ຜູ້ຕາງໜ້າຂອງພວກກະບົດ ແລະລັດຖະບານໃນຊູດານໃຕ້ໄດ້
ຈັດໃຫ້ມີການພົບປະເທື່ອທຳອິດຂຶ້ນ ທີ່ແນໃສ່ເພື່ອຍຸຕິສົງຄາມ
ກາງເມືອງຢູ່ໃນປະເທດດັ່ງກ່າວ.
ທັງສອງຝ່າຍໄດ້ພົບປະກັນທີ່ນະຄອນຫຼວງຈູບາໃນວັນອັງຄານ
ວານນີ້ໃນຄວາມຫວັງເພື່ອຫາທາງສ້າງຕັ້ງລັດຖະບານສາມັກຄີ
ຊາດໃນໄລຍະຂ້າມຜ່ານ.
ລັດຖະບານ ແລະພວກກະບົດ ໄດ້ເປີດການເຈລະຈາ ມາຫຼາຍ
ເທື່ອແລ້ວ ນັບຕັ້ງແຕ່ໄດ້ເກີດບັນຫາຂັດແຍ້ງເປັນເວລາສັ້ນໆທີ່
ເລີ້ມຂຶ້ນໃນກາງເດືອນທັນວາປີ 2013 ແຕ່ວ່າການຢຸດຍິງຫຼາຍ
ຄັ້ງທີ່ໄດ້ມີການຕົກລົງກັນ ໃນຮອບສອງປີທີ່ຜ່ານມາແມ່ນໄດ້ມີການລະເມີດເລື້ອຍໆ.
ປະທານາທິບໍດີ Salva Kiir ແລະຜູ້ນຳຂອງພວກກະບົດ ທ່ານ Riek Machar ຕ່າງກໍໄດ້
ກ່າວຫາຊຶ່ງກັນແລະກັນຊ້ຳແລ້ວຊ້ຳອີກວ່າ ອີກຝ່າຍນຶ່ງເປັນຜູ້ລະເມີດ ຂໍ້ຕົກລົງສັນຕິພາບ
ແຕ່ບຸກຄົນທັງສອງກໍກ່າວວ່າຕົນຍັງສືບຕໍ່ມີຄວາມໝັ້ນໝາຍ ຂໍ້ຕົກລົງສະບັບວັນທີ 26 ສິງ
ຫາ ທັງໆທີ່ໄດ້ພາດທຸກໆເສັ້ນຕາຍທີ່ໄດ້ກຳນົດໄວ້ນັ້ນ.
ສະຫະລັດກ່າວໃນວັນອັງຄານວານນີ້ວ່າ ຕົນຂໍສະແດງຄວາມຊົມເຊີຍ ຕໍ່ການກັບຄືນເຂົ້າ
ຮ່ວມການເຈລະຈາ ແລະກ່າວຕື່ມວ່າ ຫລາຍໆຢ່າງແມ່ນສຳຄັນແຕ່ການຕັດສິນໃຈທີ່ຫຍຸ້ງ
ຍາກຈຳນວນນຶ່ງແມ່ນຍັງຄ້າງຄາຢູ່. ວໍຊິງຕັນຮຽກຮ້ອງໃຫ້ທັງສອງຝ່າຍ ຮ່ວມມືກັນບົນພື້ນ
ຖານໃນການມີຈິດໃຈແຫ່ງຄວາມສາມັກຄີ ແລະການຜ່ອນສັ້ນຜ່ອນຍາວ ເພື່ອຈັດຕັ້ງການ
ປະຕິຮູບທີ່ໄດ້ລະບຸໄວ້ຢູ່ໃນຂໍ້ຕົກລົງສັນຕິ ພາບນັ້ນ.
ຊູດານໃຕ້ເປັນປະເທດທີ່ໃໝ່ສຸດໃນໂລກ ຊຶ່ງໄດ້ຮັບເອກກະລາດຈາກຊູດານ ໃນປີ 2011. ການສູ້ລົບກັນລະຫວ່າງທະຫານລັດຖະບານແລະກຳລັງກະບົດຂອງທ່ານ Machar ແມ່ນ
ໄດ້ມີຜົນກະທົບຢ່າງໂຫດຮ້າຍເປັນພິເສດຕໍ່ພົນລະເຮືອນ.
ທັງສອງຝ່າຍຕ່າງກໍໄດ້ກ່າວຫາຊຶ່ງກັນແລະກັນວ່າ ຂ້າລ້າງເຜົ່ພັນ ເກັບເກນ ແລະສັງຫານ
ພວກເດັກນ້ອຍ ທຳການຂົ່ມຂືນແລະທໍລະມານ ໃນຂອບເຂດທີ່ ກວ້າງຂວາງ ແລະບັງຄັບ
ໃຫ້ປະຊາຊົນຍົກຍ້າຍບ່ອນຢູ່ ເພື່ອກວດລ້າງເຂດຕ່າງໆຂອງຝ່າຍກົງກັນຂ້າມ.
