ການພິຈາລະນາຄະດີທະຫານໄດ້ໄຂຂຶ້ນໃນປະເທດ ຊູດານໃຕ້ ໃນວັນອັງຄານວານນີ້ ສຳລັບທະຫານ 20 ຄົນທີ່ຖືກກ່າວຫາວ່າ ຄາດຕະກຳ ແລະ ຂົ່ມຂືນ ໃນການໂຈມຕີເຈົ້າ ໜ້າທີ່ຊ່ວຍເຫຼືອ ຂອງອົງການສາກົນໃນປີກາຍນີ້.
ຜູ້ຕ້ອງສົງໄສ 13 ຄົນ, ທັງໝົດແມ່ນທະຫານໃນເຄື່ອງແບບ, ໄດ້ຖືກນຳຕົວຂຶ້ນສານໃນ
ນະຄອນຫຼວງ ຈູບາ ເພື່ອຟັງຂໍ້ກ່າວຫາສຳລັບພວກເຂົາລວມມີ ການຄາດຕະກຳ, ຂົ່ມຂືນ, ທໍລະມານ ແລະ ປຸ້ນສະດົມໃນລະຫວ່າງການໂຈມຕີ ໂຮງແຮມ Terrain ຕັ້ງຢູ່ນະຄອນ
ຫຼວງຂອງປະເທດ ຊູດານໃຕ້ ເມື່ອເດືອນກໍລະກົດປີກາຍນີ້. ຫົວໜ້າໄອຍະການກອງທັບ ໄດ້ກ່າວວ່າ ຜູ້ຖືກກ່າວຫາອາດປະເຊີນກັບການຖືກປະຫານຊີວິດ ຖ້າພົບເຫັນວ່າມີ
ຄວາມຜິດ.
ການດຳເນີນຄະດີໄດ້ເລີ່ມຂຶ້ນທີ່ຄ້າຍ Giada ໃນນະຄອນຈູບາ. ຈຳເລີຍສີ່ຄົນໄດ້ໃສ່
ເຄື່ອງແບບຕິດກາກອງພັນເສືອ, ເຊິ່ງແມ່ນໜ່ວຍຄຸ້ມກັນປະທານາທິບໍດີຂອງປະເທດ.
ນາຍພົນໂທ Mangar Buong, ຮອງຜູ້ບັນຊາການກອງທັບ ຮັບຜິດຊອບໃນດ້ານການ
ປົກຄອງ ການເງິນ ແລະ ພະນັກງານ ໄດ້ກ່າວວ່າ ການດຳເນີນຄະດີດັ່ງກ່າວ ໄດ້ພິສູດ
ໃຫ້ເຫັນວ່າ ກອງທັບປົດປ່ອຍຂອງປະຊາຊົນ ຊູດານ ບໍ່ໄດ້ໃຫ້ອະໄພແກ່ຜູ້ລ່ວງລະເມີດ
ສິດທິມະນຸດ. ການພິຈາລະນາຄະດີນີ້ ແມ່ນການຟ້ອງຮ້ອງທີ່ເປັນທີ່ຮູ້ຈັກຄັ້ງທຳອິດ ສຳລັບສະມາຊິກຂອງກອງກຳລັງລັດຖະບານ ກ່ຽວກັບ ການກ່າວຫາ ຂົ່ມຂືນ.
ຫົວໜ້າໄອຍະການ, ພັນເອກ Abubakar Mohammed Rama-dhan ໄດ້ຂໍໃຫ້ຜູ້ບໍລິ ຫານຂອງໂຮງແຮມ Terrain ອະທິບາຍສິ່ງທີ່ໄດ້ເກີດຂຶ້ນໃນວັນທີ 11 ກໍລະກົດ ປີກາຍນີ້. ຜູ້ເຫັນເຫດການ ທ່ານ Michael Woodward ໄດ້ກ່າວວ່າ ມີ່ທະຫານຕິດອາວຸດ 50
ຫາ 100 ຄົນ, ພ້ອມກັບລົດຕິດປືນກົນ, ໄດ້ບຸກຜ່ານປະຕູໂຂງຂອງໂຮງ ແຮມ ແລະ ບຸກ ເຂົ້າໃນໂຮງແຮງ ຫຼັງຈາກໄດ້ເອົາຊະນະພວກຍາມຮັກ ສາຄວາມປອດໄພ.
