ລັດຖະບານຂອງ ເກົາຫຼີໃຕ້ ຈະເອົາບາດກ້າວສຸດທ້າຍເພື່ອລະງັບໃບອະນຸຍາດເຮັດວຽກຂອງພວກແພດໝໍລຸ້ນນ້ອງທີ່ກຳລັງທຳການນັດຢຸດງານໃນອາທິດໜ້າ ໃນຂະນະທີ່ເຂົາເຈົ້າປະຕິເສດທີ່ຈະຢຸດການຍ່າງອອກຈາກວຽກເປັນອາທິດຂອງເຂົາເຈົ້າ ທີ່ໄດ້ສ້າງຄວາມຫຍຸ້ງຍາກໃຫ້ແກ່ການບໍລິການດ້ານການແພດຂອງປະເທດ, ອີງຕາມການກ່າວຂອງບັນດາເຈົ້າໜ້າທີ່ໃນວັນພະຫັດມື້ນີ້.
ຜູ້ຝຶກງານດ້ານການແພດ 13,000 ຄົນເຊິ່ງຫຼາຍກວ່າ 90 ເປີເຊັນຂອງປະເທດ ແລະ ປະຊາຊົນທີ່ອາໄສຢູ່ໃນທ້ອງຖິ່ນໄດ້ພາກັນຍ່າງອອກຈາກວຽກໄດ້ປະມານເດືອນນຶ່ງແລ້ວ ເພື່ອປະທ້ວງຕໍ່ແຜນການຂອງລັດຖະບານທີ່ຈະຂະຫຍາຍການຮັບນັກສຶກສາເຂົ້າໂຮງຮຽນການແພດຢ່າງຫຼວງຫຼາຍ. ການນັດຢຸດງານຂອງເຂົາເຈົ້າໄດ້ກໍ່ໃຫ້ເກີດການຍົກເລີກການຜ່າຕັດຫຼາຍຮ້ອຍຄັ້ງ ແລະ ການປິ່ນປົວອື່ນໆຢູ່ໂຮງໝໍ.
ບັນດາເຈົ້າໜ້າທີ່ກ່າວວ່າມັນມີຄວາມຮີບດ່ວນທີ່ຈະມີແພດໝໍເພີ່ມເຕີມ ເພາະວ່າ ເກົາຫຼີໃຕ້ ມີປະຊາກອນຜູ້ສູງອາຍຸເພີ່ມຂຶ້ນຢ່າງວ່ອງໄວ, ແລະ ອັດຕາແພດໝໍຕໍ່ປະຊາກອນຂອງເຂົາເຈົ້າແມ່ນນຶ່ງໃນລະດັບທີ່ຕ່ຳທີ່ສຸດຂອງໂລກ. ແຕ່ບັນດາແພດໝໍເວົ້າວ່າ ໂຮງຮຽນບໍ່ສາມາດຮັບມືກັບການເພີ່ມຂຶ້ນຂອງນັກສຶກສາຢ່າງ ວ່ອງໄວ ແລະ ຫຼວງຫຼາຍ, ແລະ ວ່າມັນຈະທຳລາຍການບໍລິການດ້ານການແພດຂອງປະເທດໃນທີ່ສຸດ.
ລັດຖະບານແມ່ນໄດ້ເອົາຫຼາຍບາດກ້າວດ້ານການບໍລິຫານທີ່ຖືກຮຽກຮ້ອງ ເພື່ອລະງັບໃບອະນຸຍາດຂອງເຂົາເຈົ້າ, ຫຼັງຈາກເຂົາເຈົ້າພາດຂີດເສັ້ນຕາຍເພື່ອກັບຄືນໄປເຮັດວຽກທີ່ລັດຖະບານໄດ້ກຳນົດໄວ້ໃນວັນທີ 29 ກຸມພາທີ່ຜ່ານມາ.
ບາດກ້າວຕ່າງໆລວມມີການສົ່ງບັນດາເຈົ້າໜ້າທີ່ເພື່ອຢືນຢັນການຂາດວຽກຂອງຜູ້ນັດຢຸດງານຢ່າງເປັນທາງການ, ແຈ້ງໃຫ້ເຂົາເຈົ້າຮູ້ ກ່ຽວກັບ ຄວາມເປັນໄປໄດ້ໃນການລະງັບໃບອະນຸຍາດ ແລະ ໃຫ້ໂອກາດເຂົາເຈົ້າຕອບໂຕ້.
ຮອງລັດຖະມົນຕີກະຊວງສາທາລະນະສຸກ ທ່ານ ພາກ ມິນ-ຊູ ໄດ້ກ່າວໃນກອງປະຊຸມລາຍງານໃນວັນພະຫັດມື້ນີ້ວ່າ ລັດຖະບານແມ່ນຄາດວ່າຈະສຳເລັດໃນການເອົາບາດກ້າວທີ່ວ່ານັ້ນສຳລັບແພດໝໍທີ່ທຳການນັດຢຸດງານຈຳນວນນຶ່ງໃນອາທິດໜ້າ ແລະ ຈະສົ່ງແຈ້ງການໃຫ້ພວກເຂົາຊາບ ກ່ຽວກັບ ການຕັດສິນໃຈຂອງເຂົາເຈົ້າທີ່ຈະລະງັບໃບອະນຸຍາດຂອງພວກເຂົາ.
ຟໍຣັມສະແດງຄວາມຄິດເຫັນ