ນຶ່ງໃນບັນດາໂຮງໝໍທີ່ໃຫຍ່ທີ່ສຸດ ແລະ ມີຊື່ສຽງໂດ່ງດັງທີ່ສຸດ
ໃນນະຄອນຫຼວງໂຊລ ໄດ້ງົດການປະຕິບັດງານບາງສ່ວນ
ຫຼັງຈາກ ພະຍາດລະບົບຫາຍໃຈອັກເສບຮ້າຍແຮງ ຈາກ
ພາກຕາເວັນອອກກາງ ຫລື MERS ໄດ້ລະບາດ ຢູ່ໃນ
ສະຖານທີ່ດັ່ງກ່າວ.
ປະທານໂຮງໝໍ Samsung ທ່ານ Song Jae-hoon ກ່າວ
ໃນກອງປະຊຸມຖະແຫລງຂ່າວ ທີ່ຖ່າຍທອດທາງໂທລະພາບ
ໃນວັນອາທິດມື້ນີ້ ວ່າ ທາງໂຮງໝໍ ຈະໂຈະການຜ່າຕັດ ທີ່ບໍ່
ສຸກເສີນທັງໝົດ ແລະ ຈະບໍ່ຮັບເອົາຄົນປ່ວຍໃໝ່ອີກ. ທ່ານ
ກ່າວວ່າ ຈະບໍ່ອະນຸຍາດໃຫ້ຄົນມາຢ້ຽມ ຢາມ ແລະ ກ່າວຕື່ມວ່າ
ທ່ານຈະຕັດສິນ ໃນວັນທີ 24 ມີຖຸນາ ວ່າ ຈະສືບຕໍ່ງົດການປະຕິບັດງານດັ່ງກ່າວນັ້ນຕໍ່ໄປ
ຫຼືບໍ່.
ຂ່າວດັ່ງກ່າວ ມີຂຶ້ນໃນຂະນະທີ່ ກະຊວງສາທາລະນະສຸກ ໄດ້ລາຍງານ ກ່ຽວກັບເຈັດ
ກໍລະນີໃໝ່ ຂອງພະຍາດ MERS ຊຶງ 4 ກໍລະນີ ແມ່ນຢູ່ໃນໂຮງໝໍ Samsung. ນຶ່ງໃນ
ຈຳນວນພວກສົງໄສວ່າ ຕິດພະຍາດນັ້ນ ແມ່ນນັກທຸລະກິດຊາວເກົາຫຼີໃຕ້ ທີ່ໄດ້ເຂົ້າໄປ
ຮັບການປິ່ນປົວ ໃນວັນເສົາວານນີ້ ໃນນະຄອນຫຼວງ Bratislava ປະເທດສະໂລວາເກຍ.
ທ່ານ Jeong Eun-kyeng ຈາກສູນຄວບຄຸມ ແລະ ປ້ອງກັນພະຍາດເກົາຫຼີໃຕ້ ກ່າວວ່າ
“ພວກເຮົາໄດ້ຮັບການແຈ້ງໃຫ້ຊາບ ເຖິງສະຖານະການດັ່ງກ່າວແລ້ວ ແລະ ພວກ
ເຮົາແມ່ນຍັງຢູ່ໃນຂັ້ນຕອນຊອກຫາວ່າ ແມ່ນຫຍັງເກີດຂຶ້ນ. ຍັງມີຈຸດສູນກາງຕ່າງໆ
ເຊັ່ນວ່າ ອົງການອະນາໄມໂລກ ຫຼື WHO ເຊິ່ງໄດ້ກຳນົດໄວ້ໃນປະເທດອື່ນໆ.
ພວກເຮົາຈະພະຍາຍາມ ຊອກຫາວ່າ ແມ່ນຫຍັງເກີດຂຶ້ນແທ້ ດ້ວຍການແລກປ່ຽນ
ຂໍ້ມູນຮ່ວມກັນ ຜ່ານຈຸດສູນກາງດັ່ງກ່າວເຫຼົ່ານັ້ນ.”
ຄະນະນັກຊ່ຽວຊານຈຸນຶ່ງຂອງ WHO ກ່າວໃນວັນເສົາວານນີ້ ວ່າ ເຖິງແມ່ນວ່າ ຕົວເລກຂອງ ການຕິດແປດ ພະຍາດ MERS ທີ່ຫຼຸດລົງກໍຕາມ ແຕ່ການລະບາດ ແມ່ນ “ກວ້າງຂວາງ ແລະ ສະລັບຊັບຊ້ອນ” ແລະ ຄາດກັນວ່າ ຈະມີຫຼາຍກໍລະນີເພີ້ມຕື່ມອີກ.
