ປະທານາທິບໍດີ Park Geun-hye ແຫ່ງເກົາຫຼີໃຕ້ ກ່າວວ່າ
ທ່ານນາງເຕັມໃຈທີ່ຈະເປີດການພົບປະຂັ້ນສຸດຍອດກັນກັບ
ທ່ານກິມຈົງອຸນ ຜູ້ນຳເກົາຫຼີເໜືອ ໂດຍບໍ່ມີການວາງເງື່ອນໄຂ
ໃດໆລ່ວງໜ້າ.
ທ່ານນາງ Park Geun-hye ກ່າວຕໍ່ບັນດານັກຂ່າວໃນກອງ
ປະຊຸມນັກຂ່າວທີ່ຖ່າຍທອດທາງໂທລະພາບໃນວັນຈັນມື້ນີ້
ວ່າ ທ່ານນາງເຕັມໃຈທີ່ຈະພົບປະກັບຜູ້ໃດກໍຕາມ ເພື່ອຜ່ອນ
ຄາຍຄວາມເຄັ່ງຕຶງລົງໃນແຫຼມເກົາຫຼີ ແລະບັນລຸການທ້ອນໂຮມ
ປະເທດເຂົ້າກັນ. ທ່ານນາງກ່າວວ່າ “ທ່າທີຂອງຂ້າພະເຈົ້າ
ກໍແມ່ນວ່າ ຜ່ອນຄາຍຄວາມເຈັບປວດແຫ່ງການແບ່ງ
ແຍກ ແລະເພື່ອໃຫ້ບັນລຸການທ້ອນໂຮມປະເທດໃຫ້ເປັນອັນນຶ່ງອັນດຽວກັນຢ່າງສັນຕິ ແລະຂ້າພະເຈົ້າເຕັມໃຈທີ່ຈະພົບປະກັບຜູ້ໃດກໍຕາມ.” ທ່ານນາງກ່າວຕໍ່ໄປ
ວ່າ” ຖ້າຫາກມັນເປັນການຊ່ອຍເຫຼືອ ຂ້າພະເຈົ້າກໍແມ່ນຕຽມພ້ອມທີ່ຈະທຳການພົບປະຂັ້ນສຸດຍອດກັບເກົາຫຼີເໜືອ ແລະບໍ່ມີການວາງເງື່ອນໄຂໃດໆລ່ວງໜ້າ.” ທ່ານນາງກ່າວຕື່ມອີກວ່າ “ ເກົາຫຼີເໜືອຄວນຈະຕອບສະໜອງຕໍ່ການໂອ້ລົມສົນ
ທະນາກັນນີ້ ໂດຍບໍ່ມີຄວາມລັ່ງເລໃຈໃດໆ.”
ປະທານາທິບໍດີປັກ ກ່າວວ່າ ການຍຸດຕິໂຄງການນີວເຄລຍຂອງເກົາຫຼີເໜືອ ຄວນຈະເປັນພາກສ່ວນສຳຄັນອັນນຶ່ງຂອງການໂອ້ລົມສົນທະນາກັນເພື່ອສັນຕິພາບ ແຕ່ມັນບໍ່ເປັນເງື່ອນໄຂລ່ວງໜ້າ ເພື່ອມີການພົບປະຂັ້ນສຸດຍອດກັນນັ້ນ. ບັນດາຜູ້ນຳຂອງສອງເກົາຫຼີ ໄດ້ພົບປະກັນມາພຽງ 2 ເທື່ອ ນັບແຕ່ສອງປະເທດໄດ້ຖືກແບ່ງແຍກກັນໃນຕອນສົງຄາມໂລກຄັ້ງ
ທີສອງຍຸດຕິລົງ.
ການພົບປະຂັ້ນສຸດຍອດກັນໃນເທື່ອຫຼ້າສຸດ ມີຂຶ້ນລະຫວ່າງມື້ລາງທ່ານກິມຈົງອີລ ຜູ້ນຳເກົາຫຼີເໜືອ ແລະອະດີດປະທານາທິບໍດີ Roh Moo-hyun ໃນປີ 2007.
