ທາງດ້ານເກົາຫຼີໃຕ້ນັ້ນ ກໍໄດ້ກ່າວໃນວັນອັງຄານມື້ນີ້ວ່າ
ຕົນບໍ່ໄດ້ມີຄວາມສົນໃຈທີ່ຈະເອົາອາວຸດນີວເຄລຍຂອງ
ສະຫະລັດ ມາຕິດຕັ້ງໃນດິນແດນຂອງຕົນຄືນໃໝ່ ເຖິງ
ແມ່ນວ່າ ໄດ້ມີການສະແດງຄວາມເຫັນໃນທໍານອງນັ້ນ
ຈາກລັດຖະມົນຕີປ້ອງກັນປະເທດກ່ອນໜ້ານີ້ ກໍຕາມ.
ເມື່ອຖືກຖາມໂດຍສະມາຊິກສະພາທ່ານນຶ່ງໃນມື້ວານນີ້ວ່າ
ລັດຖະບານອາດຈະພິຈາລະນາເລື້ອງການນໍາເອົາອາວຸດ
ນີວເຄລຍຂອງສະຫະລັດ ມາຕິດຕັ້ງຄືນໃໝ່ ຫລືບໍ່ນັ້ນ
ທ່ານ Kim Tae-young ລັດຖະມົນຕີປ້ອງກັນປະເທດ
ໄດ້ຕອບກັບໄປວ່າ ທາງການຈະທົບທວນ ເລື່ອງທີ່ທ່ານ
ຖາມມານັ້ນ.
ແຕ່ບັນດາໂຄສົກຂອງທາງການໄດ້ພາກັນແກ້ຄວາມເຫັນດັ່ງ
ກ່າວ ໃນວັນອັງຄານມື້ນີ້ ໂດຍເວົ້າວ່າ ພວກເຂົາເຈົ້າຍັງຈະ
ສືບຕໍ່ໝາຍໝັ້ນ ຕໍ່ການເຮັດໃຫ້ແຫລມເກົາຫຼີປອດອາວຸດ
ນີວເຄລຍຢູ່.
ບັນຫານີ້ແມ່ນໄດ້ມີຂຶ້ນ ຫຼັງຈາກທີ່ທາງເກົາຫຼີເໜືອໄດ້ພານັກວິທະຍາສາດຂອງສະຫະລັດ
ຄົນນຶ່ງ ໄປເບິ່ງສະຖານອັນທັນສະໄຫມທີ່ໃຊ້ກັ່ນທາດຢູເຣນຽມ ທີ່ເກົາຫລີເໜືອເວົ້າວ່າ
ມີເຄື່ອງກັ່ນຫລືແຍກທາດຢູເຣນຽມທີ່ໃຊ້ການໄດ້ເຖິງ 2,000 ເຄື່ອງນັ້ນ ຊຶ່ງທາດຢູເຣນຽມ
ທີ່ກັ່ນໃໝ່ໄດ້ຮັບການເສີມຄຸນນະພາບນັ້ນ ຈະນໍາໄປໃຊ້ເຮັດອາວຸດນີວເຄລຍໄດ້.
ສະຫະລັດ ໄດ້ຖອນອາວຸດນີວເຄລຍຂອງຕົນອອກໄປຈາກເກົາຫຼີໃຕ້ນັບຕັ້ງແຕ່ປີ 1991 ພຸ້ນ.
