ໂຄສົກປະຈຳລັດຖະສະພາຂອງສີລັງກາເວົ້າວ່າ ທ່ານບໍ່ສາມາດທີ່ຈະຍອມຮັບເອົາ
ທ່ານ ມະຫິນດາ ຣາຊາປາກຊາ (Mahinda Rajapaksa) ອະດີດປະນາທາທິບໍດີ
ແລະຊາຍທີ່ເຂັ້ມແຂງນັ້ນ ເປັນນາຍົກລັດຖະມົນຕີຄົນໃໝ່ໄດ້.
ທ່ານ ຄາຣູ ຈາຣາສູຣິຢາ (Karu Jayasuriya) ເວົ້າວ່າ ທ່ານ ຣາຊາປາກຊາຕ້ອງ
ໄດ້ພິສູດໃຫ້ເຫັນວ່າທ່ານສາມາດບັນຊາສະມາຊິກສ່ວນໃຫຍ່ໃນລັດຖະສະພາໄດ້.
ທ່ານ ຈາຣາສູຣິຢາໄດ້ກ່າວໃນຖະແຫລງການສະບັບນຶ່ງວ່າ "ສະມາຊິກສ່ວນໃຫຍ່
ແມ່ນມີຄວາມເຫັນວ່າ ການປ່ຽນແປງຢູ່ໃນລັດຖະສະພາ ແມ່ນບໍ່ຖືກຕ້ອງຕາມລັດຖະ
ທຳມະນູນ ແລະຂັດກັບການປະຕິບັດທີ່ເປັນປະເພນີມາ.” ທ່ານກ່າວເພີ້ມອີກວ່າ
"ສະນັ້ນ ຂ້າພະເຈົ້າຈຶ່ງຂໍຮ້ອງໃນນາມສະມາຊິກສ່ວນໃຫຍ່ໃນລັດຖະສະພາໃຫ້ຮັບ
ຮອງເອົາທ່າທີ ທີ່ມີຂຶ້ນ ກ່ອນໜ້າການປ່ຽນແປງເຫລົ່ານີ້. ຂ້າພະເຈົ້າຈະຮັບຮູ້ຕາມ
ສະພາບທີ່ເປັນຢູ່ນີ້ ກ່ອນຈະມີການປ່ຽນແປງຕ່າງໆ ຈົນກວ່າວ່າ ກຸ່ມໃໝ່ຈະສະ
ແດງໃຫ້ເຫັນວ່າ ເປັນກຸ່ມທີ່ມີສຽງສ່ວນຫລາຍ.”
ປະທານາທິບໍດີ ໄມທຣິບປາລາ ສີຣິເສນາ ໄດ້ປົດຕຳແໜ່ງນາຍົກລັດຖະມົນຕີ ຣານີລ
ວິກເຄຣເມສິງງີ (Ranil Wickremesinghe) ແລະຄະນະລັດຖະບານຂອງເພິ່ນ
ອອກຈາກຕຳແໜ່ງໃນເດືອນແລ້ວນີ້ ແລະໄດ້ແຕ່ງຕັ້ງທ່ານ ຣາຊາປາກຊາ ເປັນ
ນາຍົກລັດຖະມົນຕີແທນ. ມື້ຕໍ່ມາ ທ່ານສີຣິເສນາ ໄດ້ຍຸຕິການເຄື່ອນໄຫວຂອງລັດ
ຖະສະພາໄວ້ ຈົນຮອດວັນທີ 16 ພະຈິກ. ໃນວັນພະຫັດຜ່ານມານີ້ ໂດຍໄດ້ຮັບ
ການກົດດັນຈາກສາກົນໃຫ້ແກ້ໄຂວິກິດການທາງການເມືອງ ທ່ານ ສີຣິເສນາ ໄດ້
ເລື່ອນວັນທີຮຽກປະຊຸມ ຂຶ້ນມາໃສ່ວັນທີ 5 ພະຈິກມື້ນີ້. ພວກນັກວິເຄາະເຫດການ
ເຊື່ອວ່າ ທ່ານຍຸຕິການເຄື່ອນໄຫວຂອງລັດຖະສະພາໄວ້ ກໍເພື່ອເຮັດໃຫ້ທ່ານ ຣາ
ຊາປາກຊາມີເວລາຮວບຮວມເອົາການສະໜັບ ສຸໜຸນ ເພື່ອໃຫ້ເອົາຕົວລອດ ໃນ
ການລົງຄະແນນສຽງບໍ່ໄວ້ວາງໃຈນັ້ນ.
ທ່ານ ສີຣິເສນາ ເວົ້າວ່າ ເພິ່ນປົດທ່ານ ວິກເຄຣເມສິງງີ (Ranil Wickremesinghe)
ອອກຈາກຕຳແໜ່ງ ພາຍຫລັງທີ່ມີນັກສືບຄົນນຶ່ງ ບອກຕຳຫລວດວ່າ ລັດຖະມົນຕີ
ໃນຄະນະລັດຖະບານຄົນນຶ່ງ ມີສ່ວນໃນການວາງແຜນລອບສັງຫານເພິ່ນ. ທ່ານ
ບໍ່ໄດ້ເປີດເຜີຍໃຫ້ຮູ້ຊື່ຂອງ ລັດຖະມົນຕີ ຄົນນັ້ນ ແຕ່ຢ່າງໃດ.
