ນາງງາມປະເທດອາຟຣິກາໃຕ້ ໄວ 22 ປີ ໄດ້ຮັບໄຊຊະນະ
ໃນການປະກວດນາງງາມໂລກ ຄັ້ງທີ 64 ປະຈຳປີ 2014.
ນາງສາວ Rolene Strauss ນັກສຶກສາແພດ ໄດ້ຖືກຄັດ
ເລືອກເປັນຜູ້ຊະນະເລີດຂອງປີນີ້ ຢູ່ໃນງານປະກວດນາງງາມ
ໂລກ ທີ່ນະຄອນຫລວງລອນດອນ ຂອງອັງກິດ ເມື່ອຄືນວັນ
ອາທິດວານນີ້. ປະເມີນກັນ ວ່າ ມີຫຼາຍລ້ານຄົນໃນທົ່ວໂລກ
ພາກັນຕິດຕາມເບິ່ງ ງານປະກວດດັ່ງກ່າວທາງໂທລະພາບ.
ນາງງາມຮັງກາຣີ Edina Kulcsar ໄດ້ເປັນຮອງນາງງາມໂລກ
ຜູ້ທີໜຶ່ງ ແລະ ນາງງາມສະຫະລັດ Elizabeth Safrit ເປັນຮອງ
ຜູ້ທີສອງ. ຫຼາຍກວ່າ 120 ປະເທດໄດ້ສົ່ງນາງງາມເຂົ້າຮ່ວມແຂ່ງຂັນ.
ການປະກວດນາງງາມໂລກໃນປີນີ້ ໄດ້ປະສົບກັບໂສກນາດຕະກຳ ຍ້ອນການຄາດຕະກຳ
ນາງງາມຮອນດູຣັສ Maria Jose Alvarado ທີ່ຖືກຍິງຕາຍ ພ້ອມກັນກັບເອື້ອຍຂອງນາງ
ເມື່ອເດືອນແລ້ວນີ້. ເຈົ້າໜ້າທີ່ຕຳຫລວດ ສົງໄສຊາຍຊູ້ ຂອງຜູ້ເປັນເອື້ອຍວ່າ ເປັນຜູ້ຍິງ
ເອື້ອຍນ້ອງຄູ່ນີ້ ຫຼັງຈາກທີ່ໄດ້ເຫັນແຟນຂອງຕົນ ເຕັ້ນລຳກັບຊາຍອີກຄົນນຶ່ງ ຢູ່ໃນງານພາຕີ້
ແຫ່ງໜຶ່ງ.
ນາງງາມໂລກຄົນໃໝ່ ມີແຜນທີ່ຈະເດີນທາງໄປຍັງປະເທດຮອນດູຣັສ ເພື່ອໄປຊ່ອຍສ້າງ
ໂຮງຮຽນຫຼັງນຶ່ງ ເປັນກຽດແກ່ສອງເອື້ອຍນ້ອງ ທີ່ຖືກຄາດຕະກຳນັ້ນ.
