ເກົາຫຼີໃຕ້ ໄດ້ຍົກລະດັບເຕືອນໄພສຳລັບໄວຣັສໂຄໂຣນາຂຶ້ນເປັນລະດັບສູງສຸດ.
ປະທານາທິບໍດີ ເກົາຫຼີໃຕ້ ທ່ານ ມູນ ແຈ ອິນ ໄດ້ຮຽກຮ້ອງບັນດາເຈົ້າໜ້າທີ່ບໍ່ໃຫ້ລັງເລໃຈ ທີ່ຈະເອົາມາດຕະການຮຸນແຮງທີ່ບໍ່ເຄີຍມີມາກ່ອນ” ເພື່ອຄວບຄຸມການລະບາດ.
ນາຍົກລັດຖະມົນຕີ ເກົາຫຼີໃຕ້ ໄດ້ກ່າວວ່າ ໄວຣັສໂຄໂຣນາຢູ່ໃນປະເທດຂອງທ່ານ ໄດ້ກ້າວເຂົ້າສູ່ຂັ້ນ “ທີ່ຮ້າຍແຮງກວ່າເກົ່າ” ໃນຂະນະທີ່ກໍລະນີໃໝ່ຂອງເຊື້ອໂຣກດັ່ງກ່າວໄດ້ຖືກລາຍງານໃນວັນອາທິດມື້ນີ້.
ນາຍົກລັດຖະມົນຕີ ຈຸງ ຊາຍ ຄີຢຸນ ໄດ້ກ່າວຄຳປາໄສອອກໂທລະພາບແຫ່ງຊາດໃນແລງວັນເສົາວານນີ້. ທ່ານໄດ້ກ່າວວ່າ ລັດຖະບານ ໂຊລ ຈະທຳຄວາມພະຍາຍາມສຸດຂີດ ເພື່ອຄວບຄຸມການແຜ່ລະບາດຂອງເຊື້ອໂຣກນີ້ຕໍ່ໄປ.
ສູນກາງເພື່ອການຄວບຄຸມ ແລະ ປ້ອງກັນເຊື້ອໂຣກຂອງ ເກົາຫຼີ ໄດ້ກ່າວວ່າ ມີລາຍງານການຕິດເຊື້ອໃໝ່ 123 ກໍລະນີໃນວັນອາທິດມື້ນີ້, 113 ກໍລະນີແມ່ນໃນເມືອງ ແດກູ ທີ່ເປັນເມືອງໃຫຍ່ສຸດອັນດັບສີ່ ແລະ ຂົງເຂດທີ່ຢູ່ອ້ອມແອ້ມ. ເກົາຫຼີໃຕ້ ຕອນນີ້ມີລາຍງານການຕິດໄວຣັສໂຄນາ 556 ກໍລະນີ.
ພ້ອມກັນນັ້ນໃນວັນເສົາວານນີ້, ກະຊວງການຕ່າງປະເທດ ສະຫະລັດ ໄດ້ອອກຄຳແນະນຳການເດີນທາງໄປ ຍີ່ປຸ່ນ ແລະ ເກົາຫຼີໃຕ້ ໃນລະຫວ່າງການລະບາດຂອງໄວຣັສໂຄໂຣນາ, ໂດຍຮຽກຮ້ອງບັນດານັກທ່ອງທ່ຽວໃຫ້ “ມີການລະມັດລະວັງເພີ່ມຂຶ້ນ” ຖ້າເດີນທາງໄປປະເທດທີ່ວ່ານັ້ນ.
ກະຊວງການຕ່າງປະເທດເວົ້າວ່າ ດ້ວຍການເຕືອນລະດັບທີສອງ, ບັນດານັກເດີນທາງຕ້ອງຫຼີກລ່ຽງການພົວພັນກັບຄົນບໍ່ສະບາຍ, ແລະ ໃຫ້ທຳການອະນາໄມພື້ນຖານ, ເຊັ່ນລ້າງມື, ເພື່ອປ້ອງກັນການຕໍ່ການຕິດຕໍ່ເຊື້ອໂຣກນັ້ນ.
ຈີນ ໄດ້ລາຍງານການຕິດເຊື້ອໃໝ່ 648 ກໍລະນີໃນວັນອາທິດມື້ນີ້, ເປັນຈຳນວນທັງໝົດ 76,936 ກໍລະນີ. ເຂົາເຈົ້າເວົ້າວ່າ ອີກ 97 ຄົນໄດ້ເສຍຊີວິດ, ເຮັດໃຫ້ຈຳນວນເສຍຊີວິດສູງສຸດໃນປະເທດດັ່ງກ່າວເປັນ 2,442 ຄົນ.
ຢູ່ນອກປະເທດ ຈີນ, ມີອີກ 1,200 ຄົນໄດ້ຕິດໄວຣັສດັ່ງກ່າວ ແລະ ຫຼາຍກວ່າ ສິບຄົນໄດ້ເສຍຊີວິດ.