ລິ້ງ ສຳຫລັບເຂົ້າຫາ

ວັນພະຫັດ, ໓໐ ພຶດສະພາ ໒໐໒໔

ການສູ້ລົບ ຢູ່ໃນຊູດານ ສົ່ງຜົນເຮັດໃຫ້ອົງການສະຫະປະຊາຊາດ ຮ້ອງຂໍການຊ່ວຍເຫຼືອ 3 ຕື້ໂດລາ


ເດັກນ້ອຍຍິງຊາວຊູດານຄົນນຶ່ງ ທີ່ລົບໜີຈາກຄວາມຂັດແຍ້ງຢູ່ໃນພູມິພາກ Darfur ຂອງ ຊູດານ, ແລະເຄີຍພັດພາກຖິ່ນຖານຢູ່ໃນ ຊູດານ ມາກ່ອນໜ້ານັ້ນ ກໍາລັງຍ່າງຜ່ານສູນທີ່ຢູ່ອາໄສຊົ່ວຄາວ ເຊິ່ງຕັ້ງຢູ່ໃກ້ກັບຊາຍແດນລະຫວ່າງ ຊູດານ ແລະ Chad, ໃນລະຫວ່າງທີ່ກໍາລັງລີ້ໄພຢູ່ໃນຂົງເຂດໂບໂຣຕາ, Chad, ວັນທີ 13 ພຶດສະພາ 2023.
ເດັກນ້ອຍຍິງຊາວຊູດານຄົນນຶ່ງ ທີ່ລົບໜີຈາກຄວາມຂັດແຍ້ງຢູ່ໃນພູມິພາກ Darfur ຂອງ ຊູດານ, ແລະເຄີຍພັດພາກຖິ່ນຖານຢູ່ໃນ ຊູດານ ມາກ່ອນໜ້ານັ້ນ ກໍາລັງຍ່າງຜ່ານສູນທີ່ຢູ່ອາໄສຊົ່ວຄາວ ເຊິ່ງຕັ້ງຢູ່ໃກ້ກັບຊາຍແດນລະຫວ່າງ ຊູດານ ແລະ Chad, ໃນລະຫວ່າງທີ່ກໍາລັງລີ້ໄພຢູ່ໃນຂົງເຂດໂບໂຣຕາ, Chad, ວັນທີ 13 ພຶດສະພາ 2023.

ອົງການສະຫະປະຊາຊາດ ໄດ້ຮ້ອງຂໍການຊ່ວຍເຫຼືອເປັນເງິນຈໍານວນ 3 ຕື້ໂດລາ ໃນວັນພຸດວານນີ້ ເພື່ອເອົາໄປຊ່ວຍປະຊາຊົນ ທີ່ໄດ້ຮັບຜົນກະທົບຈາກບັນ​ຫາຂັດແຍ້ງ, ເຊິ່ງໄດ້ລະເບີດຂຶ້ນຢູ່ໃນ ຊູດານ ໃນເດືອນແລ້ວນີ້.

ອົງການສະຫະປະຊາຊາດເພື່ອມະນຸດສະທໍາ ເປີດເຜີຍວ່າ ພວກເຂົາເຈົ້າຈໍາເປັນຕ້ອງມີເງິນ 2 ຕື້ 600 ລ້ານໂດລາ ເພື່ອຊ່ວຍເຫຼືອປະຊາຊົນທີ່ຍັງອາໄສຢູ່ໃນ ຊູດານ, ໂດຍກ່າວວ່າ ປະຊາຊົນ 25 ລ້ານຄົນຢູ່ໃນປະເທດດັ່ງກ່າວນີ້ ຈໍາເປັນຕ້ອງໄດ້ຮັບການຊ່ວຍເຫຼືອທາງດ້ານມະນຸດສະທໍາ ແລະການຄຸ້ມ​ຄອງ.

ທ່ານຣາແມສ ຣາຈາຊິງຮາມ (Ramesh Rajasingham) ຫົວໜ້າຫ້ອງການ ເພື່ອວຽກງານການຮ່ວມມືທາງດ້ານມະນຸດສະທໍາຈາກອົງການສະຫະປະຊາຊາດ ໃນນະຄອນເຈເນວາ ແລະເປັນຜູ້ອໍານວຍການພະແນກການປະສານງານກ່າວວ່າ ການຕໍ່ສູ້ຢູ່ໃນຊູດານ ໄດ້ກາຍມາເປັນ “ຄວາມໂຫດຮ້າຍທີ່ສົ່ງຜົນກະທົບຮຸນແຮງຕໍ່ປະຊາຊົນຊາວຊູດານ.”

ທ່ານຣາຈາຊິງຮາມ ກ່າວວ່າ ​ບັນ​ຫາຂັດແຍ້ງດັ່ງກ່າວເຮັດໃຫ້ມີຜູ້ເສຍຊີວິດຢ່າງໜ້ອຍ 676 ຄົນ, ເຊິ່ງຈໍານວນໂຕເລກໂດຍລວມ ອາດຈະມີສູງກວ່ານີ້.

ທ່ານເມີວັດ ເຊລບາຢາ (Mervat Shelbaya) ຫົວໜ້າຫ້ອງການສະໜັບສະ ໜຸນສາກົນ ເຊິ່ງເປັນສາຂາຂອງອົງການສະຫະປະຊາຊາດເພື່ອການປະສານງານຮ່ວມມືທາງດ້ານມະນຸດສະທໍາ ໃນນະຄອນເຈເນວາ ກ່າວຖະແຫຼງການໃນວັນພຸດວານນີ້ວ່າ ການສູ້ລົບກັນຢູ່ໃນຊູດານ ໄດ້ບີບບັງຄັບໃຫ້ປະຊາຊົນຫຼາຍກວ່າ 950,000 ຄົນຕ້ອງໄດ້ໜີອອກຈາກເຮືອນຊານຂອງພວກເຂົາເຈົ້າ ແລະບີບບັງຄັບໃຫ້ 220,000 ຄົນຕ້ອງໄດ້​ຫລົບໜີເຂົ້າໄປໃນປະເທດເພື່ອນບ້ານ.

ທ່ານເຊລບາຢາ ກ່າວວ່າ “ຖ້າພວກເຮົາເພີ້ມການຕອບສະໜອງຂອງພວກເຮົາຂຶ້ນ ແລະໃຫ້ການຊ່ວຍເຫຼືອຕໍ່ຜູ້ທີ່ມີຄວາມຕ້ອງການເຫຼົ່ານັ້ນໄດ້, ພວກເຮົາ ແລະປະຊາຊົນຊາວຊູດານຄົນອື່ນໆ ຈໍາເປັນຕ້ອງມີການສະໜັບສະໜຸນທີ່ເອື້ອ ເຟື້ອເພື່ອແຜ່ຈາກປະຊາຄົມນານາຊາດ.”

ກອງທັບຊູດານ ເຊິ່ງນໍາໂດຍນາຍພົນ ອັບເດລ ຟາທາ ອາລ-ເບີຮານ (Abdel Fattah al-Burhan) ​ພວມທຳ​ການຕໍ່ສູ້ກັບກອງກໍາລັງ​ເຄື່ອນ​ທີ່​ຢ່າງວ່ອງ​ໄວ ທີ່ນໍາ​ໂດຍ​ນາຍພົນໂມຮໍາເມັດ ຮາມດານ ດາກາໂລ (Mohammed Hamdan Dagalo).

ອ່ານຂ່າວນີ້ເປັນພາສາອັງກິດ

XS
SM
MD
LG