ກຸ່ມປົກປ້ອງສິດທິມະນຸດສາກົນກຸ່ມນຶ່ງ ໄດ້ກ່າວຫາກອງກຳລັງ
ຂອງລັດຖະບານຊູດານໃຕ້ ແລະ ພວກນັກຕໍ່ສູ້ທີ່ເປັນພັນທະມິດ
ວ່າ ທຳການເຂັ່ນຂ້າພົນລະເຮືອນ ຂົ່ມຂືນຊຳເລົາ ແລະ ທຳລາຍ
ຊັບສິນ ໃນລະຫວ່າງ ການປະຕິບັດງານທາງດ້ານທະຫານ ຢູ່ໃນ
ລັດ Unity.
ກຸ່ມປົກປ້ອງສິດທິມະນຸດ Human Rights Watch ຫຼື HRW
ກ່າວໃນຖະແຫລງການສະບັບໜຶ່ງ ໃນວັນພຸດມື້ນີ້ ວ່າ ການກ່າວ
ຫາກ່ຽວກັບ ການໂຈມຕີຕໍ່ພົນລະເຮືອນ ທີ່ວ່ານັ້ນ ແມ່ນເກີດຂຶ້ນ
ລະຫວ່າງ ເດືອນເມສາ ແລະ ມິຖຸນາ ປີ 2015 ທີ່ເທົ່າກັບ ເປັນ
ການກໍ່ອາຊະຍາກຳສົງຄາມ ແລະການເຂັ່ນຂ້າ ພ້ອມທັງການ
ຂົ່ມຂືນຊຳເລົາ ຍັງອາດເປັນການກໍ່ອາຊະຍາກຳຕ້ານມະນຸດຊາດນຳດ້ວຍ.
ຢູ່ໃນບົດລາຍງານທີ່ເປີດເຜີຍໃນວັນພຸດມື້ນີ້ ກຸ່ມປົກປ້ອງສິດທິມະນຸດ HRW ໄດ້ໃຫ້ລາຍລະອຽດຂອງການຄົ້ນພົບ ໃນການສຳພາດຜູ້ທີ່ລອດຊີວິດຈາກການໂຈມຕີດັ່ງກ່າວ ຫຼາຍກວ່າ 170 ຄົນ ເມື່ອເດືອນພຶດສະພາ ແລະ ມິຖຸນາຜ່ານມາ. ກຸ່ມ HRW ກ່າວວ່າ ຜູ້ຖືກສຳພາດ ຫຼາຍກວ່າ 125 ຄົນແມ່ນຜູ້ປະສົບໄພສົງຄາມຍ້ອນການສູ້ລົບກັນແລະ ການໂຈມຕີ ຕໍ່ໝູ່ບ້ານຂອງພວກເຂົາເຈົ້າ.
ກຸ່ມ HRW ກ່າວອີກວ່າ ຕົນໄດ້ບັນທຶກ ການສັງຫານທີ່ຜິດກົດໝາຍ ຕໍ່ພວກຜູ້ຊາຍ ແມ່ຍິງ ແລະ ເດັກນ້ອຍ ລວມທັງ ຜູ້ຊະລານຳດ້ວຍ ປະມານ 60 ຄົນ. ກຸ່ມ HRW ກ່າວຕໍ່ໄປວ່າ ຜູ້ເຄາະຮ້າຍບາງສ່ວນ ຖືກແຂວນຄໍ ອີກສ່ວນໜຶ່ງຖືກຍິງສັງຫານ ແລະ ຄົນອື່ນໆອີກຖືກເຜົາທັງເປັນ.
ທ່ານ Daniel Bekele ຜູ້ອຳນວຍການ ກຸ່ມປົກປ້ອງສິດທິມະນຸດ Human Rights Watch ປະຈຳເຂດອາຟຣິກາ ເອີ້ນການໂຈມຕີດັ່ງກ່າວນັ້ນ ວ່າ “ເປັນການບຸກໂຈມຕີທີ່ຮ້າຍກາດ”
ທີ່ມີລັກສະນະ “ບໍ່ໜ້າເຊື່ອເລີຍວ່າ ພວກເຂົາບໍ່ຫົວຊານຳຊີວິດຂອງພົນລະເຮືອນເລີຍ.”
ບົດລາຍງານກ່າວວ່າ ພວກນັກຕໍ່ສູ້ຈາກກຸ່ມຊົນເຜົ່າ Bul Nuer ໄດ້ປະຕິບັດງານ ຄຽງບ່າຄຽງໄຫລ່ກັບພວກນັກຕໍ່ສູ້ລັດຖະບານ ໂດຍຍິງປືນໃສ່ ພວກພົນລະເຮືອນໃນຂະນະທີ່ຫລົບໜີ ເຂົ້າໄປໃນປ່າ ແລະ ບຶງນັ້ນ. ບົດລາຍງານຍັງກ່າວອີກວ່າ ກອງກຳລັງລັດຖະບານ ແລະ ພວກທະຫານບ້ານທີ່ເປັນພັນທະມິດ ມີເຈດຕະນາເຜົາທຳລາຍໝູ່ບ້ານທັງໝົດ ແລະ ທຳລາຍຮ້ານອາຫານການກິນ ແລະເມັດພືດຕ່າງໆ ທີ່ມີຈຸດປະສົງເກັບໄວ້ສຳລັບການປູກຝັງ.
ເບິ່ງວີດີໂອກ່ຽວຂ້ອງ:
