ພວກເກັບເກນໄດ້ມາທີ່ເມືອງຂອງນາງ Angela ໃນປະເທດຊີເຣຍໂດຍສະເໜີທີ່ຈະຈ້າງນາງ ໄປເຮັດວຽກຢູ່ຮ້ານອາຫານ ໃນ Lebanon. ນາງໄດ້ຕົກລົງຮັບເອົາເພື່ອໜີຈາກປະເທດທີ່ເກີດສົງຄາມຂອງນາງ ແຕ່ໄດ້ພົບເຫັນຕົນເອງວ່າໄດ້ຕົກເປັນເຫຍື່ອການຄ້າປະເວນີ ພ້ອມດ້ວຍແມ່ຍິງຄົນອຶ່ນໆ ອີກຫລາຍສິບຄົນ. ເຂົາເຈົ້າໄດ້ຖືກກັກຂັງໄວ້ຢູ່ທີ່ໂຮງແຮມ ແລະບາງຄັ້ງຖືກບັງຄັບໃຫ້ພົບກັບລູກຄ້າ 20 ຄົນໃນແຕ່ລະມື້. ພວກຄ້າມະນຸດຍັງໄດ້ຂົ່ມ ຂືນ ແລະທໍລະມານພວກແມ່ຍິງເຫລົ່ານີ້ໃຫ້ຍອມປະຕິບັດຕາມຄຳສັ່ງ. ນາງ Angela ໃນທີ່ສຸດກໍສາມາດລັກໜີໄດ້ໂດຍການຊ່ວຍເຫລືອຂອງຕຳຫລວດ.
ກໍລະນີຂອງນາງ Angela ແມ່ນນຶ່ງໃນຫລາຍໆເລື້ອງທີ່ໄດ້ກ່າວເຖິງຢູ່ໃນລາຍງານການຄ້າມະນຸດປະຈຳປີ 2016 ຂອງກະຊວງຕ່າງປະເທດສະຫະລັດ ທີ່ໄດ້ກ່າວຢ້ຳເຖິງບັນຫາ ຂ້າທາດສະໄໝໃໝ່ ທະຫານເດັກນ້ອຍ ການບັງຄັບໃຫ້ແຕ່ງງານແລະການຮັບໃຊ້ຢູ່ຕາມບ້ານເຮືອນ. ນອກນັ້ນລາຍງານຍັງໄດ້ເປີດເຜິຍ ເຖິງຄວາມພະຍາຍາມຂອງລັດຖະບານໃນ 188 ປະເທດ ແລະດິນແດນຕ່າງໆຢູ່ທົ່ວໂລກ ຮວມທັງສະຫະລັດ ເພື່ອຕໍ່ສູ້ກັບການຄ້າມະນຸດ.
ຢູ່ໃນລາຍງານປີນີ້ ແປດປະເທດໄດ້ຖືກເພີ້ມຊື່ເຂົ້າໃສ່ໃນບັນຊີດຳຂອງບັນດາປະເທດທີ່ໄດ້ຮັບພິຈາລະນາວ່າ ເປັນປະເທດທີ່ລ່ວງລະເມີດຮ້າຍແຮງທີ່ສຸດກ່ຽວກັບ ການຄ້າມະນຸດ ໃນອັນທີ່ຮ້ອງວ່າ ບັນຊີລາຍຊື່ຂອງກຸ່ມປະເທດທີ 3. ບັນດາປະເທດໃໝ່ ທີ່ເພີ້ມເຂົ້າໃສ່ບັນ ຊີລາຍຊື່ ອະດີດລັດຕ່າງໆຂອງສະຫະພາບໂຊຫວຽດ ປະກອບມີ Uzbekistan ແລະ Turmenistan ພ້ອມດ້ວຍປະເທດມຽນມາທີ່ຫາກໍມີປະຊາທິປະໄຕໃໝ່ໆ Haiti, Djibouti, Papua New Guinea, Sudan ແລະ Suriname. ປະເທດທີ່ຖືກຈັດຢູ່ໃນກຸ່ມທີສາມ ສາມາດໄດ້ຮັບການລົງໂທດເພື່ອຈຳກັດການໄດ້ຮັບການຊ່ວຍເຫລືອຈາກອາເມຣິກາແລະນາໆ ຊາດ.
ກະຊວງຕ່າງປະເທດສະຫະລັດ ກ່າວວ່າ ເຖິງແມ່ນວ່າໄດ້ມີການດຳເນີນຄວາມ ພະຍາ ຍາມແບບຍືນຍົງເພື່ອຕໍ່ຕ້ານການຄ້າມະນຸດກໍຈິງ ແຕ່ຍັງມີຫລາຍລ້ານຄົນໄດ້ຖືກບັງຄັບທາງດ້ານ “ຈິດໃຈ ຮ່າງກາຍ ແລະດ້ານການເງິນ” ແລະຖືກສວຍ ໃຊ້ໂດຍພວກຄ້າມະນຸດ ໃນການ “ຫລອກລໍ້ຍ້ອນຄວາມອ່ອນໄຫວຂອງເຂົາເຈົ້າເພື່ອຜົນກຳໄລ."
“ຂ້າທາດສະໄໝໃໝ່ທີ່ຍັງມີຢູ່ໃນທຸກວັນນີ້ ໄດ້ເຮັດຫໃຫ້ 20 ລ້ານກວ່າຄົນຕົກເປັນຜູ້ເຄາະຮ້າຍ ຢູ່ໃນທຸກເວລາ ທັງໝົດ 20 ລ້ານຄົນນີ້ແມ່ນມະນຸດ ເຂົາເຈົ້າມີຊື່ ເຂົາເຈົ້າມີ ຫລືໄດ້ມີຄອບຄົວ” ນັ້ນຄືຄຳເວົ້າຂອງລັດຖະມົນຕີຕ່າງປະເທດສະຫະລັດ ທ່ານ John Kerry ຮ້ອງການຄ້າມະນຸດວ່າ ເປັນອຸດສາຫະກຳທີ່ມີ ລາຍໄດ້ຫລາຍພັນລ້ານໂດລາແຕ່ລະປີ.