ທ່ານ ພັນກິມູນ ເລຂາທິການໃຫຍ່ສະຫະປະຊາຊາດຮຽກຮ້ອງໃຫ້ເກົາຫລີໃຕ້ຫລິ້ນບົດບາດຫລາຍຂຶ້ນໃນກິດຈະການຂອງໂລກນັ້ນ.
ຫົວໜ້າອົງການສະຫະປະຊາຊາດໄດ້ ເດີນທາງໄປຮອດກຸງໂຊນໃນວັນອັງຄານມື້ນີ້ໃນການຢ້ຽມຢາມບ້ານເກີດເມືອງນອນຂອງທ່ານເປັນຄັ້ງທໍາອິດນັບແຕ່ໄດ້ຖືກເລືອກຕັ້ງໃຫ້ດໍາລົງຕໍາແໜ່ງເປັນສະໄໝທີສອງຕື່ມອີກ 5 ປີນັ້ນ. ທ່ານຈະທໍາການພົບປະກັບປະທານາທິບໍດີ Lee Myung-bak ແລະເຈົ້າໜ້າທີ່ຂັ້ນສູງອື່ນໆ ແລະທໍາການຢ້ຽມຢາມເມືອງ Eumseong ບ້ານເກີດເມືອງນອນຂອງທ່ານໃນເຂດຊົນນະບົດນັ້ນນໍາ.
ທ່ານພັນກິມູນ ກ່າວໃນຕອນເດີນທາງໄປຮອດສະໜາມບິນ Gimpo ຂອງກຸງໂຊນ ວ່າທ່ານຢາກທໍາການໂອ້ລົມສົນທະນາກ່ຽວກັບວ່າ ເຮັດວິທີໃດ ເກົາຫລີໃຕ້ຈຶ່ງສາມາດໝຸນໃຊ້ຄວາມອຸດົມຮັ່ງມີໃໝ່ທີ່ໄດ້ຮັບມາໃໝ່ໆ ກັບການພັດທະນາຂອງຕົນນັ້ນ ເພື່ອສ້າງຜົນປະໂຫຍດໃຫ້ປະເທດອື່ນໆ. ທ່ານກ່າວຕື່ມວ່າ ທ່ານຈະຮຽກຮ້ອງໃຫ້ເກົາຫລີໃຕ້ຫລິ້ນບົດບາດຫລາຍຂຶ້ນໃນກິດຈະການຂອງໂລກນັ້ນ.
ທ່ານພັນກິມູນຍັງໃຫ້ຂໍ້ສັງເກດເຊ່ນກັນວ່າ ປີນີ້ເປັນຂີດໝາຍຄົບຮອບ 20 ປີຂອງການເຂົ້າຮ່ວມໃນອົງການສະຫະປະຊາຊາດຂອງເກົາຫລີໃຕ້ ໃນຖານະເປັນປະເທດສະມາຊິກນຶ່ງທີ່ມີສິດໂດຍເຕັມ.
ໃນຂະນະທີ່ທໍາການຢ້ຽມຢາມເກົາຫລີໃຕ້ນັ້ນ ທ່ານພັນກິມູນ ຈະກ່າວປາໄສຫລາຍຄັ້ງຕໍ່ພວກນັກການທູດໃນທ້ອງຖິ່ນ ນັກສຶກສາມະຫາວິທະຍາໄລແລະພວກຜູ້ນໍາທຸລະກິດ. ນອກນັ້ນທ່ານຍັງຈະເຂົ້າຮ່ວມໃນການໄຂງານສະແດງຮູບພາບ ທີ່ເວົ້າເຖິງເລື້ອງບັນຫາຜູ້ຄົນທ່ີທຸກຈົນທີ່ສຸດໃນໂລກ.
