ປະເທດຊູດານແລະຊູດານໃຕ້ໄດ້ລົງນາມໃນຂໍ້ຕົກລົງສະບັບນຶ່ງວ່າດ້ວຍຄວາມປອດໄພເລື່ອງ
ຊາຍແດນ ແນໃສ່ເພື່ອຜ່ອນຄາຍຄວາມເຄັ່ງຕຶງ ທີ່ພວມເພີ່ມທະວີຂຶ້ນກ່ຽວກັບລາຍໄດ້ຈາກ
ການຂາຍນໍ້າມັນ.
ອະດີດປະທານາທິບໍດີອາຟຣິກາໃຕ້ ທ່ານ Thabo Mbeki ຊຶ່ງເປັນຫົວໜ້າເຈລະຈາກ່າວ
ວ່າ ຊູດານແລະຊູດານໃຕ້ ໄດ້ລົງນາມໃນຂໍ້ຕົກລົງບໍ່ຮຸກຮານກັນ ໃນລະຫວ່າງການປະຊຸມ
ກັນທີ່ນະຄອນຫຼວງອາດິສອາບາບາຂອງເອທິໂອເປຍ.
ລາຍລະອຽດຂອງຂໍ້ຕົກລົງສະບັບດັ່ງກ່າວຍັງບໍ່ທັນມີການເປີດເຜີຍໃຫ້ຊາບເທື່ອໃນເວລານີ້.
ເວລາປະເທດຊູດານໃຕ້ແຍກໂຕອອກເປັນເອກກະລາດໃນເດືອນກໍລະກົດປີກາຍນີ້ຊູດານໃຕ້
ໄດ້ເຂົ້າຄວບຄຸມບໍ່ນໍ້າມັນເກືອບທັງໝົດຂອງຂົງເຂດແຕ່ນໍ້າມັນຈາກຊູດານໃຕ້ຊຶ່ງເປັນປະເທດ
ທີ່ບໍ່ມີທາງອອກສູ່ທະເລນັ້ນຕ້ອງໄດ້ຖືກສົ່ງຜ່ານຊູດານໄປຫາທ່າກຳປັນແຫ່ງຕ່າງໆ.
ໃນເດືອນແລ້ວນີ້ ຊູດານໃຕ້ໄດ້ຢຸດເຊົາການຜະລິດນໍ້າມັນຫຼັງຈາກຊູດານເລີ່ມຢຶດເອົານໍ້າມັນ
ຈາກຊູດານໃຕ້ ເພື່ອເປັນຄ່າຊົດເຊີຍຕໍ່ອັນທີ່ຊູດານເອີ້ນວ່າ ຄ່າຂົນສົ່ງທີ່ຍັງບໍ່ທັນມີການຊຳ
ລະນັ້ນ.
ໃນຕອນເຊົ້າຂອງວັນສຸກວານນີ້ອົງການ Global Witness ຊຶ່ງເປັນກຸ່ມຊິ້ງຊອມກ່ຽວກັບ
ຊັບພະຍາກອນທຳມະຊາດ ໄດ້ສະແດງຄວາມວິຕົກກັງວົນ ກ່ຽວກັບຄວາມເຄັ່ງຕຶງທີ່ພວມ
ເພີ່ມທະວີຂຶ້ນລະຫວ່າງປະເທດທັງສອງ.