ຜູ້ນຳກະບົດຊູດານໃຕ້ ທ່ານຣິກ ມາຊາຣ ໄດ້ກັບຄືນໄປນະຄອນຫຼວງຂອງຊູດານໃຕ້
ທີ່ເກີດສົງຄາມ ເປັນເທື່ອທຳອິດ ໃນຮອບສອງປີ.
ທ່ານມາຊາຣ ໄດ້ເດີນທາງໄປເຖິງ ໃນຕອນເຊົ້າວັນພຸດມື້ນີ້ ຢູ່ສະໝາມບິນນະຄອນ
ຈູບາ ຈາກອາຟຣິກາໃຕ້ ເພື່ອເຂົ້າຮ່ວມພິທີຕ້ອນຮັບ ໂດຍຄູ່ແຂ່ງມາເປັນ ເວລາດົນ
ນານຂອງທ່ານ ຄືປະທານາທິບໍດີ ຊາລວາ ເກຍ. ທັງສອງທ່ານໄດ້ລົງນາມໃນຂໍ້ຕົກ
ລົງຟື້ນຟູສັນຕິພາບ ທີ່ເຊັນກັນໃນເດືອນກັນຍາ ແນໃສ່່ເພື່ອຍຸຕິສົງຄາມກາງເມືອງ
ທີ່ດຳເນີນມາເກືອບຫ້າປີໃນຊູດານໃຕ້.
ທ່ານມາຊາຣ ໄດ້ຮັບໃຊ້ເປັນຮອງປະທານາທິບໍດີເກຍ ຫຼັງຈາກຊູດານໃຕ້ໄດ້ຮັບ
ເອກກະລາດຈາກຊູດານ ໃນປີ 2011 ແຕ່ວ່າການຍາດແຍ່ງອຳນາດລະຫວ່າງທັງ
ສອງທ່ານ ໄດ້ເຮັດໃຫ້ເກີດການສູ້ລົບກັນ ລະຫວ່າງກຳລັງທີ່ຈົງຮັກພັກດີຕໍ່ ທ່ານ
ເກຍ ແລະທ່ານມາຊາຣ. ທ່ານເກຍ ແລະທ່ານມາຊາຣ ໄດ້ບັນລຸຂໍ້ຕົກລົງຫຼາຍສະ
ບັບ ນັບແຕ່ນັ້ນມາ ແຕ່ວ່າ ແຕ່ລະຂໍ້ຕົກລົງ ໄດ້ປະສົບກັບ ຄວາມລົ້ມແຫຼວ ຮວມທັງ
ເທື່ອຫລ້າສຸດໃນປີ 2016 ທີ່ໄດ້ບັງຄັບໃຫ້ທ່ານມາຊາຣ ຫລົບໜີການສູ້ລົບຮອບ
ໃໝ່ ຢູ່ໃນນະຄອນຫຼວງ.
ການສູ້ລົບທີ່ຍັງດຳເນີນຢູ່ຕໍ່ມາ ໄດ້ເຮັດໃຫ້ຊາວຊູດານໃຕ້ເກືອບ 400,000 ຄົນ
ເສຍຊີວິດ ແລະບັງຄັບໃຫ້ອີກຫຼາຍລ້ານຄົນ ໜີຈາກບ້ານເຮືອນເຂົາເຈົ້າ.
ພາຍໃຕ້ຂໍ້ຕົກລົງໃໝ່ນີ້ີ້ ທ່ານມາຊາຣ ຈະຮັບໃຊ້ເປັນຮອງປະທານາທິບໍດີຜູ້ທີ່ນຶ່ງ
ໃນຈຳນວນທັງໝົດຫ້າທ່ານ ພາຍໃຕ້ລັດຖະບານ ໃນໄລຍະຂ້າມຜ່ານເພື່ອສ້າງ
ຄວາມສາມັກຄີແຫ່ງຊາດ.
