ສື່ມວນຊົນຂອງລັດຂອງອີຣ່ານ ກ່າວວ່າ ປະທານາທິບໍດີອີຣ່ານ ທ່ານ ອີບຣາຮິມ ເຣຊີ (Ebrahim Raisi), ລັດຖະມົນຕີການຕ່າງປະເທດ ທ່ານ ໂຮສເຊນ ອາມີຣັຫບດອລລາຮຽນ (Hossein Amirabdollahian) ແລະເຈົ້າໜ້າທີ່ຄົນອື່ນໆ ໄດ້ຖືກພົບວ່າ ເສຍຊີວິດແລ້ວ ໃນວັນຈັນມື້ນີ້ ຢູ່ທີ່ສະຖານທີ່ເກີດເຫດ ເຮືອບິນເຮລິຄອບເຕີຕົກ ໃນພາກຕາເວັນຕົກສຽງເໜືອ ຂອງອີຣ່ານ.
ໜ່ວຍຄົ້ນຫາໄດ້ພົບເຫັນຊາກຫັກພັງໃນວັນຈັນມື້ນີ້, ນຶ່ງມື້ຫລັງຈາກເຮລິຄອບເຕີໄດ້ຕົກໃນສະພາບອາກາດທີ່ບໍ່ດີຢູ່ໃກ້ກັບເມືອງ ວາຊາກັນ (Varzaqan) ໃນແຂວງ ອາເຈີບາຍຈານ (Azerbaijan) ຕາເວັນອອກຂອງອີຣ່ານ.
ສື່ມວນຊົນຂອງລັດກ່າວວ່າ ບັນດາຜູ້ໂດຍສານໄດ້ເດີນທາງກັບຄືນໄປອິຣ່ານ ຈາກງານນຶ່ງທີ່ຢູ່ກົງກັນຂ້າມກັບຊາຍແດນທີ່ຕິດກັບ ອາເຈີບາຍຈານ (Azerbaijan) ບ່ອນທີ່ພວກເຂົາໄດ້ພົບປະກັບປະທານາທິບໍດີຂອງອາເຈີບາຍຈານ ທ່ານ ອີລຮານ ອາລີເຢບ (Ilham Aliyev) ເພື່ອເປີດໂຄງການສ້າງເຂື່ອນ.
ທ່ານ ອາລີເຢບ (Aliyev) ໄດ້ເຜີຍແຜ່ຖະແຫຼງການສະບັນນຶ່ງໃນສື່ສັງຄົມ X ໂດຍກ່າວວ່າທ່ານ "ມີຄວາມບໍ່ສະບານໃຈຢ່າງເລິກເຊິ່ງ" ຈາກເຫດການເຮລິຄອບເຕີ ຂອງ ທ່ານ ເຣຊີ (Raisi) ຕົກ ແລະ ການອະທິຖານ ແລະການຊ່ວຍເຫຼືອໃນຖານະ "ປະເທດເພື່ອນບ້ານ ແລະພີ່ນ້ອງ."
ຂ່າວກ່ຽວກັບການເສຍຊີວິດຂອງທ່ານ ເຣຊີ (Raisi) ໄດ້ພາໃຫ້ເກີດມີຂໍ້ຄວາມສະແດງຄວາມເສົ້າສະລົດໃຈ, ລວມທັງຈາກນາຍົກລັດຖະມົນຕີ ປາກິສຖານ ທ່ານ ເຊບາສ ຊາຣີຟ (Shehbaz Sharif) ທີ່ໄດ້ປະກາດວັນໄວ້ອາໄລໃນວັນຈັນມື້ນີ້.
ຟໍຣັມສະແດງຄວາມຄິດເຫັນ