ລິ້ງ ສຳຫລັບເຂົ້າຫາ

ພວກນັກບິນ ສາຍການບິນ ສະເປນ ນັດຢຸດງານ (ເບິ່ງວີດີໂອ)

  • ສິງ ບູຣົມມະວົງ

ພວກເຮືອບິນຂອງສາຍການບິນ Iberia ຈອດຢູ່ເດີ່ນເຮືອບິນ Barajas ຂອງກຸງມາດຣິຕເນື່ອງຈາກການນັດຢຸດ ງານຂອງພວກນັກບິນ. ວັນທີ 10 ເມສາ 2012.

ສາຍ​ການບິນ Iberia ຂອງ​ສະ​ເປ​ນ ​ໄດ້​ຍົກ​ເລີກ​ຖ້ຽວ​ບິນ 150 ຖ້ຽວ​ໃນ​ວັນ​ຈັນວານ​ນີ້ ຂະ​ນະທີ່​ພວກ​ນັກ​ບິນ​ນັດ​ຢຸດ​ງານ​ທໍາ​ການ​ປະ​ທ້ວງ​ຕໍ່​ການ​ລິ​ເລີ້​ມສາຍ​ການບິນ​ໃໝ່ Iberia Express ​ໃນ​ລາຄາ​ຖືກ​ນັ້ນ.

ພວກ​ນັກ​ບິນ​ສາຍ​ການບິນ Iberia ກ່າວ​ວ່າ ພວກ​ເຂົາ​ເຈົ້າ​ວາງ​ແຜນທໍາ​ການ​ນັດ​ຢຸດ​ງານ 30 ຄັ້ງ ຄື​ໃນ​ທຸກໆ​ວັນ​ຈັນ​ແລະ​ວັນ​ສຸກ ​ນັບ​ແຕ່​ປັດຈຸບັນ​ໄປ​ຮອດ​ວັນ​ທີ 20 ກໍລະກົດ. ພວກ​ນັກ​ບິນ​ກ່າວ​ວ່າ ການ​ເລີ້ມສາຍ​ການບິນ​ໃໝ່ເປັນ​ໄພ​ຄຸກ​ຄາມ​ຕໍ່​ວຽກ​ການ​ ແລະ​ສະພາບ​ການ​ເຮັດ​ວຽກ​ເຮັດ​ການ​ຂອງ​ເຂົາ​ເຈົ້າ ​ແລະ​ຝ່າຝືນ​ກົດໝາຍ​ແຮງ​ງານ​ທີ່​ໄດ້​ຈັດ​ຕັ້ງ​ຂຶ້ນ​ເວລາ​ສາຍ​ການບິນ Iberia ຮວມ​ເຂົ້າກັນ​ກັບສາຍ​ການບິນ British Airways ນັ້ນ.

ສາຍ​ການບິນລາຄາ​ຖືກ Iberia Express ເລີ້ມ​ດໍາ​ເນີ​ນງານ​ໃນທ້າຍ​ເດືອນ​ແລ້ວ​ນີ້ ທີ່​ບິນໃນໄລຍະ​ສັ້ນ​ໄປ​ຍັງ​ຫົວ​ເມືອງ​ຕ່າງໆ​ຂອງສະ​ເປ​ນ ​ແລະ​ຈຸດໝາຍ​ປາຍທາງ​ບາງ​ແຫ່ງ​ໃນ​ຢູ​ໂຣບ ທີ່​ມີ​ວັດຖຸ​ປະສົງ​ເພື່ອຕໍ່​ຖ້ຽວ​ບິນ​ໃນ​ໄລຍະ​ຍາວ​ຂອງ​ສາຍ​ການບິນ Iberia ​ໄປ​ຍັງຈຸດໝາຍ​ປາຍທາງ​ອື່ນໆ.

ບໍລິສັດ​ທີ່​ເປັນເຈົ້າ​ຂອງ Iberia Express ​ກ່າວ​ວ່າ ຕົນ​ຈໍາ​ເປັນ​ຕ້ອງ​ຈັດຕັ້ງ​ສາຍ​ການບິນລາຄາ​ຖືກເພື່ອ​ເພີ່ມ​ກໍາ​ໄລ​ຂອງ​ຕົນ​ຂຶ້ນ.

XS
SM
MD
LG