ແຜ່ນດິນໄຫວຂະໜາດໃຫຍ່ໄດ້ປະທະເນປານອີກຄັ້ງໜຶ່ງ ໃນຕອນ
ບ່າຍວັນອັງຄານມື້ນີ້ ຕາມເວລາໃນທ້ອງຖິ່ນ ໂດຍໄດ້ເຮັດປະຊາ
ຊົນຢ່າງໜ້ອຍ 35 ຄົນເສຍຊີວິດ ໃນປະເທດທີ່ຍັງພວມດີ້ນຮົນ
ເພື່ອຮັບມືກັບ ໄພແຜ່ນດິນໄຫວຮ້າຍແຮງ ທີ່ໄດ້ເກີດຂຶ້ນບໍ່ຮອດ
3 ອາທິດ ຜ່ານມາດ້ວຍຊ້ຳ.
ສູນປະຕິບັດງານສຸກເສີນແຫ່ງຊາດຂອງເນປານ ກ່າວວ່າ
ປະຊາຊົນ 335 ຄົນໄດ້ຮັບ ບາດເຈັບ.
ອົງການສຳຫຼວດທໍລະນີຂອງສະຫະລັດ ກ່າວວ່າ ແຜ່ນດິນໄຫວ
ແຮງ 7.3 ຣິກເຕີ ໃນມື້ນີ້ ມີໃຈກາງຢູ່ຫ່າງຈາກນະຄອນຫຼວງ ກັດມັນດູ ໄປທາງທິດຕາເວັນອອກປະມານ 80 ຫຼັກກິໂລແມັດ.
ພາຍໃນໜຶ່ງຊົ່ວໂມງ ກໍໄດ້ມີແຜ່ນດິນໄຫວຕິດຕາມມາອີກ 6 ຄັ້ງ ຊື່ງຄັ້ງຮ້າຍແຮງທີ່ສຸດ ແມ່ນມີຄວາມແຮງ 6.3 ຣິກເຕີ.
ທ່ານນາງ Rose Foley ຈາກອົງການ UNICEF ທີ່ໄດ້ຢູ່ໃນນະຄອນຫຼວງກັດມັນດູ ເວລາເກີດແຜ່ນດິນໄຫວນັ້ນ ກ່າວວ່າ ພວກພະນັກງານຂອງອົງການໄດ້ພາກັນກະໂດດເຂົ້າໄປ
ຫລົບໄພຢູ່ກ້ອງໂຕະ ໃນຂະນະທີ່ອາຄານສັ່ນໄປສັ່ນມາ ແລະຕໍ່ມາ ໄດ້ພາກັນອອກໄປຢູ່ຂ້າງນອກ.
ທ່ານນາງ Rose Foley ກ່າວວ່າ “ການນັ່ງຢູ່ຂ້າງນອກໃນທີ່ກາງແຈ້ງ ກໍຮູ້ສຶກຄືກັນກັບ ກຳລັງນັ່ງຢູ່ເຮືອໃນທະເລທີ່ປັ່ນປ່ວນ ໃນຂະນະທີ່ແຜ່ນດິນສັ່ນສະເທືອນຕື່ມອີກນັ້ນ.”
ທ່ານນາງກ່າວຕື່ມວ່າ ສະຫະປະຊາຊາດມີຄວາມເປັນຫ່ວງກ່ຽວກັບຜົນກະທົບຕໍ່ພວກເດັກນ້ອຍ ທີ່ຕ້ອງການຄວາມຊ່ອຍເຫຼືອຢູ່ແລ້ວ ຫຼັງຈາກເກີດແຜ່ນດິນໄຫວໃນວັນທີ 25 ເມສາແລ້ວນີ້.
ຈຸດໃຈກາງຂອງແຜ່ນດິນໄຫວໃນວັນອັງຄານມື້ນີ້ ແມ່ນຢູ່ໄກປະມານ 100 ຫຼັກກິໂລແມັດຈາກຈຸດໃຈກາງຂອງແຜ່ນດິນໄຫວທີ່ເກີດຂຶ້ນໃນວັນທີ 25 ເມສາ ທີ່ໄດ້ສັງຫານຜູ້ຄົນໄປຫຼາຍກວ່າ 8 ພັນຄົນ ແລະເຮັດໃຫ້ປະຊາຊົນຫຼາຍໝື່ນຄົນ ບໍ່ມີບ່ອນຢູ່ອາໄສ.
ລັດຖະບານ ແລະພວກອົງການຊ່ອຍເຫຼືອບັນເທົາທຸກຕ່າງໆ ໄດ້ດຳເນີນການຢ່າງຂຸ້ນຂ້ຽວ ເພື່ອນຳເຂົ້າປາອາຫານ ນ້ຳດື່ມນ້ຳໃຊ້ ແລະບ່ອນພັກພາອາໄສຊົ່ວຄາວ ໄປແຈກຢາຍໃຫ້ປະຊາຊົນ ໃນການດຳເນີນງານທີ່ຫຍຸ້ງຍາກໃນຫຼາຍມື້ທຳອິດນັ້ນ ຍ້ອນແຜ່ນດິນໄຫວທີ່ຕິດຕາມມາຕື່ມອີກ ຫຼື aftershocks ແລະຍ້ອນດິນຟ້າອາກາດບໍ່ດີ ແລະການທ້າທາຍໃນ ການເຂົ້າໄປໃຫ້ເຖິງຂົງເຂດທີ່ຖືກກະທົບ ໃນປະເທດທີ່ຕັ້ງຢູ່ເທິງພູເຂົາຫິມະໄລ ແຫ່ງນີ້.
ຫຼາຍສິບຄົນ ເສຍຊີວິດ ໃນແຜ່ນດິນໄຫວ ມື້ນີ້ ທີ່ເນປານ
