ພວກຜູ້ນໍາທຸລະກິດ ແລະຫລາຍໆລັດຖະບານຢ້ານວ່າ ໃນບໍ່ຊ້ານີ້ ຄວາມຮຽກຮ້ອງຕ້ອງການດ້ານພະລັງງານ ອາດຈະມີຫລາຍເກີນປະລິມານພະລັງງານທີ່ມີໄວ້ໃຫ້ຊົມໃຊ້ ຢູ່ໃນຂົງເຂດເອເຊຍຕາເວັນອອກສຽງໃຕ້ນັ້ນ ຊຶ່ງຈະເປັນໄພຂົ່ມຂູ່ຕໍ່ການເຕີບໂຕທາງເສດຖະກິດ.
ເພື່ອຊ່ວຍໃຫ້ພະລັງງານມີພຽງພໍກັບຄວາມຮຽກຮ້ອງຕ້ອງ
ການນັ້ນ ປະເທດ ອິນໂດເນເຊຍ ມາເລເຊຍ ໄທ ແລະ
ຫວຽດນາມຕ່າງກໍພາກັນວາງແຜນການ ຈະສ້າງໂຮງງານ
ໄຟຟ້າທີ່ໃຊ້ພະລັງນີວເຄລຍໃນໄລຍະສິບປີຂ້າງໜ້ານີ້ ແລະ
ພວກປະເທດອື່ນໆຢູ່ໃນຂົງເຂດ ກໍຫວັງວ່າຈະເຮັດແບບ ດຽວກັນ.
ທ່ານ ວັງ ຮູ ດັນ ປະທານກໍາມາທິການພະລັງງານປະລະ
ມະນູຂອງຫວຽດນາມ ກ່າວວ່າ ແຜນການທີ່ຈະສ້າງໂຮງ
ໄຟຟ້ານີວເຄລຍຢ່າງໜ້ອຍ 8 ແຫ່ງນັ້ນ ແມ່ນຈະຊ່ວຍຮັບ
ປະກັນຄວາມໝັ້ນຄົງດ້ານພະລັງງານຂອງຫວຽດນາມ ແລະພ້ອມກັບໃຫ້ຄວາມໝັ້ນໃຈແກ່ພວກນັກລົງທຶນຂອງຕ່າງປະເທດ ຊຶ່ງທ່ານວັງ ຮູ ດັນ ກ່າວຕື່ມວ່າ.
"ປັດຈຸບັນນີ້ຫວຽດນາມ ພວກເຮົາມີການຂາດແຄນໄຟຟ້າຢ່າງຫຼວງຫຼາຍ ດັ່ງນັ້ນ ພວກນັກລົງທຶນຈຶ່ງມີຄວາມວິຕົກກັງວົນກ່ຽວກັບບັນຫາດັ່ງກ່າວ ດ້ວຍເຫດນີ້ ການຄໍ້າປະກັນໃນການສະໜອງໃຫ້ມີໄຟຟ້າໃຊ້ຢ່າງໝັ້ນຄົງ ຈຶ່ງມີຄວາມສຳຄັນຫຼາຍ."
ໂຮງໄຟຟ້າ Bata’an ຂອງຟິລິບປິນ ເປັນໂຮງໄຟຟ້ານີວເຄລຍແຫ່ງດຽວ ເທົ່ານັ້ນຢູ່ໃນຂົງເຂດເອເຊຍຕາເວັນອອກສຽງໃຕ້ ແຕ່ເນຶ່ອງຈາກຄວາມເປັນ ຫ່ວງເລື່ອງແຜ່ນດິນໄຫວ ແລະບວກກັບມີພູໄຟທີ່ຢູ່ໃກ້ໆນັ້ນ ໂຮງໄຟຟ້ານິວເຄລຍແຫ່ງນີ້ ກໍເລຍບໍ່ເຄີຍໄດ້ໃຊ້ຈັກເທື່ອ.
ແຕ່ເວລານີ້ ຟິລິບປິນກໍາລັງຄິດຢາກຈະໃຊ້ໂຮງໄຟຟ້າ ທີ່ມີອາຍຸ 27 ປີແຫ່ງດັ່ງກ່າວນີ້ ແຕ່ ທ່ານ Cirilo Bautista ເຈົ້າໜ້າທີ່ຮັບຜິດຊອບໂຮງໄຟຟ້າແຫ່ງນີ້ກ່າວວ່າ ກ່ອນອື່ນ ກໍແມ່ນ ຈະຕ້ອງມີການເຝິກອົບລົມພວກຄົນງານ ໃໝ່ເສຍກ່ອນ ຊຶ່ງທ່ານ Bautista ກ່າວຕໍ່ໄປວ່າ:
"ພວກນັກຊ່ຽວຊານຂອງເຮົາມີອາຍຸສູງແລ້ວ ຊຶ່ງຂ້າພະເຈົ້າໝາຍຄວາມວ່າ ພວກ
ເຂົາເຈົ້າເຖົ້າແກ່ແລ້ວ ແລະບາງຄົນກໍເສຍຊີວິດໄປແລ້ວກໍມີ ແຕ່ໃນເມື່ອໂຄງການ
ນິວເຄລຍຂອງພວກເຮົາ ຈະມີການຈັດຕັ້ງຄືນໃໝ່ ພວກເຮົາກໍສາມາດພັດທະນາ
ຄວາມຮູ້ຄວາມສາມາດໃນດ້ານນີ້ຄືນອີກ ໂດຍການໄປຝຶກອົບຮົມ ຢູ່ໃນປະເທດອື່ນໆ
ທີ່ມີຄວາມຮູ້ຄວາມສາມາດ ກ່ຽວກັບໂຮງໄຟຟ້ານິວເຄລຍ."
ເລື້ອງຄວາມປອດໄພບໍ່ແມ່ນແຕ່ພຽງບັນຫາຢ່າງດຽວເທົ່ານັ້ນ ທີ່ພາໃຫ້ຂົງເຂດເອເຊຍຕາເວັນອອກສຽງໃຕ້ ຊັກຊ້າໃນການພັດທະນາໂຮງໄຟຟ້າພະລັງນີວເຄລຍ. ອີກເຫດຜົນນຶ່ງກໍຄືວ່າ ການກໍ່ສ້າງແລະບໍາລຸງຮັກສາໂຮງງານໄຟຟ້ານິວເຄລຍ ແມ່ນແພງກວ່າໂຮງໄຟຟ້າຊະນິດອື່ນໆ ຕັ້ງຫລາຍເທົ່າຕົວນັ້ນເອງ.
ດັ່ງນັ້ນ ຫລາຍໆລັດຖະບານຈຶ່ງພາກັນສືບຕໍ່ສ້າງເຂື່ອນໄຟຟ້ານໍ້າຕົກ ແລະຊອກຫາແຫລ່ງເຊື້ອໄຟ fossil ໃໝ່ໆ ເຊ່ນແກ໊ສທໍາມະຊາດແລະຖ່ານຫີນເປັນຕົ້ນ ເຖິງແມ່ນຈະເປັນຫ່ວງໃນເລຶ່ອງມົນລະພິດ ກໍຕາມ.
ທ່ານ ບອບ ຄາມານດານອູ ປະທານສະມາຄົມຂຸດບໍ່ຖ່ານຫິນຂອງອິນໂດເນເຊຍ ກ່າວວ່າ
"ແລະຖ່ານຫີນໃນທຸກມື້ນີ້ ຍັງສືບຕໍ່ເປັນແຫຼ່ງທີ່ມາຂອງໄຟຟ້າລາຄາຖືກ ພວກເຮົາ
ສາມາດຫຼີກລ່ຽງເລື່ອງນີ້ໄດ້ຈັ່ງໃດ? ແນ່ນອນ ຄໍາຕອບກໍຄືເທັກໂນໂລຈີ. ພວກເຮົາ
ຕ້ອງປັບປຸງເທັກໂນໂລຈີ ກ່ຽວກັບວ່າຈະຫຼຸດຜ່ອນການປ່ອຍຄວັນທີ່ເປື້ອນເປິະນັ້ນ
ໄດ້ແບບໃດ. ພວກເຮົາບໍ່ສາມາດຫຼີກລ່ຽງຈາກການໃຊ້ຖ່ານຫີນໄດ້ ແຕ່ພວກເຮົາ
ສາມາດດຳເນີນງານຮ່ວມກັນໄດ້ ເພື່ອຫຼຸດຜ່ອນການປ່ອຍຄວັນພິດ ຈາກການນຳ ໃຊ້ຖ່ານຫີນນັ້ນ."
ພວກຊ່ຽວຊານດ້ານພະລັງງານກ່າວວ່າ ສິ່ງທ້າທາຍຫລາຍໆຢ່າງຕໍ່ການສ້າງໂຮງໄຟຟ້ານີວເຄລຍນັ້ນ ໝາຍຄວາມວ່າ ເຊື້ອໄຟນິວເຄລຍຈະມີການຂະຫຍາຍໂຕຢ່າງຊ້າໆ ໃນພາກ ສ່ວນພະລັງງານຂອງຂົງເຂດເອເຊຍຕາເວັນອອກສຽງໃຕ້.
