ຍານອາວະກາດໄປກັບ Atlantis ຂອງສະຫະລັດໄດ້ອອກຈາກສະຖານີອາວະກາດນາໆຊາດແລ້ວ ເລີ້ມທໍາການບິນ ໃນຊ່ວງສຸດທ້າຍຂອງຍານດັ່ງກ່າວ ແລະເສັດສິ້ນໂຄງການໃນການຍານອາວະກາດໄປກັບ ເປັນເວລາ 30 ປີຂອງສະຫະລັດ.
ຍານ Atlantis ພ້ອມດ້ວຍລູກເຮືອໃນຍານ 4 ຄົນໄດ້ອອກຈາກສະຖານີອາວະກາດນາໆຊາດຫລື ISS ໃນຕອນເຊົ້າວັນອັງຄານມື້ນີ້ ຢູເໜືອປະເທດນີວຊີແລນ ຫລັງຈາກປະຕິບັດງານມາໄດ້ 8 ມື້ເພື່ອນຳເອົາສະບຽງຂຶ້ນໄປຍັງສະຖານີອະວະກາດນາໆຊາດ ທີ່ຈະກຸ້ມເປັນເວລາ1 ປີແລະຂົນຂີ້ເຫຍື້ອແລະອຸບປະກອນທີ່ໃຊ້ແລ້ວໃນຍານກັບຄືນສູ່ພາກພື້ນດິນ. ຍານອາວະກາດດັ່ງກ່າວໄດ້ບິນອ້ອມສະຖານີອາວະກາດຮອບນຶ່ງ ກ່ອນຈະບິນອອກຈາກສະຖານີເປັນຄັ້ງສຸດທ້າຍນັ້ນ.
ທ່ານ Chris Ferguson ຜູ້ບັນຊາການຍານ ທ່ານ Doug Hurley ຜູ້ຂັບຍານແລະນາງ Sandy Magnus ແລະທ່ານ Rex Walheim ຜູ້ຊ່ຽວຊານພິເສດໃນການບິນ ໄດ້ກ່າວອໍາລາຕໍ່ພວກລູກເຮືອໃນສະຖານີອາວະກາດດ້ວຍອາລົມທີ່ຕື່ນເຕັ້ນ ແລະກອດກັນ ພອມກັບນໍ້າຕາຫລັ່ງໄຫລອອກມາກ່ອນຈະອັດປະຕູລະຫວ່າງສະຖານີກັບຍານອາວະກາດ 2 ລໍາເປັນຄັ້ງສຸດທ້າຍນັ້ນ.
ພວກລູກເຮືອໃນຍານອາວະກາດໄດ້ປະຫຸ່ນຈຳລອງຂອງຍານອາວະກາດໄປກັບອັນນຶ່ງແລະທຸງຊາດສະຫະລັດທີ່ປັກຢູ່ໃນຍານອາວະກາດ ໄປກັບ Columbia ທີ່ເລີ້ມປະຕິບັດງານຄັ້ງທໍາອິດໃນປີ 1981 ນັ້ນ.
ຫລັງຈາກອອກປະຕິບັດງານໃນຫ່ວງອາວະກາດມາເປັນເວລາ 13 ມື້ແລະຮັບໃຊ້ມາເປັນເວລາ 26 ປີ ຍານອາວະກາດໄປກັບ Atlantis ຈະເສັດສິ້ນການປະກອບພາລະກິດຄັ້ງທີ 33 ແລະຖ້ຽວບິນຄັ້ງສຸດທ້າຍ ກອນຈະລົງຈອດທີ່ສູນກາງອາວະກາດ Kennedy ທີ່ລັດ Florida ໃນເຊົ້າວັນພະຫັດ ສັບປະດານີ້.