ໃນປີ 2010 ທີ່ຜ່ານມານີ້ ຂ່າວທີ່ໄດ້ຮັບຄະແນນສຽງ
ຫລາຍກວ່າໝູ່ ແມ່ນຂ່າວການຮົ່ວໄຫລຂອງນໍ້າມັນ
ຄັ້ງໃຫຍ່ທີ່ອ່າວເມັກຊິໂກ. ຖານເຈາະບໍ່ນໍ້າມັນຢູ່ກາງ
ທະເລຂອງບໍລິສັດ BP ຂອງອັງກິດໄດ້ລະເບີດຂຶ້ນ
ໃນເດືອນເມສາ ເຮັດໃຫ້ຄົນງານ 11 ຄົນເສຍຊີວິດ.
ມີນໍ້າມັນເກືອບຮອດ 5 ລ້ານຖັງ ໄຫລອອກມາໃສ່
ອ່າວທະເລນັ້ນ ຈົນຮອດກາງເດືອນກໍລະກົດ ຈຶ່ງສາ
ມາດຢຸດການຮົ່ວໄຫລຂອງນໍ້າມັນໄວ້ໄດ້. ບໍລິສັດ BP
ໄດ້ຕົກລົງທີ່ຈະຈັດງົບປະມານໄວ້ໃຫ້ 20 ພັນລ້ານ
ໂດລາ ເພື່ອໃຊ້ຈ່າຍໃນການຖືກຟ້ອງຮ້ອງ ແລະຈ່າຍ
ຄ່າເສຍຫາຍໃຫ້ແກ່ຜູ້ຄົນທີ່ເຮັດວຽກໃນຂະແໜງການປະມົງ ແລະ ອຸດສະຫະກໍາທ່ອງທ່ຽວ.
ອົງການຂ່າວ AP ເວົ້າວ່າ ຂ່າວສໍາຄັນອັນທີສອງ
ແມ່ນການປະຕິຮູບລະບົບການປິ່ນປົວສຸຂະພາບ ຢູ່
ໃນສະຫະລັດ. ທ່ານປະທານາທິບໍດີໂອບາມາ ໄດ້ຮັບໄຊຊະນະທາງການເມືອງອັນໃຫຍ່
ຫລວງ ເວລາລັດຖະສະພາສະຫະລັດ ຮັບຜ່ານແຜນການປະຕິຮູບການປະກັນໄພສຸຂະ
ພາບຂອງທ່ານ ຊຶ່ງໃນຫລາຍໆສິ່ງຫລາຍຢ່າງນັ້ນ ແຜນປະຕິຮູບທີ່ວ່ານີ້ຈະໄດ້ໃຫ້ການ
ປະກັນໄພສຸຂະພາບ ແກ່ຄົນອາເມຣິກັນ 32 ລ້ານຄົນທີ່ບໍ່ມີປະກັນໄພຢູ່ໃນປັດຈຸບັນນີ້. ແຕ່ວ່າພວກສະມາຊິກພັກຣີພັບບລິກັນໃນ ລັດຖະສະພາຫລາຍຄົນ ຄັດຄ້ານຕໍ່ກົດໝາຍ
ສະບັບນີ້ ແລະຢາກຍົກເລີກຫລາຍໆພາກສ່ວນຂອງແຜນປະຕິຮູບນັ້ນ.
ການເລືອກຕັ້ງລັດຖະສະພາກາງສະໄໝການ
ດໍາລົງຕໍາແໜ່ງຂອງປະທານາທິບໍດີໃນເດືອນ
ພະຈິກຜ່ານມານັ້ນ ກໍເປັນຂ່າວໃຫຍ່ອີກເລື້ອງ
ນຶ່ງ. ພັກຣີພັບບລິກັນຝ່າຍຄ້ານໄດ້ຮັບໄຊຊະ
ນະຢ່າງຫລວງຫລາຍ ແລະກາຍເປັນພັກທີ່
ກໍາສຽງສ່ວນຫລາຍໃນສະພາຕໍ່າ. ແຕ່ວ່າ
ພັກເດໂມແກຣດກໍສາມາດຮັກສາຕໍາແໜ່ງ
ພັກສຽງສ່ວນຫລາຍ ຢູ່ໃນສະພາສູງໄວ້ໄດ້.
ເລື້ອງເສດຖະກິດຂອງອາເມຣິກາກໍເປັນຂ່າວໃຫຍ່ອີກເລື້ອງນຶ່ງ. ພວກນັກເສດຖະສາດໄດ້
ລາຍງານໃນປີ 2010 ວ່າສະພາບເສດຖະກິດຕົກຕໍ່າຢ່າງຮ້າຍແຮງທີ່ສຸດນັບແຕ່ຊຸມປີ 1930 ເປັນຕົ້ນມານັ້ນໄດ້ສິ້ນສຸດລົງແລ້ວ. ມາຮອດທ້າຍປີພວກຊາວອາເມຣິກັນພາກັນເລີ້ມຈັບຈ່າຍ
ໃຊ້ສອຍເງີນຫລາຍຂຶ້ນ. ແຕ່ວ່າອັດຕາການຫວ່າງງານກໍຍັງຢູ່ໃນລະດັບສູງກວ່າ 9% ຢູ່.
ໃນເດືອນມັງກອນຂອງປີ 2010 ນັ້ນ
ແຜ່ນດິນໄຫວຄັ້ງຮ້າຍແຮງໄດ້ປະທະ
ປະເທດເຮຕີ ເຮັດໃຫ້ຄົນເສຍຊີວິດຢ່າງ
ໜ້ອຍ 230 ພັນຄົນ ແລະອີກຫລາຍ
ລ້ານຄົນ ບໍ່ມີບ້ານຢູ່ອາໃສ. ໂຣຄາ ພະຍາດແລະບັນຫາອື່ນໆໄດ້ເຮັດໃຫ້
ການດຳເນີນຄວາມພະຍາຍາມສ້າງ
ແປງປະເທດຄືນໃໝ່ນັ້ນ ເປັນໄປຢ່າງ
ຊັກຊ້າ.
ຂ່າວສຳຄັນອີກເລື້ອງນຶ່ງກໍຄື ເລື້ອງຂະ
ບວນການ ພັກນໍ້າຊາ ຫລື Tea Party
ຢູ່ໃນສະຫະລັດ. ພັກ Tea Party ສະ
ໜັບສະໜູນລັດຖະບານທີ່ມີອໍານາດຈໍາກັດ,
ມີການໃຊ້ຈ່າຍຂອງລັດຖະບານກາງໜ້ອຍກວ່າເກົ່າ ແລະຫລຸດພາສີໃຫ້ຕໍ່າລົງກວ່າເກົ່າ.
ຂະບວນການທີ່ວ່ານີ້ ໄດ້ມີອິດທິພົນ ຕໍ່ການເລືອກຕັ້ງຜູ້ແທນໃນລັດຖະສະພາ ໃນເດືອນ
ພະຈິກນັ້ນ ຢ່າງຫລວງຫລາຍ.
ຂ່າວໃຫຍ່ອີກເລື້ອງນຶ່ງ ກໍແມ່ນການຊ່ວຍຊີວິດພວກຄົນງານບໍ່ຖ່ານຫີນ 33 ຄົນຢູ່ປະເທດ
ຊີເລ ໃນອາເມຣິກາໃຕ້. ບໍ່ຖ່ານຫີນທີ່ພັງລົງສ່ວນນຶ່ງ ໃນວັນທີ 5 ເດືອນສິງຫາຜ່ານມານັ້ນ ໄດ້ຂັງພວກເຂົາເຈົ້າໄວ້ໃຕ້ດິນເລິກລົງໄປຫລາຍກວ່າເຄິ່ງກິໂລແມັດ. ພວກເຂົາເຈົ້າຖືກຂັງຢູ່
ໃນນັ້ນເປັນເວລາ 69 ມື້. ຫລາຍໆລ້ານຄົນໃນທົ່ວໂລກໄດ້ຄອຍຕິດຕາມຂ່າວ ແລະເບິ່ງ
ການຖ່າຍທອດທາງໂທລະພາບເວລາພວກຄົນງານຂຸດບໍ່ເຫລົ່ານັ້ນ ຖືກນໍາຂຶ້ນມາຈາກບໍ່
ເທື່ອລະຄົນສູ່ໜ້າດິນຢ່າງປອດໄພ.
ໃນປີ 2010 ນັ້ນ ກໍາລັງທະຫານຂອງສະຫະລັດກໍໄດ້ສິ້ນສຸດການປະຕິບັດງານສູ້ຮົບໃນ
ອີຣັກລົງຢ່າງເປັນທາງການ. ສົງຄາມອີຣັກ ໄດ້ເລີ້ມຂຶ້ນເມື່ອ 7 ປີ ຄືໃນປີ 2003.
ຂ່າວຍິ່ງໃຫຍ່ອີກເລື້ອງນຶ່ງແມ່ນກິດຈະກຳ
ຫລືການເຄື່ອນໄຫວຂອງເວັບໄຊ້ທ໌
WikiLeaks. ທໍາອິດ ເວັບໄຊທ໌ນີ້ໄດ້ເປີດ
ເຜີຍເອກະສານລັບດ້ານການທະຫານ
ຂອງສະຫະລັດ ຫລາຍໆພັນສະບັບທີ່
ເວົ້າກ່ຽວກັບການເຮັດສົງຄາມຢູ່ອີຣັກແລະ
ອັຟການິສຖານ. ຕໍ່ມາ Wikileaks ກໍໄດ້
ພິມເຜີຍແຜ່ໂທລະເລກລັບທາງການທູດ
ຂອງສະຫະລັດ ເປັນຫລາຍໆພັນສະບັບ
ອີກ. ຊຶ່ງມີລວມທັງຄຳເຫັນຂອງພວກນັກ
ການທູດສະຫະລັດກ່ຽວກັບຊີວິດຂອງ
ພວກຜູ້ນໍາຕ່າງໆໃນໂລກ ແລະຄໍາຕໍາໜິ
ພວກລັດຖະບານຂອງຕ່າງປະເທດ.
ຂ່າວທີ່ສໍາຄັນອັນດັບທີ 10 ຢູ່ໃນບັນຊີ 10 ຂ່າວເດ່ນແຫ່ງປີ 2010 ຂອງ AP ກໍໄດ້ແກ່
ເລື້ອງສົງຄາມໃນອັຟການິສຖານ. ປະທານາທິບໍດີໂອບາມາ ໄດ້ອອກຄໍາສັ່ງໃຫ້ເພີ້ມກໍາລັງ
ທະຫານສະຫະລັດ ທີ່ສູ້ລົບໃນສົງຄາມທີ່ດໍາເນີນມາເປັນເວລາໄດ້ເກືອບ 10 ປີແລ້ວນັ້ນ.
ແຕ່ວ່າ ທະຫານອາເມຣິກັນຈະເລີ້ມຖອນອອກຈາກປະເທດດັ່ງກ່າວໃນເດືອນກໍລະກົດ ປີນີ້.
ແລະຊາວອັຟການິສຖານ ຈະເລີ້ມຄວບຄຸມຄວາມປອດໄພຂອງຕົນເອງ ໃນທ້າຍປີ 2014.
