ພວກນັກກິລາສູ້ງົວລະດັບຊັ້ນນໍາຂອງສະເປນ ໄດ້ເຕົ້າໂຮມກັນຢູ່ທີ່ ເມືອງ Barselona ສໍາລັບການຕໍ່ສູ້ກັບງົວເປັນມື້ສຸດທ້າຍ ກ່ອນທີ່ກິລາ ປະເພດເລືອດຕົກຢາງອອກທີ່ວ່ານີ້ ຈະຖືກສັ່ງຫ້າມໃນທົ່ວຂົງເຂດ Catalonia ທາງພາກຕາເວັນອອກສຽງເໜືອຂອງປະເທດ.
ນັກກິລາສູ້ງົວ ຫລື ມາທາດໍ ຊັ້ນນໍາທັງສາມຄົນ ຄື ນາຍ Juan Mora, ນາຍ Jose Tomas ແລະ ນາຍ Serafin Marin ຈະຕ້ອງສັງຫານ ງົວຄົນລະ 2 ໂຕ ໂດຍໃຊ້ດາບ ທີ່ສະໜາມກິລາ La Monumental ທີ່ມີອາຍຸຮ້ອຍປີ ໃນເມືອງ Barcelona ນັ້ນ.
ຂໍ້ສັ່ງຫ້າມກິລາປະເພດນີ້ ໄດ້ມີຜົນບັງຄັບໃຊ້ເມື່ອວັນທີ່ 1 ເດືອນມັງກອນເປັນຕົ້ນມາ ແຕ່ ກິລາການຕໍ່ສູ້ງົວໃນວັນອາທິດມື້ນີ້ ເປັນເກມສຸດທ້າຍຂອງ ລະດູກິລາຕໍ່ສູ້ງົວ ປີ 2011 ທີ່ ເມືອງຫລວງ Catalan.
ຝ່າຍນິຕິບັດຢັດແຫ່ງເຂດ Catalonia ໄດ້ອອກກົດໝາຍສັ່ງຫ້າມປະເພນີ ທີ່ປະຕິບັດກັນມາ ໄດ້ຫລາຍສັດຕະວັດນີ້ ເມື່ອປີຜ່ານມາ ແຕ່ພວກຊາວ Catalan ໄດ້ເຊັນຄໍາຮ້ອງຮຽນ ຕໍ່ຕ້ານກົດໝາຍຫ້າມດັ່ງກ່າວ.
ພວກສະໜັບສະໜຸນກິລາສູ້ງົວທັງຫລາຍຍັງພາກັນຫວັງວ່າພວກເຂົາເຈົ້າ ຈະສາມາດປ່ຽນ ແປງກົດສັ່ງຫ້າມ ກ່ອນມັນຈະເລິ່ມມີຜົນບັງຄັບໃຊ້ນັ້ນ.
ກິລາຕໍ່ສູ້ງົວ ກໍຍັງຈະເປັນກິລາທີ່ຖືກຕ້ອງຕາມກົດໝາຍໃນແຫ່ງອື່ນໆໃນປະເທດສະເປນ ຢູ່ຕໍ່ໄປ ຍົກເວັ້ນໃນໝູ່ເກາະ Canary ທີ່ໄດ້ຖືກສັ່ງຫ້າມ ມາຕັ້ງແຕ່ປີ 1991 ນັ້ນ.
