ທ່ານ Kim Tae-young ລັດຖະມົນຕີປ້ອງກັນປະເທດເກົາຫລີໃຕ້ ກ່າວວ່າ ລະເບີດຕໍປີໂດ ໜ້າຈະເປັນສາເຫດຂອງການລະເບີດທີ່ຈົມ ເຮືອລົບລຳນຶ່ງ ຂອງເກົາຫລີໃຕ້ ໄກ້ໆກັບຊາຍແດນທີ່ເຄັ່ງຕຶງກັບເກົາ ຫລີເໜືອ ເມື່ອເດືອນແລ້ວນີ້. ທ່ານ Kim ບອກພວກນັກຂ່າວໃນວັນ ອາທິດມື້ນີ້ວ່າ ທ່ານເຊື່ອ ວ່າຄື້ນແຮງກະທົບແລະຟອງແກ໊ສທີ່ມີແຮງກົດດັນສູງ ຂອງລະເບີດຕໍປີໂດຂະໜາດໜັກນັ້ນ ແມ່ນສາເຫດທີ່ໜ້າເປັນໄປໄດ້ຫລາຍທີ່ສຸດ ຂອງຄວາມ ຫາຍະນະຄັ້ງນີ້.
ຢ່າງໃດກໍຕາມ ອົງການຂ່າວຝຣັ່ງກໍໄດ້ອ້າງຄຳເວົ້າຂອງທ່ານຄິມ ທີ່ກ່າວວ່າ ຄວາມອາດເປັນໄປໄດ້ອື່ນໆນັ້ນ ກໍຍັງຢູ່ພາຍໃຕ້ການສຶກສາພິຈາລະນາກັນຢູ່ ເຊັ່ນກັນ.
ພວກສືບສວນກ່າວວ່າ ມີຫລັກຖານທີ່ສະແດງວ່າ ເຮືອລາດຕະເວນ ທີ່ມີນ້ຳໜັກ 1,200 ໂຕນລຳນັ້ນ ລະເບີດຂຶ້ນແລະຈົມນ້ຳລົງ ຍ້ອນແຮງກະທົບ ທີ່ຮຸນແຮງຈາກທາງນອກ. ລັດຖະບານເກົາຫລີໃຕ້ໄດ້ຍັບ ຍັ້ງໃຈ ຍັງບໍ່ຖິ້ມໂທດໃສ່ເກົາຫລີເໜືອຍ້ອນເຫດຮ້າຍດັ່ງກ່າວເທື່ອ ຈົນກວ່າພວກຊ່ຽວ ຊານໄດ້ທຳການສຶບສວນໃຫ້ໄດ້ຫລັກຖານທີ່ແນ່ນອນ ເສຍກ່ອນ. ທາງພຽງຢາງກໍໄດ້ປະຕິເສດວ່າ ຕົນບໍ່ໄດ້ມີສ່ວນພົວພັນ ໃດໆກັບເຫດການນີ້.
