ລິ້ງ ສຳຫລັບເຂົ້າຫາ

ວັນສຸກ, ໒໙ ມີນາ ໒໐໒໔

ການເຈລະຈາ ມາຣາທອນ ລະຫວ່າງ ສອງເກົາຫຼີ ແກ່ຍາວ ອອກໄປຕື່ມ


ບັນດາທະຫານ ເກົາຫຼີໃຕ້ ຢືນຍາມ ປ້ອມກວດກາ ຢູ່ທີ່ ຂົວປອງດອງຊາດ ຫຼື Grand Unification Bridge ຊຶ່ງນຳໄປສູ່ບ້ານຢຸດຍິງ Panmunjom, ທາງທິດໃຕ້ ເຂດປອດທະຫານ ທີ່ແຍກເກົາຫຼີ ອອກເປັນສອງປະເທດ ໃນເມືອງ Paju, ຂອງເກົາຫຼີໃຕ້, ວັນທີ 24 ສິງຫາ 2015.
ບັນດາທະຫານ ເກົາຫຼີໃຕ້ ຢືນຍາມ ປ້ອມກວດກາ ຢູ່ທີ່ ຂົວປອງດອງຊາດ ຫຼື Grand Unification Bridge ຊຶ່ງນຳໄປສູ່ບ້ານຢຸດຍິງ Panmunjom, ທາງທິດໃຕ້ ເຂດປອດທະຫານ ທີ່ແຍກເກົາຫຼີ ອອກເປັນສອງປະເທດ ໃນເມືອງ Paju, ຂອງເກົາຫຼີໃຕ້, ວັນທີ 24 ສິງຫາ 2015.

ໃນ​ວັນ​ຈັນ​ມື້​ນີ້ ​ປະທານາທິບໍດີ ​ເກົາຫຼີ​ໃຕ້ ທ່ານ​ນາງ Park
Geun-hye ໄດ້​ຮຽກຮ້ອງ​ຢ່າງ​ເປີດ​ເຜີຍ ຕໍ່​ເກົາຫຼີ​ເໜືອ ​ໃຫ້​ແກ້​ໄ​ຂ
ບັນຫາ ​ການ​ເກາະ​ຜິດ​ຕ່າງໆ ​ເມື່ອ​ບໍ່​ດົນ​ມາ​ນີ້ ​ຊຶ່ງໃນ​ຂະນະ​ທີ່
​ການ​ເຈ​ລະ​ຈາ ລະດັບ​ສູງ ລະຫວ່າງ​ສອງ​ຝ່າຍ​ເກົາຫຼີ ດຳ​ເນີນ​ໄປ​
ຢູ່ນັ້ນ ປາກົດ​ວ່າ ບໍ່​ສາມາດ​ບັນລຸ​ ການ​ຕົກລົງ​ກັນ​ໄດ້​ ໃນທາງ​
ການ​ທູດ ​ເພື່ອຈະ​ຫລີກ​ລ່ຽງ​ສົງຄາມ​ ໃນ​ແຫຼມ​ເກົາຫຼີ.

ທ່ານນາງ Park​ເວົ້າຢູ່​ທີ່​ກອງ​ປະຊຸມຂອງ ບັນດາທີ່​ປຶກສາ ຂອງ
ປະທານາທິບໍດີ ວ່າ “ພວກ​ເຮົາ​ຕ້ອງການ​ ການ​ຂໍອະ​ໄພ​ໂທດ​
ຢ່າງ​ຈະ​ແຈ້ງ ​ແລະ ມາດ​ຕະການ​ຕ່າງໆ ​ເພື່ອ​ປ້ອງ​ກັນ​ເຫດການ​ທີ່​ເກີດ​ຂຶ້ນ​ ຊ້ຳ​ແລ້ວ​ຊ້ຳອີກ ຂອງ​ການ​ເກາະ​ຜິດ​ເຫຼົ່ານີ້ ​ແລະ ພາວະ​ຄວາມ​ເຄັ່ງ​ຕຶງ. ຖ້າ​ບໍ່​ດັ່ງນັ້ນ ລັດຖະບານ​ນີ້ ຈະ​ເອົາ​ບາດກ້າວ​ຕ່າງໆ​ທີ່​ເໝາະ​ສົມ ​ແລະ ສືບ​ຕໍ່ ການໂຄສະນາ ກະຈາຍສຽງ ດ້ວຍລຳ​ໂພງ​ໃຫຍ່ ​ຂອງ​ຕົນ​.”

ການ​ເຈລະຈາ​ຂັ້ນສຸກ​ເສີນ ​ໄດ້​ຈັດຂຶ້ນ ທີ່ບ້ານ​ຢຸດ​ຍິງ Panmunjom ຢູ່​ຊາຍ​ແດນ​ຂອງ​ທັງ​
ສອງ​ປະ​ເທດ ຊຶ່ງ​ເລີ້ມ​ຕົ້ນຂຶ້ນ​ເມື່ອ ວັນ​ເສົາ​ຜ່ານ​ມາ ບໍ່​ດົນຫຼັງຈາກ ​ວັນ​ເສັ້ນຕາຍທີ່ພຽງ​ຢາງ​
ໄດ້​ປະ​ກາດ​ອອກ​ໄປ​ນັ້ນ ​ໄດ້ໝົດ​ອາຍຸ​ລົງ ​ເພື່ອ​ໃຫ້ໂຊ​ລ​ຢຸດເຊົາການໂຄສະນາກະຈາຍສຽງ
​ຂ້າມ​ຊາຍ​ແດນ​ເຂົ້າ​ໄປ​ຍັງ​ເກົາ​ຫຼີເໜືອ ຫຼືບໍ່​ດັ່ງນັ້ນ ຈະ​ປະ​ເຊີນ​ກັບ​ການ​ໂຈມ​ຕີ​ທາງ​ທະຫານ.

ການ​ເຈລະຈາ​ ມາ​ເຖິງ​ເວລາ​ນີ້ ຍັງ​ສືບ​ຕໍ່​ໄປ​ເປັນ​ມື້​ທີ 3 ​ແລ້ວ ​ໂດຍ​ປາດ​ສະ​ຈາກ​ສັນຍານ​ໃດໆ​ ຂອງ​ຄວາມ​ກ້າວໜ້າ​ເລີຍ. ທັງ​ສອງ​ຝ່າຍ ຕ່າງກໍ​ມີ​ຜູ້ຕາງໜ້າ ​ໂດຍເຈົ້າໜ້າ​ທີ່​ທະຫານ ລະດັບສູງ ​ແລະ ນັກ​ການ​ທູດ.

ຊາວເກົາຫຼີເໜືອ ພາກັນ ສະໝັກ ເຂົ້າຮ່ວມກອງທັບບົກ ທ່າມກາງຄວາມເຄັ່ງຕຶງ ດ້ານການເມືອງ ກັບເກົາຫຼີໃຕ, ຢູ່ໃນຮູບພາບນີ້ ທີ່ເຜີຍແຜ່ໂດຍ ອົງການຂ່າວເກົາຫຼີເໜືອ (KCNA) ໃນພຽງຢາງ, ວັນທີ 23 ສິງຫາ 2015.
ຊາວເກົາຫຼີເໜືອ ພາກັນ ສະໝັກ ເຂົ້າຮ່ວມກອງທັບບົກ ທ່າມກາງຄວາມເຄັ່ງຕຶງ ດ້ານການເມືອງ ກັບເກົາຫຼີໃຕ, ຢູ່ໃນຮູບພາບນີ້ ທີ່ເຜີຍແຜ່ໂດຍ ອົງການຂ່າວເກົາຫຼີເໜືອ (KCNA) ໃນພຽງຢາງ, ວັນທີ 23 ສິງຫາ 2015.

ເລຂາທິການ​ໃຫຍ່ ອົງການ​ສະຫະ​ປະຊາ​ຊາດ ທ່ານ Ban Ki-moon ອະດີດ​ລັດຖະມົນຕີ ຕ່າງປະ​ເທດ ​ເກົາຫຼີ​ໃຕ້ ຮຽກຮ້ອງໃຫ້​ທັງ​ສອງ​ຝ່າຍ ​ເພີ້​ມຄວາມ​ພະຍາຍາມຂອງ​ພວກ​ຕົນ
ຂຶ້ນ​ເປັນ “ສອງເທົ່າ” ​ເພື່ອ​ໃຫ້​ບັນລຸ​ການ​ປານີ​ປານ​ອມກັນ.

​ໃນ​ຂະນະ​ດຽວ​ກັນນັ້ນ ບັນດາ​ເຈົ້າໜ້າ​ທີ່ ບໍ່​ໄດ້​ໃຫ້​ຄຳ​ເຫັນ​ໃດໆ ພຽງ​ແຕ່​ກ່າວ​ວ່າ ການ​
ເຈ​ລະ​ຈາ ​ແມ່ນ “​ເຄັ່ງ​ຄຽດ” ຕ່າງຝ່າຍ​ປາກົດ​ວ່າ ບໍ່​ຍອມປານີ​ປານ​ອມກັນ​ ກ່ຽວ​ກັບ​ຄວາມ​
ຮຽກຮ້ອງຕ້ອງການຂອງ​ຕົນ​ ​ທີ່​ເປີດ​ເຜີຍ​ໄປ​ແລ້ວນັ້ນ ​ເພື່ອ​ຍຸດຕິ​ວິ​ກິດ​ການ​ໃນ​ເວລາ​ນີ້.

ຫຼັງຈາກ​ທີ່ໄດ້​ກ່າວ​ຫາ ​ພຽງ​ຢາງ​ ສຳ​ຫລັບ​ການວາງ​ລະ​ເບີດ​ຝັງດິນ ​ໃສ່ຟາກ​ເບື້ອ​ງ​ເຂດຊາຍ​
ແດນ ​ບ່ອນ​ປອດ​ທະຫານ ຫຼື (DMZ) ຂອງເກົາຫຼີ​ໃຕ້ນັ້ນ ຊຶ່ງ​ໄດ້​ເຮັດ​ໃຫ້​ທະຫານ​ສອງ​ຄົນ ​
ໄດ້​ຮັບ​ບາດ​ເຈັບ ​ແລະ ​ໂຊ​ລ​ໄດ້ເລີ້ມທຳ​ການໂຄສະນາກະຈາຍສຽງ ​ຂ້າມ​ຊາຍ​ແດນ​ເຂົ້າ​ໄປ​
ຍັງບໍລິ​ເວນເຂດ​ຊາຍ​ແດນຕິດ​ກັບເກົາ​ຫຼີເໜືອ ເມື່ອ​ບໍ່ດົນ​ມານີ້ ​ຄືນ​ອີກ​ເປັນຄັ້ງທຳ​ອິດ ​ໃນ​
ໄລຍະ 10 ປີຜ່ານມາ.

ມີລາຍ​ງານ​ວ່າ ​ເມື່ອ​ອາທິດ​ແລ້ວ​ນີ້ ທັງ​ສອງ​ເກົາຫຼີ ​ໄດ້​ຍິງ​ປືນ​ໃຫຍ່​ເຂົ້າ​ໃສ່​ກັນ ຢູ່​ໃນ​ເຂດ DMZ
​ໃກ້​ກັບ ສະຖານ​ທີ່​ຕັ້ງຂອງ​ລຳ​ໂພງ​ໃຫຍ່.

Koreas Talks
please wait
Embed

No media source currently available

0:00 0:02:03 0:00

XS
SM
MD
LG