ຫົວໜ້າຂອງອົງການເນໂຕ ກ່າວວ່າ ບັນດາສະມາຊິກຂອງກຸ່ມພັນທະມິດທັງຫຼາຍ ແມ່ນມີ
ຄວາມປຸ້ມລຸມສາມັກຄີກັນ ໃນການເອົາທ່າທີຕ້ານຣັດເຊຍ ໃນວິທີທີ່ບໍ່ເຄີຍເຫັນມາກ່ອນ
ເປັນເວລາຫຼາຍປີ.
ເລຂາທິການໃຫຍ່ Jens Stoltenberg ໄດ້ກ່າວໃນການໃຫ້ສຳພາດກັບ VOA ພະແນກ
ພາສາເຊີເບຍ ໃນວັນຈັນວານນີ້ວ່າ ອົງການເນໂຕ ແມ່ນມີຄວາມໝາຍໝັ້ນທີ່ຈະເອົາບາດ
ເພີ້ມຂຶ້ນໃນການປ້ອງກັນ ໃນຂະນະດຽວກັນນັ້ນ ກໍຈະທຳການເຈລະຈາກັບຣັດເຊຍ.
“ການເອົາບາດກ້າວທັງສອງດ້ານນີ້ ໝາຍຄວາມວ່າ ພວກເຮົາຕອ້ງມີຄວາມເຂັ້ມແຂງ
ພວກເຮົາຕ້ອງເຮັດໃຫ້ໄດ້ໃນການຢັບຢັ້ງແລະປ້ອງກັນຕົວ, ແລະນັ້ນແມ່ນສາເຫດ
ຂອງການທີ່ພວກເຮົາປະຕິບັດການ ຢ່າງຍິ່ງໃຫຍ່ ເຂົ້າໃສ່ການປ້ອງກັນຮ່ວມໃນ
ປະຈຸບັນ ເພື່ອເປັນການ ຕອບໂຕ້ ຕໍ່ອັນທີ່ຣັດເຊຍ ໄດ້ກະທຳໃນຢູເຄຣນ,”
ທ່ານ Stoltenberg ໄດ້ກ່າວໄວ້ ແລະທ່ານຍັງກ່າວຕື່ມອີກວ່າ “ມັນບໍ່ແມ່ນການ
ສົນທະນາທີ່ງ່າຍ ແຕ່ວ່າມັນເປັນການສົນທະນາທີ່ສຳຄັນ.”
ໃນການເອົາມາດຕະການດັ່ງກ່າວ ແມ່ນແບບສະບັບໃໝ່ຂອງສົງຄາມເຢັນ ທີ່ອົງການ
ເນໂຕນຳໃຊ້ “ສອງເສັ້ນທາງ” ຊຶ່ງເປັນການຕັດສິນໃຈທີ່ພົວພັນກັບການສົ່ງລູກສອນ
ໄຟນິວເຄລຍ ໄລຍະໄກຂອງສະຫະລັດ ຕໍ່ຂໍ້ສະເໜີເພື່ອເຈລະຈາກັນໃໝ່ກັບມົສກູ
ກ່ຽວກັບກຳລັງຂອງໂຊຫວຽດ ໃນຢູໂຣບຕາເວັນອອກ.
ໃນຮອບຫຼາຍເດືອນຜ່ານມານີ້ ການປ້ອງກັນຂອງອົງການເນໂຕໄດ້ເພັ່ງເລັງໃສ່ການໄປ
ເຖິງຂອງປະທານາທິບໍດີດໍໂນລ ທຣຳ ແລະການຮຽກຮ້ອງຂອງທ່ານ ໃຫ້ບັນດາປະເທດ
ພັນທະມິດທັງຫຼາຍ ເພີ່ມງົບປະມານໃນດ້ານການປ້ອງກັນປະເທດຂອງເຂົາເຈົ້າ.