ເຈົ້າໜ້າທີ່ຕຳຫລວດເກົາຫຼີໃຕ້ ກ່າວວ່າ ຕົນໄດ້ພົບສົບຂອງ
ນັກທຸລະກິດ ທີ່ຫລົບລີ້ໜີກົດໝາຍຂອງເກົາຫຼີໃຕ້ ທີ່ມີສ່ວນ
ກ່ຽວພັນກັບເຮືອໂດຍສານຂ້າມຟາກ ທີ່ໄດ້ປະສົບໄພພິບັດ
ທີ່ເຮັດໃຫ້ປະມານ 300 ຄົນເສຍຊີວິດ ໃນເດືອນເມສາ ທີ່
ຜ່ານມາ.
ເຈົ້າໜ້າທີ່ຕຳຫລວດ ກ່າວໃນວັນອັງຄານມື້ນີ້ ວ່າ ສົບທີ່ເນົ່າ
ເປື່ອຍແລ້ວ ຂອງນັກທຸລະກິດ Yoo Byung-eun ໄວ 73 ປີ
ໄດ້ພົບນອນ ຢູ່ໃນສວນໝາກພລຳ ທີ່ເມືອງ Suncheon
ໃນພາກໃຕ້ຂອງປະເທດ ເມື່ອວັນທີ 12 ມິຖຸນາຜ່ານມານີ້.
ຊາກສົບດັ່ງກ່າວ ເກືອບບໍ່ສາມາດເບິ່ງອອກໄດ້ ແຕ່ຕຳຫລວດກ່າວວ່າ ການກວດສອບ
ດ້ວຍ DNA ຊຶ່ງໃຊ້ເວລາຫລາຍໆອາທິດ ໄດ້ຢັ້ງຢືນວ່າ ສົບນັ້ນແມ່ນຂອງທ່ານ Yoo.
ລາຍມື ກໍໃຫ້ການຢັ້ງຢືນເຊັ່ນດຽວກັນວ່າ ສົບນັ້ນແມ່ນຂອງຜູ້ກ່ຽວແທ້.
ຄະນະສືບສວນສອບສວນປະຕິເສດທີ່ຈະໃຫ້ຢັ້ງຢືນວ່າຜູ້ກ່ຽວໄດ້ຕາຍຍ້ອນການຄາດ
ຕະກຳ ຫຼືການຂ້າຕົວຕາຍ. ແລະໄດ້ພົບເຫັນແກ້ວເຫຼົ້າເປົ່າຫຼາຍໆແກ້ວ ໃກ້ກັບສົບຂອງ
ມະຫາເສດຖີດັ່ງກ່າວ ຊຶ່ງແຕ່ງກາຍ ດ້ວຍເກີບ ແລະ ເສື້ອຄຸມ ລາຄາແພງຈາກອີຕາລີ.
ທ່ານ Yoo ໄວ 73 ປີ ເປັນເຈົ້າຂອງ ບໍລິສັດ ຂົນສົ່ງທາງທະເລ Chonghaejin ທີ່ຄວບຄຸມ
ເຮືອໂດຍສານຂ້າມຟາກ Sewol ຊຶ່ງໄດ້ປະສົບອຸບັດເຫດຫຼົ້ມໃນເດືອນເມສາຜ່ານມານີ້.
ບັນດາໄອຍາການສົງໄສວ່າ ການສໍ້ໂກງຂອງບໍລິສັດ ແລະການຂາດມາດຕະຖານ ດ້ານ
ຄວາມປອດໄພ ເຮັດໃຫ້ເຮືອໂດຍສານຂ້າມຟາກດັ່ງກ່າວຫຼົ້ມ.
