນເດືອນສິງຫາຜ່ານມາ ຫຼັງຈາກການປົດປະທານາທິບໍດີ ໂອມາຣ ອາລ-ບາເຊຍ ຈອມຜະເດັດການ ອອກຈາກຕຳແໜ່ງ ຜູ້ທີ່ໄດ້ຖືກໂຄ່ນລົ້ມ ເມື່ອຕົ້ນປີນີ້ ພາຍຫລັງທີ່ມີການປະທ້ວງຕໍ່ຕ້ານການປົກຄອງຂອງທ່ານ ໃນທົ່ວປະເທດ.
ທ່ານບາເຊຍ ໄດ້ຖືກຂັງ ຢູ່ໃນຄຸກ ໂຄເບີ (Kober) ທີ່ມີຊື່ສຽງເໜົ່າເໝັນຂອງປະເທດ ບ່ອນທີ່ພວກຜູ້ເຄາະຮ້າຍຫຼາຍໆຄົນຂອງທ່ານນັ້ນ ໄດ້ຖືກສົ່ງໄປຂັງ ແລະຖືກທໍລະມານ.
ລັດຖະບານຂອງຊູດານ ໄດ້ກ່າວເມື່ອເດືອນແລ້ວນີ້ ວ່າ ຕົນຈະມອບຕົວ ທ່ານບາເຊຍ ໃຫ້ແກ່ ສານອາຍາສາກົນ ຫຼື ICC ເພື່ອດຳເນີນຄະດີ. ທ່ານເປັນຜູ້ທີ່ສານ ICC ຕ້ອງການຕົວ ໃນຂໍ້ຫາກໍ່ອາຊະຍາກຳສົງຄາມ ອາຊະຍາກຳຕໍ່ມະນຸດຊາດ ແລະການຂ້າລ້າງເຊື້ອຊາດເຜົ່າພັນ.
ບັນດາໄອຍະການ ກ່າວວ່າ ພວກກຳລັງທີ່ສະໜັບສະໜຸນບາເຊຍ ໄດ້ພະຍາຍາມທີ່ຈະທຳລາຍພວກຊົນເຜົ່າອື່ນໆ ຢູ່ໃນຂົງເຂດດາຟົວຂອງຊູດານ ໃນຂະນະທີ່ພວກເຂົາເຈົ້າ ຕໍ່ສູ້ເພື່ອປາບປາມການກໍ່ກະບົດ ທີ່ໄດ້ເລີ້ມຂຶ້ນໃນປີ 2003.
