ຜູ້ສະໝັກພັກ Republican ທີ່ຄາດວ່າຈະໄດ້ຮັບການສະເໜີຊື່ແຕ່ງຕັ້ງເປັນຕົວແທນ ຂອງພັກເພື່ອແຂ່ງຂັນເຂົ້າຊີງເອົາຕຳແໜ່ງປະທານາທິບໍດີສະຫະລັດ ທ່ານ Donald Trump ໄດ້ຫລຸດຈຳນວນບຸກຄົນທີ່ທ່ານຈະເລືອກເອົາມາເປັນຮອງປະທານາທິບໍດີ ຮ່ວມກັບທ່ານແລະມີແຜນການຈະປະກາດກ່ຽວກັບການຄັດເລືອກດັ່ງກ່າວຕໍ່ສາທາ ລະນະຊົນໃນວັນສຸກມື້ອື່ນນີ້.
ທ່ານ Trump ກ່າວຜ່ານທາງ Twitter ວ່າ ທ່ານຈະປະກາດໃນເວລາ 11 ໂມງເຊົ້າຂອງ ວັນສຸກມື້ອື່ນ ທີ່ນະຄອນນິວຢອກ.
ຮວມຢູ່ໃນພວກທີ່ມີທ່າທາງວ່າຈະຖືກເລືອກນັ້ນ ກໍມີຜູ້ປົກຄອງລັດ Indiana ທ່ານ Mike Pence ຜູ້ຊຶ່ງໄດ້ປະກົດຕົວໃນການຫາລາຍໄດ້ຮ່ວມກັບທ່ານ Trump ໃນວັນອັງຄານຜ່ານມານີ້ ອະດີດປະທານສະພາຕ່ຳ ທ່ານ Newt Gingrich ຫຼືບໍ່ ກໍຜູ້ປົກຄອງລັດ New Jersey ທ່ານ Chris Christie. ທ່ານ Christie ຜູ້ຊຶ່ງຄັ້ງນຶ່ງເຄີຍເປັນຜູ້ສະໝັກຂອງ ພັກ Republican ແຂ່ງກັບທ່ານ Trump ແລະຕໍ່ມາກໍໄດ້ໃຫ້ການໜຸນຫຼັງ ແກ່ນັກທຸລະກິດພັນລ້ານ ຫຼັງຈາກທີ່ໄດ້ຖອນຕົວອອກຈາກການເລືອກຕັ້ງຂັ້ນຕົ້ນໃນຕົ້ນປີນີ້.
ແຫຼ່ງຂ່າວຫຼາຍກະແສ ທີ່ຮວມມີ U.S News ແລະ World Report ແລະ Politico ຕ່າງລະບຸວ່າ ການແຂ່ງຂັນນີ້ແມ່ນລະຫວ່າງທ່ານ Gingrich ແລະທ່ານ Pence.
ທ່ານ Paul Manafort ປະທານການໂຄສະນາຫາສຽງຂອງ ທ່ານ Trump ແມ່ນຊຸກຍູ້ໃຫ້ເລືອກເອົາທ່ານ Pence ອິງຕາມວາລະສານ U.S News. ແຫລ່ງຂ່າວຈາກການໂຄສະ ນາຫາສຽງຂອງ ທ່ານ Trump ແຈ້ງໃຫ້ວາລະສານນີ້ຊາບວ່າ ອະດີດສະມາຊິກສະພານັ້ນແມ່ນເຫັນວ່າເຊື່ອຖືໄດ້ ແລະເປັນທີ່ນັບໜ້າຖືຕາ ພ້ອມທັງເປັນ “ຜູ້ທີ່ພວກເຂົາເຈົ້າສາມາດຄວບຄຸມໄດ້.”
ເຖິງຢ່າງໃດກໍຕາມ ບັນດາລູກໆຂອງທ່ານ Trump ຮວມທັງລູກເຂີຍ ສາມີຂອງນາງ Ivanka ທ່ານ Jared Kushner ເບີ່ງຄືວ່າຈະເລືອກເອົາທ່ານ Gingrich ອິງຕາມລາຍງານຂ່າວຂອງແວັບໄຊຕ໌ Politico ທີ່ໄດ້ເກັບກຳເອົາຂໍ້ມູນຈາກຫຼາຍໆແຫ່ງ ທີ່ພົວພັນໃນການພິຈາ ລະນາຢ່າງຮອບຄອບກ່ຽວກັບການຫາສຽງນີ້.
ນອກນັ້ນ ຜູ້ສະໝັກສັງກັດພັກ Republican ຍັງກ່າວຍົກຍ້ອງທ່ານ Christie ທາງໂທ ລະພາບ Fox News. ທ່ານ Trump ແລະທ່ານ Christie ແມ່ນມີປະຫວັດອັນຍາວນານຮ່ວມກັນ.
ອ່ານຂ່າວນີ້ເພີ້ມຕື່ມເປັນພາສາອັງກິດ
