ຣັດເຊຍ ກ່າວວ່າຕົນໄດ້ເພີ່ມການໂຈມຕີທາງອາກາດຕໍ່ພວກຫົວຮຸນແຮງ ລັດອິສລາມ ໃນ ຊີເຣຍ, ເພື່ອສະໜັບສະໜູນທະຫານ
ຊີເຣຍ ທີ່ໄດ້ຍຶດເອົາບ້ານສອງແຫ່ງຢູ່ທາງພາກເໜືອຂອງເມືອງ Hama ຕັ້ງແຕ່ຕອນແລງວັນສຸກທີ່ຜ່ານມາ.
ໂຄສົກກະຊວງປ້ອງກັນປະເທດ ຣັດເຊຍ ທ່ານ Igor Konashenkov ກ່າວຕໍ່ບັນດານັກຂ່າວ ຣັດເຊຍ ໃນວັນເສົາວານນີ້, ໄດ້ເຊື່ອມຕໍ່ຈຳນວນຕົວເລກການໂຈມຕີທີ່ເພີ່ມຂຶ້ນໃສ່ “ຈຳ ນວນເປົ້າໝາຍຢູ່ເທິງພື້ນດິນທີ່ເພີ່ມຂຶ້ນຢ່າງຫຼວງຫຼາຍ” ທີ່ຖືກຈັບໄດ້ຜ່ານການອອກສຳຫຼວດທາງອາກາດ ແລະ ດາວທຽມ.
ໃນນະຄອນຫຼວງ ວໍຊິງຕັນ, ເຈົ້າໜ້າທີ່ປ້ອງກັນປະເທດລະດັບສູງ ໄດ້ຈັດການປະຊຸມຄວາມ ປອດໄພທາງວິດີໂອ ກັບຄູ່ຮ່ວມຕຳແໜ່ງຈາກ ຣັດເຊຍ ຂອງພວກເຂົາເຈົ້າ, ໃນຖານະ ການຜັກດັນເພື່ອສົ່ງເສີມປະຕິບັດການຕໍ່ສູ້ທີ່ປອດໄພໃນ ນ່ານຟ້າ ຊີເຣຍ ທີ່ແອອັດຂຶ້ນ. ໂຄສົກ ທຳນຽບ ຫ້າແຈ ທ່ານ Peter Cook ໄດ້ອະທິບາຍການເຈລະຈາວ່າເປັນດັ່ງກັບ “ມືອາຊີບ” ແລະ ໄດ້ກ່າວວ່າພວກເຂົາເຈົ້າໄດ້ເພັ່ງເລັງໃສ່ວິທີດຳເນີນການທາງອາກາດ ທີ່ປອດໄພຢ່າງສະເພາະເຈາະຈົງ.
ກະຊວງປ້ອງກັນປະເທດຂອງ ຣັດເຊຍ ໄດ້ໃຊ້ພາສາທີ່ຄ້າຍຄືກັນເພື່ອບັນລະຍາຍການເຈລະຈາດັ່ງກ່າວ.
ເຈົ້າໜ້າທີ່ ສະຫະລັດ ໄດ້ວິຈານ ຣັດເຊຍ ຢ່າງແຮງ, ຫຼັງຈາກ ມົສກູ ໄດ້ໃຫ້ສັນຍານເຕືອນ ທີ່ບໍ່ຊັດເຈນໃນວັນທີ່ 30 ກັນຍາທີ່ຜ່ານມາ ພຽງໜຶ່ງຊົ່ວໂມງກ່ອນພວກເຂົາເຈົ້າດຳເນີນການໂຈມຕີທາງອາກາດຄັ້ງ ທຳອິດໃນ ຊີເຣຍ ເພື່ອສະໜັບສະໜູນປະທານາທິບໍດີ Bashar al-Assad ທີ່ຖືກໂຈມຕີ.
ມົສກູ ອ້າງວ່າ ການໂຈມຕີສ່ວນໃຫຍ່ແມ່ນແນໃສ່ພວກຫົວຮຸນແຮງ ລັດອິສລາມ, ແຕ່ພວກກຸ່ມກະບົດກ່າວວ່າ ການໂຈມຕີສ່ວນໃຫຍ່ແມ່ນຖືກພື້ນທີ່ໆບໍ່ມີພວກຫົວຮຸນແຮງອາໄສຢູ່.
