ອົງການຂ່າວທາງການຂອງຈີນລາຍງານວ່າ ພວກຄົນງານຈີນ 29 ຄົນ ທີ່ຖືກພວກກະບົດລັກພາໂຕໄປ ຢູ່ພາກໃຕ້ຂອງປະເທດຊູແດນ ໃນວັນເສົາຜ່ານມານັ້ນ ຍັງຄົງຖືກຈັບໄວ້ຢູ່ ໃນຂະນະທີ່ທາງສື່ແຫ່ງລັດຊູແດນ ກ່າວວ່າ ພວກທະຫານໄດ້ປ່ອຍໂຕພວກຄົນງານຈີນ 14 ຄົນແລ້ວ.
ລາຍງານທີ່ຂັດກັນທີ່ອອກມາໃນວັນຈັນມື້ນີ້ ບໍ່ໄດ້ເວົ້າຢ່າງຈະແຈ້ງເຖິງຈໍານວນທັງໝົດ ຫລືວ່າສະຖານະພາບ ຂອງພວກຄົນງານທີ່ຖືກຈັບໄປນັ້ນ.
ອົງການຂ່າວຊິນຫົວຂອງຈີນເວົ້າວ່າ ທະຫານຊູແດນໄດ້ຍົກຍ້າຍຄົນງານຈີນ 17 ໄປຍັງທີ່ປອດໄພ ແຕ່ວ່າ 29 ຄົນຍັງຖືກພວກກະບົດຈັບໄວ້ຢູ່.
ໂຄສົກຂອງກຸ່ມກະບົດຂະບວນການປົດປ່ອຍປະຊາຊົນຊູແດນເໜືອກ່າວວ່າ ພວກຕົນໄດ້ຈັບພະນັກງານຈີນທັງໝົດ 29 ຄົນໄປ ໃນວັນເສົາຜ່ານມານີ້ ລຸນຫລັງການສູ້ລົບກັບພວກທະຫານຊູແດນໃນລັດກໍໂດຟານໃຕ້ ແລະໄດ້ກັກຂັງເຂົາເຈົ້າໄວ້ເພື່ອຄວາມປອດໄພຂອງພວກເຂົາເຈົ້າເອງ.
ລັດກໍໂດຟານໃຕ້ມີຊາຍແດນຕິດກັບປະເທດໃໝ່ ຊູແດນໃຕ້ ທີ່ແຍກອອກຈາກຊູແດນ ເມື່ອເດືອນກໍລະກົດປີກາຍນີ້.
