ຮຸ້ນຕ່າງໆ ແລະ ເງິນສະກຸນໂດລາ ໄດ້ຮັບຜົນກະທົບຢ່າງໜັກ ຢູ່ທີ່ຕະຫຼາດຮຸ້ນ ໂຕກຽວໃນວັນພະຫັດມື້ນີ້ ຫຼັງຈາກທະນາຄານກາງຂອງຍີ່ປຸ່ນ ຮັກສານະໂຍບາຍ ດ້ານການເງິນ ໃຫ້ຢູ່ໃນສະພາບເດີມ.
“ເສດຖະກິດຂອງຍີ່ປຸ່ນ ເບິ່ງຄືວ່າ ມີແນວໂນ້ມ ທີ່ຈະຂະຫຍາຍຕົວໃນລະດັບ ປານກາງ” ນັ້ນຄືຄຳເວົ້າຂອງຜູ້ວ່າການທະນາຄານກາງຍີ່ປຸ່ນ ທ່ານ Harukiko Kuroda ໄດ້ກ່າວຕໍ່ບັນດານັກຂ່າວ ຫຼັງຈາກຕະ ຫຼາດຮຸ້ນປິດລົງ.
ເຖິງແມ່ນວ່າ ທາງທະນາຄານແຫ່ງຍີ່ປຸ່ນ ຫຼື BOJ ບໍ່ໄດ້ມີການເຄື່ອນ ໄຫວໃດໆ ຊຶ່ງເປັນການຄາດຄິດກັນຢູ່ແລ້ວ ແຕ່ມັນກໍຍັງເຮັດໃຫ້ເງິນຕາ ຂອງຍີ່ປຸ່ນມີຄ່າ ສູງຂຶ້ນ. ເງິນເຢນ ເມື່ອບໍ່ນານມານີ້ ແມ່ນປາກົດວ່າເປັນບ່ອນລົງທຶນທີ່ປອດໄພ ສຳລັບພວກນັກລົງທຶນ ທ່າມກາງຄວາມກັງວົນ ກ່ຽວກັບ ເສດຖະກິດຂອງ ສະຫະລັດ ແລະໂອກາດທີ່ມີຫຼາຍຂຶ້ນກ່ຽວກັບ ການຖອນໂຕຂອງອັງກິດ ອອກຈາກສະຫະພາບຢູໂຣບ ໃນການລົງປະ ຊາມະຕິ ໃນວັນພະຫັດໜ້າ.
ທ່ານ Tobias Harris ຮອງປະທານ ອົງການສືບລັບ Teneo ກ່າວວ່າ “ແທ້ຈິງແລ້ວ ການຮັກສານະໂຍບາຍການເງິນ ຂອງທະນາຄານແຫ່ງຍີ່ປຸ່ນ ແມ່ນແຕ່ໃນກໍລະນີທີ່ໂລກ ໄດ້ເກີດຄວາມຕື່ນຕົກໃຈ ຖ້າອັງກິດ ຫາກລົງ ຄະແນນສຽງຖອນໂຕອອກ ອັນນັ້ນກໍຍັງມີຄວາມສຳຄັນ.”
ເງິນເຢນ ໄດ້ມີລາຄາສູງຂຶ້ນ ຫຼາຍກວ່າ 1 ເປີເຊັນ ໃນການແລກປ່ຽນ ກັບເງິນ ໂດລາຂອງສະຫະລັດ ໃນການຊື້ຂາຍຢູ່ຕະຫລາດເອເຊຍ ໃນວັນພະຫັດມື້ນີ້. ໃນຕອນບ່າຍໆນັ້ນ ການແລກປ່ຽນຢູ່ເອເຊຍ ເງິນໂດລາ ໄດ້ຫລຸດລົງສູ່ລະດັບ 103 ເຢນ ອັນເປັນລະດັບສຸດທີ່ບໍ່ເຄີຍເຫັນມາກ່ອນ ນັບຕັ້ງແຕ່ ປີ 2014 ເປັນຕົ້ນມາ.
