ຕະຫລາດຫຸ້ນໃນຂົງເຂດເອເຊຍໄດ້ຕົກຮວບລົງຢ່າງໄວໃນວັນສຸກນີ້ ລຸນຫລັງຈາກການ
ຕົກລົງຢ່າງໃຫຍ່ໃນສະຫະລັດ ແລະຢຸໂຣບ ທີ່ມີການຖິ້ມໂທດໃສ່ຄວາມຢ້ານກົວວ່າ
ຈະເກີດສະພາວະເສດຖະກິດໂລກຕົກຕໍ່າລົງໄປອີກຂອງພວກນັກລົງທຶນນັ້ນ.
ຫຸ້ນ Nikkei ຂອງໂຕກຽວ ປິດຕະຫລາດດ້ວຍລາຄາທີ່ຕໍ່າລົງ 3.72 ເປີເຊັນ ຊຶ່ງເປັນລະ
ດັບຕໍ່າທີ່ສຸດໃນຮອບຫ້າເດືອນ ແລະ ຕະຫລາດຫຸ້ນ Hang Seng ຂອງຮ່ອງກົງ
ກໍຕົກຮວບລົງຫລາຍກວ່າ 4 ເປີເຊັນ.
ພວກຕະຫລາດໃຫຍ່ໆໃນພາກພື້ນຢຸໂຣບ ໄດ້ຕົກຕໍ່າລົງຫລາຍເຖິງສອງເປີເຊັນໃນຕອນ
ເຊົ້າຂອງວັນສຸກມື້ນີ້ ຫລັງຈາກທີ່ຕົກຕໍ່າລົງເກືອບສີ່ເປີເຊັນ ໃນວັນພະຫັດວານນີ້.
ສ່ວນລາຄາຄໍາ ຊຶ່ງເປັນທາງອອກສໍາລັບພວກນັກລົງທຶນບາງຄົນ ໃນການເສດຖະກິດ
ທີ່ບໍ່ແນ່ນອນນັ້ນ ໄດ້ຖີບຕົວສູງຂື້ນ 19.80 ໂດລາ ເປັນ 1,662.32 ໂດລາ ຕໍ່ນຶ່ງອອນຊ໌
ຫລືປະມານສອງບາດເຄີ່ງ.
ສ່ວນທີ່ສະຫະລັດ ຫຸ້ນອຸດສາຫະກໍາດາວໂຈນສ໌ ຕົກຮວບລົງ 513 ຈຸດ ຫລື 4.3
ເປີເຊັນໃນວັນພະຫັດວານນີ້ ຊຶ່ງເປັນການຕົກຕໍ່າລົງຄັ້ງໃຫຍ່ທີ່ສຸດນັບຕັ້ງແຕ່ປີ 2008
ເປັນຕົ້ນມາ ພວກດັດຊະນີຫຸ້ນໃຫຍ່ໆອື່ນໆ ເຊັ່ນ NASDAQ ແລະ S&P 500 ກໍຕົກ
ຕໍ່າລົງຢ່າງຫລວງຫລາຍເຊັ່ນກັນ.
ພວກນັກວິເຄາະດ້ານການເງິນກ່າວວ່າ ນັກລົງທຶນທັງຫລາຍພາກັນເປັນຫ່ວງວ່າເສດຖະ
ກິດຂອງສະຫະລັດຈະກ້າວເຂົ້າສູ່ສະພາວະຖອຍຫລັງອີກຄັ້ງນຶ່ງ. ລັດຖະບານສະຫະລັດ
ມີກໍານົດຈະລາຍງານກ່ຽວກັບໂຕເລກອັດຕາວ່າງງານໃນຕອນເຊົ້າວັນສຸກມື້ນີ້ ທີ່ຄາດ
ກັນວ່າຈະຢືນຢັນເຖິງການຟື້ນໂຕຄືນຢ່າງອ່ອນແອຂອງຕະຫລາດວຽກງານນັ້ນ.
