ສະຫະລັດຮຽກຮ້ອງໃຫ້ບັນດາລັດຖະບານໃນເຂດເອເຊຍຕາ
ເວັນອອກສຽງໃຕ້ ດຳເນີນງານເພື່ອຊ່ອຍຊີວິດພວກຍົກຍ້າຍ
ຖິ່ນຖານ ແລະອົບພະຍົບ ທີ່ຖືກປ່ອຍປະໄວ້ ຢູ່ໃນທະເລໂດຍ
ພວກລັກລອບຄ້າມະນຸດ.
ຮອງທີ່ປຶກສາ ສະພາຄວາມໝັ້ນຄົງແຫ່ງຊາດ ຂອງສະຫະລັດ
ທ່ານ Benjamin Rhodes ໄດ້ກ່າວຢ່າງເຈາະຈົງເຖິງສະພາບ
ການທີ່ພວມຊຸດໂຊມລົງ ຂອງພວກອົບພະຍົບໂຣຮິງຢາ ຈາກ
ມຽນມາ ໂດຍເວົ້າວ່າ ບັນດາປະເທດ ໃນເຂດເອເຊຍຕາເວັນ ອອກສຽງໃຕ້ຕ້ອງໄດ້ດຳເນີນຄວາມພະຍາຍາມ ເພື່ອໃຫ້ການ
ຊ່ອຍເຫລືອພວກອົບພະຍົບທີ່ຕົກຄ້າງຢູ່ໃນທະເລ ຕະຫລອດ
ທັງປັບປຸງສະພາບການຢູ່ໃນປະເທດທີ່ຈະຊ່ອຍເອື້ອອຳນວຍໃຫ້ມີການຍົກຍ້າຍຖິ່ນຖານ ໄດ້ນັ້ນ.
ໃນລະຫວ່າງການພົບປະກັບບັນດາເຈົ້າໜ້າທີ່ອະວຸໂສຂອງສະມາຄົມອາຊ່ຽນໃນວັນສຸກ ວານນີ້ ທ່ານ Rhodes ຍັງໃຫ້ຂໍ້ສັງເກດວ່າ ປະເທດໄທ ອິນໂດເນເຊຍ ແລະ ມາເລເຊຍ ໄດ້ໃຫ້ການຕ້ອນຮັບປະຊາຄົມອົບພະຍົບຫລາຍສົມຄວນແລ້ວ.
ບັນດານັກເຄື່ອນໄຫວ ກະປະມານວ່າ ມີຫຼາຍເຖິງ 8,000 ຄົນ ໃນອັນ ທີ່ເອີ້ນກັນວ່າ ອົບ
ພະຍົບທາງເຮືອທີ່ຍັງພາກັນລ່ອງລອຍຢູ່ໃນທະເລແລະຫຼາຍໆຄົນແມ່ນປາດສະຈາກອາ ຫານ ແລະນ້ຳດື່ມທີ່ພຽງພໍ ຫຼັງຈາກປະເທດໄທໄດ້ປາບປາມຂະບວນການຄ້າມະນຸດຢ່າງ
ກວ້າງຂວາງ ທີ່ໄດ້ລົບກວນເຄືອຂ່າຍການຂົນສົ່ງຂອງພວກອາຊະຍາກອນດັ່ງກ່າວ.
ມາເລເຊຍ ອິນໂດເນເຊຍແລະໄທ ແມ່ນ 3 ປະເທດທີ່ພວກຍົກຍ້າຍຖິ່ນຖານແລະອົບພະ ຍົບໄດ້ພະຍາຍາມເດີນທາງເຂົ້າໄປແລະປະເທດເຫຼົ່ານັ້ນກ່າວວ່າ ພວກອົບພະຍົບທີ່ໝົດຄວາມຫວັງເຫຼົ່ານັ້ນ ບໍ່ແມ່ນຄວາມຮັບຜິດຊອບຂອງຕົນແລະປະຕິເສດຕໍ່ຄຳຂໍຮ້ອງຂອງ
ສະຫະປະຊາຊາດ ແລະບັນດາກຸ່ມປົກປ້ອງສິດ ທິມະນຸດ.
ພວກອົບພະຍົບຈຳນວນຫຼວງຫລາຍທີ່ພາກັນເດີນທາງສ່ຽງອັນຕະລາຍແມ່ນຊາວໂຣຮິງ ຢາຈາກມຽນມາຍ້ອນເຂົາເຈົ້າໄດ້ຕົກເປັນຜູ້ເຄາະຮ້າຍໃນການປະຫັດປະຫານທີ່ກຸ່ມປົກ ປ້ອງສິດທິມະນຸດ Human Rights Watch ເວົ້າວ່າເທົ່າກັນກັບເປັນການກວດລ້າງຊົນ
ຊາດຊົນເຜົ່າ ແລະການກໍ່ອາຊະຍາກຳຕ້ານມະນຸດຊາດ.
ຊາວໂຣຮິງຢາໃນມຽນມາສ່ວນໃຫຍ່ແລ້ວແມ່ນໄດ້ຖືກປະຕິເສດບໍ່ໃຫ້ມີສິດທິຂັ້ນພື້ນຖານ
ຕ່າງໆ ເຊັ່ນການຖືສັນຊາດ ແລະສິດເສລີພາບໃນການເດີນທາງໄປມາ.
ພວກອົບພະຍົບໂຣຮິງຢາ ແລະບັງກລາແດັສຫລາຍກວ່າ 700 ຄົນ ໄດ້ໄປເຖິງອິນໂດເນ
ເຊຍໃນວັນສຸກວານນີ້ ຫລັງຈາກໄດ້ຮັບການຊ່ວຍເຫລືອຈາກພວກເຮືອຫາປາເວລາເຮືອ
ເຂົາເຈົ້າຫລົ້ມ ຢູ່ນອກຝັ່ງຂອງແຂວງ Aceh.
