ແມ່ຍິງລາວໄດ້ມີບົດບາດສຳຄັນ ໃນການເກັບກູ້ລະເບີດ ທີ່
ບໍ່ທັນແຕກຢູ່ໃນປະເທດຂອງເຂົາເຈົ້າ. ເມື່ອໄວໆມານີ້ ພາຍໃຕ້
ໂຄງການຊ່ວຍເຫລືອໃນການເກັບກູ້ລະເບີດບໍ່ທັນແຕກ ແກ່
ສປປ ລາວ ນັ້ນ ທາງສະຖານທູດສະຫະລັດໄດ້ຈັດການເຝິກ
ອົບຮົມເປັນເວລາ 5 ວັນ ໃຫ້ແກ່ແມ່ຍິງລາວທ້ອງຖິ່ນ 200 ຄົນ
ໃນແຂວງຊຽງຂວາງ ທີ່ໄດ້ສິ້ນສຸດລົງ ດ້ວຍການຫລິ້ນມ່ວນ
ເຕະບານກັນ. ໂຄງການດັ່ງກ່າວ ໃຫ້ຊື່ວ່າ ຈິດໃຈແຫ່ງກິລາເຕະບານ ຫຼື Spirit of Soccer ແລະມີ ພົນເຮືອຕີ Samuel Perez Jr. ຮອງລັດຖະມົນຕີຊ່ອຍວ່າການກະຊວງການຕ່າງປະເທດສະຫະລັດ ທີ່ໄປຢ້ຽມຢາມລາວ ໃຫ້ກຽດເຂົ້າຮ່ວມ ພ້ອມກັບພະນັກງານສະຖານທູດສະຫະລັດ ຈຳນວນນຶ່ງ. ໂຄງການ Spirit of Soccer ຂອງກະຊວງຕ່າງປະເທດສະຫະລັດ ມີແຕ່ສະເພາະຢູ່ ໃນລາວ ກຳປູເຈຍ ຈໍແດນ ແລະອີຣັກ ເທົ່ານັ້ນ.
ການເຝິກອົບຮົມໄລຍະສັ້ນດັ່ງກ່າວ ໄດ້ກວມເອົາເລື້ອງຄວາມສ່ຽງ ການປະພຶດ ແລະຂໍ້
ມູນປະຫວັດສາດ ກ່ຽວກັບລະເບີດຝັງດິນ ແລະລະເບີດບໍ່ທັນແຕກ ຫຼື UXO ແລະປະກອບ ດ້ວຍການຮຽນຮູ້ພາກໂຕຈິງໃນສະໜາມ ແລະການໄປທັດສະນະສະຖານທີ່ເກັບກູ້ລະເບີດ ແລະໜ່ວຍງານພາກລັດທີ່ຮັບຜິດຊອບກ່ຽວກັບການເກັບກູ້ແລະການສຳຫຼວດ. ເນື່ອງຈາກ
ກິລາເຕະບານ ເປັນທີ່ນິຍົມຊົມຊອບໃນຂົງເຂດນີ້ຫຼາຍ ການເອົາຊື່ Spirit of Soccer
ມາເປັນຊື່ຂອງໂຄງການເຝິກອົບຮັມ ຈຶ່ງເປັນວິທີການນຶ່ງທີ່ມີພະລັງ ໃນການດຶງດູດພວກ
ເດັກນ້ອຍ ແລະ ເປັນສື່ເຜີຍແຜ່ຂໍ້ມູນທີ່ສຳຄັນ ກ່ຽວກັບຄວາມປອດໄພ.
ພົນເຮືອຕີ Perez ກ່າວວ່າ ແມ່ຍິງແມ່ນເຄິ່ງນຶ່ງຂອງຄວາມສາມາດພິເສດໃນໂລກ ສະນັ້ນ
ມັນຈຶ່ງບໍ່ພຽງແຕ່ມີຄວາມສຳຄັນ ແຕ່ຍັງມີຄວາມເໝາະສົມ ທີ່ພວກເຮົາສາມາດຊ່ວຍໃຫ້ແມ່
ຍິງ ສາມາດພັດທະນາວິທີການທີ່ສ້າງສັນ ໃນການໃຫ້ຄວາມຮູ້ແກ່ເດັກນ້ອຍ ກ່ຽວກັບໄພ
ອັນຕະລາຍ ແລະຄວາມສ່ຽງຂອງລະເບີດຝັງດິນ ກໍຄືລະເບີດທີ່ບໍໍ່ທັນແຕກ ແລະຍັງໃຫ້
ຄວາມມ່ວນຊື່ນແກ່ພວກເຂົານຳອີກ.
ນອກນັ້ນ ພົນເຮືອຕີ Perez ຍັງໄດ້ໄປເບິ່ງການເກັບກູ້ລະເບີດທີ່ບໍ່ທັນແຕກ ຊຶ່ງທ່ານເລົ່າວ່າ:
“ທີ່ຈິງແລ້ວພວກເຮົາໄດ້ໄປເບິ່ງທົ່ງແຫ່ງນຶ່ງ ທີ່ກວ້າງປະມານ 30 ຫາ 40 ເອເຄີ້
ທີ່ພວມມີການເກັບກູ້ລະເບີດ ທົ່ງແຫ່ງນີ້ແມ່ນໃຊ້ເປັນທົ່ງນາປູກເຂົ້າມາໄດ້ຫລາຍ
ປີແລ້ວ ແລະເທື່ອຫຼ້າສຸດທີ່ມີຜູ້ໄດ້ຮັບບາດເຈັບແມ່ນໃນປີ 1980 ໃນແຕ່ລະມື້
ພວກເຂົາເຈົ້າໄດ້ເກັບກູ້ລະເບີດ ທີ່ບໍ່ທັນແຕກປະມານ 5 ຫາ 7 ລູກ ຕົ້ນຕໍແລ້ວ
ແມ່ນລູກບອມບີ້ ທຸກໆມື້ 5 ຫາ 7 ລູກ ພວກເຂົາເຈົ້າໄດ້ລົງມືມາຫຼາຍອາທິດແລ້ວ
5 ຫາ 7 ລູກທີ່ເຂົາເຈົ້າໄດ້ເກັບກູ້ໃນແຕ່ລະມື້ ດັ່ງນັ້ນ ພວກເຮົາຈຶ່ງບໍ່ສາມາດບອກ
ໄດ້ ມັນຍັງຮ້າຍແຮງເຖິງຕາຍ ມັນຍັງເປັນອັນຕະລາຍ ເປົ້າໝາຍຂອງພວກເຮົາ
ກໍແມ່ນຊ່ອຍລັດຖະບານລາວ ເຮັດໃຫ້ປະເທດຂອງເຂົາເຈົ້າປອດຈາກຜົນ
ກະທົບນີ້.”
ພົນເຮືອຕີ Perez ໄປຢ້ຽມຢາມລາວ ຫລັງຈາກໄປຢ້ຽມຢາມປະເທດກຳປູເຈຍ ທີ່ມີຂຶ້ນ
ໃນລະຫວ່າງທ້າຍເດືອນມັງກອນ ຫາຕົ້ນເດືອນກຸມພາຜ່ານມານີ້.
ນັບແຕ່ປີ 1993 ເປັນຕົ້ນມາ ສະຫະລັດໄດ້ປະກອບສ່ວນເປັນເງິນຈຳນວນ 71 ລ້ານໂດລາ ເຂົ້າໃນວຽກເກັບກູ້ແລະທຳລາຍລະເບີດທີ່ບໍ່ທັນແຕກຫຼື UXO ການ ສຶກສາຄວາມສ່ຽງ ແລະ ການຊ່ອຍເຫຼືອ ຜູ້ເຄາະຮ້າຍຢູ່ ສປປ ລາວ. ສະຫະລັດ ເປັນຜູ້ໃຫ້ທຶນຫຼາຍທີ່ສຸດ ໃນຂະແໜງ ດັ່ງກ່າວ ຢູ່ ສປປ ລາວ. ໃນປີ 2014 ທີ່ ຜ່ານມານີ້ສະຫະລັດ ກໍໄດ້ປະກາດເພີ້ມທຶນໃນ
ການເກັບກູ້ ແລະທຳລາຍລະເບີດ ທີ່ບໍ່ທັນແຕກ ຈາກ 9 ລ້ານໂດລາ ໃນປີ 2012 ແລະ
2013 ຂຶ້ນເປັນ 12 ລ້ານ ໂດລາ ໃນປີ 2014.
