ທ່ານ Mikhai Gorbachev ໄດ້ຖືກເລືອກເປັນຜູ້ນຳໂຊວຽດໃນວັນທີ 11 ມີນາປີ 1985.
ທ່ານມີອາຍຸ 54 ປີ ຊຶ່ງເປັນສະມາຊິກ ທີ່ມີອາຍຸນ້ອຍທີ່ສຸດ ໃນຄະນະກຳມະການກົມການ
ເມືອງສູນກາງພັກ ຂອງພັກຄອມມູນິສ ທີ່ປົກຄອງປະເທດຢູ່ໃນເວລານັ້ນທີ່ໄດ້ຖືກເລືອກໃຫ້
ເຂົ້າກຳອຳນາດ. ໃນໄລຍະ 6 ປີຕໍ່ມາ ທ່ານໄດ້ຈັດຕັ້ງນະໂຍບາຍທີ່ໄດ້ຫັນປ່ຽນຢ່າງໃຫຍ່
ຫຼວງທິດທາງປະວັດສາດ ແລະໃນທີ່ສຸດໄດ້ເຮັດໃຫ້ສະຫະພາບໂຊວຽດ ພົບກັບຈຸດອະວະ
ສານ.
ໃນດ້ານພາຍໃນປະເທດນັ້ນນະໂຍບາຍເຫຼົ່ານີ້ແມ່ນຮູ້ກັນໃນນາມ Glasnost ຫຼືເປີດກວ້າງ
ແລະ Perestroika ຫຼືຈັດຕັ້ງໃໝ່. ໃນດ້ານການຕ່າງປະເທດນັ້ນ ການປະຕິຮູບຂອງທ່ານ
Gorbachev ແມ່ນເປັນທີ່ຮູ້ກັນໃນນາມ “ຈິນຕະນາການຫຼືແນວຄິດໃໝ່”
ພວກນັກຊ່ຽວຊານເວົ້າວ່າ ທ່ານ Gorbachev ເຂົ້າໃຈດີວ່າ ສະຫະພາບໂຊວຽດອາດຈະບໍ່
ສາມາດໃຊ້ກຳລັງທາງທະຫານໄດ້ອີກຕໍ່ໄປ ເພື່ອເສີມຂະຫຍາຍອິດທິພົນຂອງຕົນ ຢູ່ໃນໂລກ
ພາຍນອກ ແລະເພື່ອຈະສ້າງຕັ້ງນະໂຍບາຍການຕ່າງປະເທດໃໝ່ ທີ່ສາມາດມີຄວາມຍືນຍົງ
ທາງດ້ານເສດຖະກິດໄດ້ນັ້ນທ່ານ Gorbachev ເຂົ້າໃຈດີວ່າຢູ່ໃນບາງຂົງເຂດມົສກູຈະຕ້ອງ
ໄດ້ຕັດການໃຊ້ຈ່າຍລົງ.
ທ່ານ Archie Brown ສາສະດາຈານກິດຕິມະສັກທີ່ມະຫາວິທະຍາໄລ Oxford ປະເທດ
ອັງກິດກ່າວວ່າ ນຶ່ງໃນບັນດາຂົງເຂດດັ່ງກ່າວກໍແມ່ນອັຟການິສຖານບ່ອນທີ່ທະຫານໂຊວຽດ
ໄດ້ທຳການສູ້ລົບກັບກຳລັງກອງໂຈນມູຈາຮີດິນມາຕັ້ງແຕ່ເດືອນທັນວາປີ 1979.
ສາສະດາຈານ Brown ເວົ້າວ່າ “ທ່ານ Gorbachev ໃນປີ 1979 ເວລາການ
ແຊກແຊງຂອງໂຊວຽດເລີ່ມຂຶ້ນນັ້ນທ່ານໄດ້ພົບປະກັບທ່ານ Eduard Shevar-
dnadze ຜູ້ນໍາພັກຄອມມູນິສຈໍເຈຍ ຊຶ່ງໃນເວລານັ້ນ ບຸກຄົນທັງສອງຕ່າງກໍຢູ່
ໃນຄະນະ ນໍາພາສູງສຸດແລະພວກທ່ານບໍ່ໄດ້ມີສ່ວນພົວພັນນໍາ ການຕັດສິນ
ໃຈດັ່ງກ່າວ. ພວກທ່ານຕ່າງກໍເຫັນພ້ອມນໍາກັນວ່າມັນເປັນຄວາມຜິດພາດຮ້າຍ
ແຮງ. ພວກທ່ານບໍ່ໄດ້ສະແດງການຄັດຄ້ານທີ່ກຸງມົສກູ ໃນເວລາທີ່ມີການປະ
ຊຸມກັນ ຍ້ອນວ່າຖ້າພວກທ່ານສະແດງການຄັດຄ້ານອອກມາມັນອາດຈະເຮັດ
ໃຫ້ອາຊີບທາງການເມືອງຂອງພວກທ່ານສິ້ນສຸດລົງໃນທັນທີ.”
ບໍ່ດົນຫຼັງຈາກໄດ້ເປັນຜູ້ນໍາ ຂອງໂຊວຽດແລ້ວ ທ່ານ Gorbachev ໄດ້ແຕ່ງຕັ້ງ ໃຫ້ທ່ານ
Shevardnadze ເປັນລັດຖະມົນຕີການຕ່າງປະເທດແລະສາສະດາຈານ Archie Brown
ເວົ້າວ່າທ່ານ Gorbachev ຢາກໃຫ້ຖອນທະຫານໂຊວຽດອອກຈາກອັຟການິສຖານ.
ສາສະດາຈານ Brown ກ່າວວ່າ “ທ່ານບໍ່ຕ້ອງການຢາກຈະດໍາເນີນການ ໃນວິທີທີ່
ເບິ່ງກັນວ່າເປັນການປະລາໄຊ. ທ່ານມີບັນຫາແບບດຽວກັນ ກັບພວກຜູ້ນໍາຂອງ
ປະເທດອື່ນໆທີ່ເຄີຍປະສົບມາແລ້ວເວລາຊີວິດພວກຊາວໜຸ່ມຈໍານວນຫຼວງຫຼາຍ
ຂອງພວກເຂົາເຈົ້າໄດ້ລົ້ມຫາຍຕາຍຈາກທ່ານຈະອະທິບາຍເລື່ອງນີ້ແບບໃດໃຫ້
ກັບຜູ້ເປັນພໍ່ຫຼືເປັນແມ່ວ່າການເສຍຊີວິດຂອງພວກເດັກນ້ອຍເຫຼົ່ານີ້ແມ່ນເປັນໄປ
ໂດຍໄຮ້ປະໂຫຍດຫຼືບໍ່? ດັ່ງນັ້ນທ່ານຈຶ່ງໄດ້ພະຍາຍາມຊອກຫາຊ່ອງທາງເພື່ອ
ໃຫ້ມີການເຈລະ ຈາກ່ຽວກັບການຖອນທະຫານ. ແຕ່ແນວໃດກໍຕາມທ່ານໄດ້ທໍາ
ການຕັດສິນໃຈຢ່າງເດັດຂາດວ່າ ທະຫານໂຊວຽດທັງໝົດ ຈະຕ້ອງຖອນອອກ
ພາຍໃນເດືອນກຸມພາ ປີ 1989 ແລະການຖອນທະຫານກໍໄດ້ມີຂຶ້ນ.”
ທ່ານ John Parker ນັກຊ່ຽວຊານກ່ຽວກັບຣັດເຊຍ ຂອງມະຫາວິທະຍາໄລປ້ອງກັນຊາດ
ຂອງສະຫະລັດໄດ້ສະແດງຄວາມເຫັນຂອງທ່ານໂດຍກ່າວວ່າ ນອກນັ້ນແລ້ວທ່ານ Gorba-
chev ຍັງໄດ້ເລີ່ມດໍາເນີນການ ໃນນະໂຍບາຍ ທີ່ມີການປ່ຽນແປງຢ່າງໃຫຍ່ຫຼວງ ກ່ຽວກັບ
ເລື່ອງທະຫານຂອງສະຫະພາບໂຊວຽດ.
ທ່ານ Parker ເວົ້າວ່າ “ທ່ານໄດ້ທໍາການເຄື່ອນໄຫວຕັດກອງກໍາລັງທະຫານໂຊ
ວຽດລົງຊຶ່ງນັ້ນເປັນອີກສິ່ງນຶ່ງທີ່ຜູ້ຄົນບໍ່ເຊື່ອວ່າທ່ານຈະເຮັດ. ແຕ່ຕໍ່ມາບໍ່ດົນ
ພວກ ເຮົາກໍເລີ່ມເຫັນຈໍານວນທະຫານຫຼຸດລົງ.”
ນະໂຍບາຍການຕ່າງປະເທດ “ຈິນຕະນາການຫຼືແນວຄິດໃໝ່” ຂອງທ່ານ Gorbachev ໄດ້
ແຜ່ລາມໄປທົ່ວຢູໂຣບຕາເວັນອອກບ່ອນທີ່ຜູ້ຄົນພາກັນຮຽກຮ້ອງໃຫ້ຍຸຕິການປົກຄອງຂອງລະ
ບອບຄອມມູນິສນັ້ນ.
ໃນເດືອນກໍລະກົດປີ 1989 ນະໂຍບາຍເຂົ້າແຊກແຊງເພື່ອໃຫ້ການສະໜັບສະໜຸນລະບອບ
ການປົກຄອງຄອມມູນິສທີ່ເອີ້ນກັນວ່າ ທິດສະດີເບຣັຊເນັຟນັ້ນໄດ້ຖືກແທນໂດຍອັນທີ່ທີ່ປຶກ
ສາຄົນນຶ່ງຂອງທ່ານ Gorbachev ບັນລະຍາຍວ່າເປັນທິດສະດີສີນາຕຣາຊຶ່ງອີງຕາມເພງໆ
ນຶ່ງຂອງທ່ານທີ່ມີຊື່ວ່າ “My Way” ຫຼືວິທີທາງຂອງຂ້ອຍ. ອີກຄວາມໝາຍນຶ່ງແລ້ວທີ່ປຶກສາ
ທ່ານນີ້ເວົ້າວ່າ ບັນດາປະເທດໃນຢູໂຣບຕາເວັນອອກສາມາດດໍາເນີນການຕາມວິທີທາງຂອງ
ພວກເຂົາເຈົ້າ ທັງທາງດ້ານເສດຖະກິດແລະທາງດ້ານການເມືອງໂດຍບໍ່ຕ້ອງຢ້ານວ່າ ຈະຖືກ
ຮຸກຮານໂດຍທະຫານໂຊວຽດ.
ສາສະດາຈານ Archie Brown ແລະພວກນັກວິເຄາະອື່ນໆກ່າວວ່ານະໂຍບາຍບໍ່ເຂົ້າແຊກ
ແຊງຂອງທ່ານ Gorbachev ໃນທີ່ສຸດໄດ້ນໍາໄປສູ່ການພັງທະລາຍລົງ ຂອງກໍາແພງເບີລິນ
ເມື່ອວັນທີ 9 ເດືອນພະຈິກປີ 1989.
ສາສະດາຈານ Brown ເວົ້າວ່າ “ຍ້ອນຄວາມແຕກຕ່າງທາງດ້ານເວລາ ມັນເກີດຂຶ້ນ
ຂະນະທີ່ທ່ານ Gorbachev ແລະສະມາຊິກຄົນອື່ນໃນຄະນະກໍາມະການກົມການ
ເມືອງສູນກາງພັກພາກັນນອນຫຼັບຢູ່ທີ່ກຸງມົສກູ. ພາຍໃນຕອນເຊົ້າຂອງມື້ໃໝ່ທ່ານ
Gorbachev ກ່າວຕໍ່ເອກອັກຄະລັດຖະທູດເຢຍຣະມັນຕາເວັນອອກວ່າພວກເຂົາ
ເຈົ້າໄດ້ກະທໍາໃນສິ່ງທີ່ຖືກຕ້ອງແລ້ວ ທີ່ບໍ່ໄດ້ພະຍາຍາມສະກັດກັ້ນ ແລະບໍ່ໃຊ້ກໍາ
ລັງ ແລະທ່ານໄດ້ຍອມຮັບເຖິງຄວາມພ້ອມ ກ່ຽວກັບການພັງທະລາຍລົງຂອງກໍາ
ແພງເບີລິນແລະການທ້ອນໂຮມຊາດຂອງເຢຍຣະມັນທີ່ຕິດຕາມມາ.”
ໃນເດືອນຕຸລາປີ 1990 ທ່ານ Gorbachev ກໍໄດ້ຮັບລາງວັນໂນແບລຂະແໜງສັນຕິພາບ.
ນຶ່ງປີກັບສອງເດືອນຕໍ່ມາທ່ານໄດ້ລາອອກຈາກການເປັນຜູ້ນໍາຂອງໂຊວຽດ ທີ່ພວກນັກຊ່ຽວ
ຊານກ່າວວ່າ ເປັນຜູ້ຮັບເຄາະ ຈາກກໍາລັງທີ່ທ່ານໄດ້ແກ້ເຊືອກປ່ອຍ ແຕ່ໃນທີ່ສຸດກໍບໍ່ສາມາດ
ຄວບຄຸມໄດ້.
