ລິ້ງ ສຳຫລັບເຂົ້າຫາ

ວັນອັງຄານ, ໑໖ ກໍລະກົດ ໒໐໒໔

ເກົາຫຼ​ີ​ໃຕ້ ຍິງ​ປືນ​ເຕືອນ​ທະ​ຫານ ເກົາຫຼີ​ເໜືອ ທີ່​ຂ້າມ​ເຂດ​ຊາຍ​ແດນ​ອີກ​ຄັ້ງ​ນຶ່ງ


ໃນ​ພາບ​ທີ່ບໍ່​ໄດ້​ບອກ​ມື້ ແລະ ຖືກ​ເປີດ​ເຜີຍ​ເມື່ອ​ວັນ​ທີ 27 ພະ​ຈິກ 2023, ໂດຍ​ກະ​ຊວງ​ປ້ອງ​ກັນ​ປະ​ເທດ ເກົາຫຼີ​ໃຕ້, ສະ​ແດງ​ໃຫ້​ເຫັນ​ທະ​ຫານ ເກົາຫຼີ​ເໜືອ ຕັ້ງ​ປ້ອມ​ຍາມ​ຢູ່​ເຂດ​ປອດ​ທະ​ຫານ (DMZ) ໃນ ເກົາຫຼີ​ເໜືອ
ໃນ​ພາບ​ທີ່ບໍ່​ໄດ້​ບອກ​ມື້ ແລະ ຖືກ​ເປີດ​ເຜີຍ​ເມື່ອ​ວັນ​ທີ 27 ພະ​ຈິກ 2023, ໂດຍ​ກະ​ຊວງ​ປ້ອງ​ກັນ​ປະ​ເທດ ເກົາຫຼີ​ໃຕ້, ສະ​ແດງ​ໃຫ້​ເຫັນ​ທະ​ຫານ ເກົາຫຼີ​ເໜືອ ຕັ້ງ​ປ້ອມ​ຍາມ​ຢູ່​ເຂດ​ປອດ​ທະ​ຫານ (DMZ) ໃນ ເກົາຫຼີ​ເໜືອ

ທະ​ຫານ​ເກົາຫຼີ​ເໜືອຫຼາຍ​ສິ​ບ​ຄົນ​ໄດ້​ຂ້າມ​ເຂດ​ຊາຍ​ແດນ​ທີ່​ມີ​ການ​ປ້ອງ​ກັນ​ຢ່າງ​ໜັກ​ເປັນ​ເວ​ລາ​ສັ້ນໆ​ ໃນ​ວັນ​ອັງ​ຄານມື້ນີ້ ແຕ່​ໄດ້​ຖອນ​ອອກ​ໄປຫຼັງ​ຈາກ​ຖືກ​ຍິງ​ເຕືອນ, ອີງ​ຕາມ​ການ​ກ່າວ​ຂອງ​ລັດ​ຖະ​ບານ ໂຊ​ລ໌, ມັນ​ເປັນ​ເຫດ​ການ​ຄັ້ງ​ທີ​ສອງ​ພາຍ​ໃນ​ສອງ​ອາ​ທິດ ໃນ​ຂະ​ນະ​ທີ່ ພຽງ​ຢາງ ເສີມ​ອາ​ວຸດ​ຢູ່​ຊາຍ​ແດນຂອງ​ເຂົາ​ເຈົ້າ​ຕິດ​ກັບ​ເກົາຫຼີ​ໃຕ້.

ລະ​ເບີດ​ຝັງ​ດິນ​ແຕກ​ຢູ່​ໃກ້​ເຂດ​ຊາຍ​ແດນ​ຍັງ​ໄດ້​ເຮັດ​ໃຫ້​ທະ​ຫານ ເກົາຫຼີ​ເໜືອ ຫຼາຍ​ຄົນ​ບາດ​ເຈັບ, ເສ​ນາ​ທິ​ການ​ຮ່ວມ​ໄດ້​ກ່າວ, ໂດຍ​ເວົ້າ​ຕື່ມ​ວ່າ ພຽງ​ຢາງ ເມື່ອບໍ່​ດົນ​ມານີ້​ ໄດ້​ສົ່ງ​ກອງ​ທະ​ຫານ​ໄປ​ເຂດ​ດັ່ງ​ກ່າວ ​ເພື່ອຖາງ​ຫຍ້າ ແລະ ວາງ​ລະ​ເບີດ​ຝັງ​ດິນ, ໃນ​ຂະ​ນະ​ທີ່​ສາຍ​ພົວ​ພັນ​ລະ​ຫວ່າງ​ສອງ​ປະ​ເທດ​ດັ່ງ​ກ່າວ​ຊຸດໂຊມ​ລົງ.

ໃນ​ທາງ​ເ​ຕັກ​ນິກ​ແລ້ວ, ສອງ​ປະ​ເທດ​ທີ່​ວ່າ​ນັ້ນ ແມ່ນ​ຍັງ​ຄົງຢູ່​ໃນ​ພາວະສົງ​ຄາມຢູ່ ໃນ​ຂະ​ນະ​ທີ່​ຄວາມ​ຂັດ​ແຍ້ງ​ລະ​ຫວ່າງ​ປີ 1950-1953 ໄດ້​ສິ້ນ​ສຸດ​ລົງ​ດ້ວຍ​ການສະ​ຫງົບ​ເສິກ, ແລະ ເຂດ​ປອດ​ທະ​ຫານ​ທີ່​ແຍກ​ແຫຼມ​ດັ່ງ​ກ່າວ​ອອກ​ຈາກ​ກັນ ​ແມ່ນ​ບ່ອນ​ທີ່​ມີ​ລະ​ເບີດ​ຝັງ​ດິນຫຼາຍ​ທີ່​ສຸດ​ໃນ​ໂລກ.

ແຕ່ ເກົາຫຼີ​ເໜືອ ແມ່ນ​ກຳ​ລັງ​ເສີມ​ຄວາມ​ແຂງ​ແກ່ນ, ດ້ວຍ​ການ​ວາງ​ລະ​ເບີດ​ຝັງ​ດິນ​ຕື່ມ​ອີກ, ເສີມ​ຖະໜົນ​ຍຸດ​ທະ​ວິ​ທີ ແລະ ເພີ່ມ​ສິ່ງ​ທີ່​ປາ​ກົດ​ວ່າ ​ເປັນ​ກຳ​ແພງ​ຕໍ່​ຕ້ານ​ລົດ​ຖັງ, ອີງ​ຕາມ​ການ​ກ່າວ​ຂອງກອງ​ທັບ ໂຊ​ລ໌.

ເສ​ນາ​ທິ​ການ​ຮ່ວມ​ໄດ້​ກ່າວ​ວ່າ ເຂົາ​ເຈົ້າ​ເຊື່ອວ່າ ການ​ຂ້າມ​ເຂດ​ຊາຍ​ແດນ​ໃນ​ວັນ​ອັງ​ຄານມື້ນີ້ ຄື​ຄັ້ງ​ທີ່​ຜ່ານ​ມາ​ ໃນ​ວັນ​ທີ 9 ມິ​ຖຸ​ນາ ແມ່ນ​ອຸ​ບັດ​ຕິ​ເຫດ, ດ້ວຍ​ທະ​ຫານ​ ເກົາຫຼີ​ເໜືອ​ ປະ​ມານ 20 ຫາ 30 ຄົນ​ທີ່​ຫາມ​ເຄື່ອງ​ມື​ເຮັດ​ວຽກ​ໄດ້​ມີ​ສ່ວ​ນ​ຮ່ວມ​ໃນ​ເຫດ​ການ​ດັ່ງ​ກ່າວ, ເຊິ່ງ​ໄດ້​ເກີດ​ຂຶ້ນ​ປະ​ມານ 8:30 ຂອງ​ເຊົ້າ​ວັນ​ອັງ​ຄານມື້ນີ້.

“ທະ​ຫານ ເກົາຫຼີ​ເໜືອ ຫຼາຍ​ສິບ​ຄົນ​ໄດ້​ຂ້າມ​ເສັ້ນແບ່ງ​ເຂດ​ແດນ​ທະ​ຫານ​ມື້ນີ້ ແລະ ຖອນ​ອອກ​ໄປ​ທາງ​ພາກ​ເໜືອ ຫຼັງ​ຈາກ​ຖືກ​ຍິງ​ເຕືອນ,” ອີງ​ຕາ​ມ​ກາ​ນ​ກ່າວ​ຂອງ​ເຈົ້າ​ໜ້າ​ທີ່​ເສ​ນາ​ທິ​ການ​ຮ່ວມ​ທ່ານ​ນຶ່ງ.

ເຈົ້າ​ໜ້າ​ທີ່​ຄົນ​ນັ້ນ​ກ່າວ​ວ່າ “ທະ​ຫານ ເກົາຫຼີ​ເໜືອ ທີ່ຖືກມອບ​ພາ​ລະ​ກິດ​ໃຫ້​ເສີມອາ​ວຸດ​ຢູ່​ເຂດ​ຊາຍ​ແດນ “ໄດ້​ປະ​ສົບ​ກັບ​ການ​ເສຍ​ຊີ​ວິດ​ຈຳ​ນວນຫຼາຍ​ຈາກ​ເຫດລະ​ເບີດ​ຝັງ​ດິນ​ແຕກ​ຢ່າງ​ຊ້ຳ​ແລ້ວ​ຊ້ຳ​ອີກ” ແຕ່​ເຂົາ​ເຈົ້າ “ປາ​ກົດ​ວ່າ ​ສືບ​ຕໍ່​ດຳ​ເນີນ​ການ​ປະ​ຕິ​ບັດ​ການ​ນັ້ນ​ຢ່າງ​ບໍ່​ລະ​ມັດ​ລະ​ວັງ.”

ອ່ານ​ຂ່າວນີ້​ຕື່ມ​ເປັນ​ພາ​ສາ​ອັງ​ກິດ

ຟໍຣັມສະແດງຄວາມຄິດເຫັນ

XS
SM
MD
LG