ເກົາຫຼີໃຕ້ຈະສົ່ງທູດພິເສດ ໄປຍັງເກົາຫຼີເໜືອໃນອາທິດໜ້າ ເພື່ອຫາລືກ່ຽວກັບການຈັດ
ແຈງ ໃນການພົບປະສຸດຍອດຄັ້ງທີ 3 ລະຫວ່າງຜູ້ນຳຂອງປະເທດທັງສອງ.
ໂຄສົກຂອງທຳນຽບປະທານາທິບໍດີເກົາຫຼີໃຕ້ ກ່າວໃນວັນສຸກມື້ນີ້ວ່າ ທູດພິເສດທີ່ບໍ່ໄດ້
ລະບຸຊື່ ຈະເດີນທາງໄປນະຄອນຫຼວງພຽງຢາງ ໃນວັນພຸດອາທິດໜ້າ.
ໂຄສົກຂອງທຳນຽບປະທານາທິບໍດີກ່າວວ່າ “ທູດພິເສດຈະຫາລືກ່ຽວກັບບັນຫາຕ່າງໆ
ໃນຂອບເຂດທີ່ກວ້າງຂວາງຮວມທັງວັນເວລາທີ່ແນ່ນອນກ່ຽວກັບການພົບປະສຸດຍອດ ລະຫວ່າງເກົາຫຼີເໜືອແລະເກົາຫຼີໃຕ້ ການເຄື່ອນໄຫວກ່ຽວກັບຄວາມສຳພັນ ລະຫວ່າງ
ເກົາຫຼີເໜືອກັບເກົາຫຼີໃຕ້ ການປົດອາວຸດນິວເຄລຍຢູ່ໃນແຫຼມເກົາຫຼີ ແລະການສ້າງຕັ້ງ
ຂັ້ນຕອນສັນຕິພາບ ໃນແຫຼມເກົາຫຼີ.”
ປະທານາທິບໍດີເກົາຫຼີໃຕ້ ທ່ານມູນ ແຈ ອິນ ແລະຜູ້ນຳເກົາຫຼີເໜືອ ທ່ານກິມ ຈົງ ອຶນ ໄດ້
ຕົກລົງໃນການພົບປະຄັ້ງປະຫວັດສາດ ທີ່ບ້ານປັນມຸນຈອມ ໃນເດືອນເມສາຜ່ານມານັ້ນ
ວ່າ ທ່ານມູນ ຈະເດີນທາງໄປຢ້ຽມຢາມນະຄອນຫຼວງພຽງຢາງໃນທ້າຍປີນີ້.
ອົງການຂ່າວຢອນຮັບລາຍງານວ່າ ເກົາຫຼີໃຕ້ໄດ້ສະເໜີທີ່ຈະສົ່ງທູດພິເສດໄປຕອນເຊົ້າ
ວັນສຸກມື້ນີ້ ໂດຍທີ່ເກົາຫຼີເໜືອ ກໍໄດ້ຮັບເອົາການສະເໜີດັ່ງກ່າວໂດຍທາງໂທລະເລກ ໃນຕອນບ່າຍຂອງມື້ວັນສຸກ.
