ນັກສຶກສາມະຫາວິທະຍາໄລເກົາຫຼີໃຕ້ ຄົນນຶ່ງ ທີ່ຖືກກັກຂັງ
ຍ້ອນໄດ້ລັກລອບເຂົ້າປະເທດເກົາຫຼີເໜືອຢ່າງຜິດກົດໝາຍ
ໄດ້ບອກກັບສື່ຂ່າວສະຫະລັດວ່າ ລາວ "ຢາກຖືກຈັບກຸມ”
ໂດຍເກົາຫຼີເໜືອ.
ທ້າວ Joo Won-Moon ໄວ 21 ປີ ໄດ້ຖືກຈັບກຸມເມື່ອວັນທີ
22 ເດືອນເມສາ ຫຼັງຈາກທີ່ຂ້າມເຂົ້າໄປໃນເກົາຫລີເໜືອ
ຈາກເມືອງຊາຍແດນ Dandong ຂອງຈີນ ອິງຕາມອົງການ
ຂ່າວສູນກາງຂອງທາງການເກົາລີເໜືອ.
ໃນການໃຫ້ສຳພາດກັບນັກຂ່າວຄົນໜຶ່ງຂອງອົງການຂ່າວ CNN
ຢູ່ພຽງຢາງ ໃນວັນອັງຄານມື້ນີ້ ທ້າວ Joo ໄດ້ຍອມຮັບວ່າ ໄດ້ລັກເຂົ້າປະເທດ ຢ່າງຜິດກົດ
ໝາຍ. ລາວເວົ້າວ່າ ລາວໄດ້ປີນຂ້າມຮົ້ວໜາມໝາກຈັບສອງຊັ້ນ ແລະຍ່າງໄປຕາມລຳແມ່ນ້ຳ ຈົນມີທະຫານຄົນໜຶ່ງເຂົ້າມາຈັບລາວ. ທ້າວ Joo ກ່າວອີກວ່າ: “ຂ້ອຍຄິດວ່າຈະມີເຫດ
ການທີ່ສຳຄັນເກີດຂຶ້ນ ແລະ ຫວັງເປັນຢ່າງຍິ່ງວ່າເຫດການດັ່ງກ່າວຈະເປັນຜົນດີຕໍ່ສາຍ
ພົວພັນ ລະຫວ່າງເໜືອແລະໃຕ້” ລາວບໍ່ໄດ້ລະບຸວ່າ “ເຫດການ” ທີ່ສຳຄັນນັ້ນ ແມ່ນຫຍັງ
ແລະກ່າວຕື່ມວ່າ: “ຂ້ອຍຫວັງວ່າ ຂ້ອຍຈະສາມາດປະກາດໃຫ້ຄົນທົ່ວໂລກໄດ້ຮູ້ວ່າ
ນັກສຶກສາມະຫາວິທະຍາໄລທຳມະດາຄົນໜຶ່ງ ລັກລອບເຂົ້າໄປໃນ ສາທາລະນະລັດ ປະຊາທິປະໄຕ ປະຊາຊົນ ເກົາຫຼີ ຢ່າງຜິດກົດໝາຍ ໄດ້ແນວໃດ ແຕ່ວ່າດ້ວຍຄວາມໃຈ
ດີ ຂອງ ສປປ ເກົາຫຼີ ຂ້ອຍຈະຖືກປ່ອຍກັບເມືອບ້ານຢ່່າງປອດໄພ.” ຜູ້ກ່ຽວໄດ້ເວົ້າເຖິງເກົາຫຼີເໜືອ ໂດຍເອີ່ຍຊື່ທາງການຂອງເກົາຫຼີເໜືອ.
ທ້າວ Joo ເວົ້າວ່າ ລາວໄດ້ຮັບການເບິ່ງແຍງເປັນຢ່າງດີ ແລະຖືກຂັງໄວ້ໃນຫ້ອງພິເສດ ທີ່ມີ
ສາມຕຽງນອນ ມີຫ້ອງນ້ຳສ່ວນຕົວ, ແລະມີອາຫານກິນຢ່າງພຽງພໍ. ແຕ່ວ່າ, ລາວກໍ່ບໍ່ໄດ້ຮັບ
ອະນຸຍາດໃຫ້ໃຊ້ອິນເຕີເນັດ, ໂທລະພາບ, ວິທະຍຸ ຫຼື ໂທລະສັບ.
