ທີ່ເກົາຫຼີໃຕ້ ພວກນັກຮຽນທີ່ລອດຊີວິດມາໄດ້ ຈາກເຮືອ
ຂ້າມຟາກ Sewol ທີ່ຫລົ້ມນັ້ນ ສືບຕໍ່ໃຫ້ການ ຕໍ່ຕ້ານພວກ
ລູກເຮືອຈຳນວນ 15 ຄົນ ຜູ້ທີ່ໄດ້ໜີອອກຈາກເຮືອໄປ
ໃນຂະນະທີ່ມັນກຳລັງຈົມລົງນ້ຳ.
ໃນມື້ທີສອງຂອງການໃຫ້ປາກຄຳຕໍ່ສານ ໃນການດຳເນີນ
ຄະດີຢູ່ເມືອງ Ansan ໃນວັນອັງຄານມື້ນີ້ ນັກຮຽນໄວລຸ້ນ
ເຫລົ່ານັ້ນ ໄດ້ກ່າວເຖິງພຶດຕິກຳອັນກ້າຫານ ຂອງເພື່ອນ
ນັກຮຽນດ້ວຍກັນ ທີ່ພາກັນເອົາເສື້ອຊູຊີບອອກມາຢາຍ
ໃນຂະນະທີ່ເຮືອກຳລັງຈົມນ້ຳ.
ບາງຄົນກໍເລົ່າວ່າ ເຂົາເຈົ້າໄດ້ຮັບການຊ່ວຍຊີວິດມາແບບໃດ ໂດຍ ເພື່ອນຜູ້ໂດຍສານ
ນຳກັນ ທີ່ໄດ້ຢ່ອນຜ້າກັ້ງແລະທໍ່ສີດນ້ຳດັບໄຟ ລົງມາດຶງເຂົາເຈົ້າຂຶ້ນໄປ ໃນຂະນະທີ່
ເຮືອງ່ຽງລົງເລື້ອຍໆນັ້ນ.
ຄາດວ່ານັກຮຽນທັງໝົດ 75 ຄົນທີ່ລອດຊີວິດມາໄດ້ ຈະໄປໃຫ້ການຕໍ່ສານ ໃນການ
ດຳເນີນຄະດີພວກລູກເຮືອ ທີ່ປະເຊີນກັບຂໍ້ຫາຫລາຍກະໂທງ ຈາກຕັ້ງແຕ່ຂໍ້ຫາຄາດ
ຕະກຳ ໄປຈົນຮອດການລະເລີຍຕໍ່ໜ້າທີ່ ຍ້ອນໄດ້ສະລະເຮືອໄປກ່ອນຜູ້ໂດຍສານ.
ໃນວັນຈັນວານນີ້ ນັກຮຽນກຸ່ມນຶ່ງໄດ້ບັນລະຍາຍເຖິງເຫດການຕ່າງໆທີ່ເຕັມໄປດ້ວຍ
ຄວາມສັບສົນອົນລະມ່ານ ແລ້ວກ່າວວ່າ ພວກລູກເຮືອໄດ້ ສັ່ງພວກເຂົາເຈົ້າໃຫ້ຢູ່ໃນ
ຫ້ອງຂອງເຂົາເຈົ້າ ຊ້ຳແລ້ວຊ້ຳອີກ ເຖິງແມ່ນວ່າລະດັບນ້ຳທະເລທີ່ໄຫລເຂົ້າມາໃນ
ເຮືອສູງຂຶ້ນເລື້ອຍໆກໍ່ຕາມ.
ເຮືອຂ້າມຟາກ Sewol ໄດ້ປິ້ນຂວ້ຳ ແລ້ວຈົມລົງ ເມື່ອວັນທີ 16 ເມສາທີ່ຜ່ານມາ ເຮັດ
ໃຫ້ປະມານ 300 ຄົນເສຍຊີວິດ. ສ່ວນຫຼາຍແລ້ວ ແມ່ນພວກນັກຮຽນມັດທະຍົມ ຈາກ
ນະຄອນ Incheon ທີ່ກຳລັງພາກັນໄປທັດສະນະສຶກສາ ຢູ່ສະຖານຕາກອາກາດອັນ
ເປັນທີ່ນິຍົມຫຼາຍ ໃນ ເກາະ Jeju. ໂສກນາດຕະກຳນີ້ ເປັນເຫດການທີ່ເຮັດໃຫ້ມີຄົນ
ເສຍຊີວິດຫຼາຍທີ່ສຸດຂອງເກົາຫຼີໃຕ້ ໃນຮອບຫລາຍທົດສະວັດ.
