ລິ້ງ ສຳຫລັບເຂົ້າຫາ

ຊາວສີລັງກາ ໄປປ່ອນບັດເລືອກຕັ້ງ ປະທານາທິບໍດີ ທີ່ມີ ຄະແນນສຽງ ໃກ້ຄຽງກັນ


ຊາວ​ສີ​ລັງກາ ​ໄດ້​ພາກັນ​ໄປລົງ​ຄະ​ແນນ​ ໃນການເລືອກ​ຕັ້ງ ທີ່ມີ
ຄະແນນສຽງໃກ້ຄຽງກັນ ຢ່າງບໍ່ຄາດຝັນ ລະຫວ່າງປະທານາທິ
ບໍດີ Mahinda Rajapaksa ​ກັບ​ອະດີດ ​ພັນທະມິດເກົ່າຂອງ
ທ່ານຄົນນຶ່ງ.

ທ່ານ Rajapaksa ​ເຂົ້າກຳ​ຕຳ​ແໜ່​ງນັບ​ຕັ້ງ​ແຕ່ປີ 2005 ​ເປັນ​
ຕົ້ນ​ມາ ​ແລະຮຽກຮ້ອງ​ໃຫ້​ມີ​ການ​ເລືອກ​ຕັ້ງກ່ອນກຳນົດ 2 ປີ
ໂດຍທີ່ພວກນັກ​ວິ​ເຄາະທຳນາຍ​ວ່າ​ຈະໄດ້​ຮັບໄຊຊະນະ​ຢ່າງ
​ງ່າຍດາຍ.

​ເຖິງແມ່ນ​ຄວາມ​ນິຍົມ​ຊົມ​ຊອບ​ຂອງ​ທ່ານ​ໄດ້ຫລຸດນ້ອຍຖອຍ
ລົງແດ່ແລ້ວກໍຕາມ ​ແຕ່ທ່ານ Rajapaksa ​ຍັງ​ໝັ້ນ​ໃຈ​ວ່າ ພັກ​ຝ່າຍ​ຄ້ານ ​ທີ່ມີການແຕກ ແຍກກັນມາເປັນເວລາດົນນານແລ້ວນັ້ນ ຈະບໍ່​ສາມາດຊອກຫາຜູ້​ທ້າ​ທາຍທີ່ໜ້າເຊື່ອຖື
ໄດ້ ມາສະໝັກແຂ່ງກັບທ່ານ.

ທ່ານ​ໄດ້ບໍ່ຄາດຫວັງ ກ່ຽວກັບການລົງສະໝັກຂອງທ່ານ Mithripala Sirisena ຜູ້​ຊຶ່ງ​ລາ​ອອກ​ຈາກ​ຕຳ​ແໜ່​ງລັດຖະມົນຕີກະຊວງສາທາລະນະ​ສຸກ ​ແລະຂ້າມ​ໄປເຂົ້າກັບ​ອີກ​ຝ່າຍ​ນຶ່ງ ​ເພື່ອເປັນຜູ້ສະໝັກຂອງພັກຝ່າຍຄ້ານໃນ​ເດືອນ​ພະຈິກ​ຜ່ານມາ ຊຶ່ງ​ພາໃຫ້​ເກີດມີ ການ
ໂຕນພັກເປັນຈຳນວນຫຼວງຫຼາຍຈາກຝ່າຍລັດຖະບານ.

ໃນການ​ປ່ອນ​ບັດ​ຢູ່ເຂດເລືອກຕັ້ງຂອງທ່ານ​ໃນ​ວັນ​ພະຫັດ​ມື້​ນີ້ ທ່ານ Rajapaksa ​ໄດ້​ກ່າວ​ວ່າ ທ່ານ​ໝັ້ນ​ໃຈ​ວ່າ ທ່ານ​ຈະ​ໄດ້​ຮັບ​ໂອກາດໃຫ້​ເປັນ​ຜູ້ນຳ​ຂອງ​ປະ​ເທດຕື່ມອີກເປັນ​ຄັ້ງ​ທີ 3.

ລັດຖະມົນຕີ​ການ​ຕ່າງປະ​ເທດ​ຂອງ​ສະຫະລັດ ທ່ານ John Kerry ​ໄດ້​ໂອ້​ລົມທາງ​ໂທລະ
ສັບ​ກັບ ທ່ານ Rajapaksa ​ໃນ​ວັນ​ພຸດ​ວານ​ນີ້ ກ່ອນ​ໜ້າ​ຂອງ​ການ​ເລືອກ​ຕັ້ງ. ​ໂຄ​ສົກ​ກະຊວງ
ການ​ຕ່າງປະ​ເທດ​ສະຫະລັດ ກ່າວ​ວ່າ ທ່ານ Kerry ຮຽກຮ້ອງ​ໃຫ້​ລັດຖະບານ​ສີລັງກາ “ຄ້ຳປະ
ກັນ​ວ່າການ​ເລືອກ​ຕັ້ງ​ໃນວັນ​ທີ 8 ມັງກອນ ມື້​ນີ້ ຈະ​ດຳ​ເນີນ​ໄປ ​ໂດຍ​ປາສະ​ຈາກ​ຄວາມ​ຮຸນ ແຮງ ການ​ຂົ່ມຂູ່​ໃດໆ ​ແລະ​ວ່າ ການ​ນັບ​ຄະ​ແນນ​ສຽງ​ນັ້ນ ຈະດຳເນີນໄປ ແບບໜ້າເຊື່ອຖື​ແລະ​ໂປ່​ງ​ໃສ.”

XS
SM
MD
LG