ຜົນງານແອນິເມຊັ້ນ ເຈາະເປົ້າໝາຍຄົນເບິ່ງທີ່ມາກັນທັງຄອບຄົວ ຍັງຄົງຢຶດກຳລັງຢ່າງໜຽວແໜ້ນໃນສອງອັນດັບຕົ້ນຂອງຮູບເງົາທີ່ສ້າງລາຍໄດ້ສູງສຸດປະຈຳສັບປະດາໃນສະຫະລັດ ຕໍ່ໄປ ອີງຕາມລາຍງານຂອງອົງການຂ່າວເອພີ.
ໂຕລະຄອນສີຟ້າສົດໃສຂວັນໃຈນັກຫຼິ້ນເກມທີ່ລົງຈໍພາບຕໍ່ເປັນພາກທີ 3 ໃນ “Sonic the Hedgehog 3” ຈາກຄ້າຍ ພາຣາເມົ້າ ພິກເຊີຣສ໌ (Paramount Pictures) ເກັບເງິນເຂົ້າຖົງໃນທ້າຍອາທິດທີ 2 ໄປອີກ 38 ລ້ານໂດລາຈາກການສາຍໃນສະຫະລັດ ແລະການາດາ ເຮັດໃຫ້ຍັງຄອງຕຳແໜ່ງແຊ້ມຮູບເງົາທີ່ໄດ້ເງິນອີກຕໍ່ໄປໃນສັບປະດາຫຼ້າສຸດ.
ສ່ວນອັນດັບທີ 2 ນັ້ນ ຍັງຄົງຕົກເປັນຂອງຄ້າຍວອລດິສນີ້ ໃນເລື້ອງ “Mufasa: The Lion King” ຮູບເງົາເລົ່າເລື້ອງລາວກ່ອນຈະມາເຖິງຍຸກຂອງ “The Lion King” ເຊິ່ງສ້າງລາຍໄດ້ເພີ້ມອີກ 37.1 ລ້ານໂດລາໃນການສາຍໃນອາເມຣິກາເໜືອ.
ແລະອັນດັບທີ 3 ນັ້ນ ແມ່ນເລື້ອງ “Nosferatu” ຜົນງານເຂົ້າສາຍໃໝ່ ແບບສະຍອງຂວັນ ແວມພາຍຣ໌ (Vampire) ເປີດໂຕໄດ້ຢ່າງໜ້າຊື່ນຊົມ ເນື່ອງຈາກຮູບເງົາທີ່ສ້າງໃໝ່ຈາກງານຮູບເງົາງຽບຊື່ດຽວກັນທີ່ອອກສາຍໃນປີ 1922 ສາມາດແຊງໜ້າຜົນງານໃໝ່ໆ ສົ່ງທ້າຍປີຫຼາຍເລື້ອງທີ່ມາພ້ອມກັບນັກສະແດງຊື່ດັງອື່ນໆ ຂຶ້ນມາຢູ່ໃນອັນດັບນີ້ໄດ້ດ້ວຍລາຍໄດ້ເປີດໂຕທີ 21.2 ລ້ານໂດລາສຳລັບທ້າຍອາທິດທຳອິດ ຫລັງສ່ຽງເປີດສາຍໃນຊ່ວງສຸດສັບປະດາຕິດກັບວັນຄຣິສມາສ ທີ່ຜູ້ຊົມມັກຈະເລືອກເບິ່ງຮູບເງົາແນວທຸ້ມທຶນສ້າງສູງ ຫຼືແບບທີ່ເບິ່ງໄດ້ດີທັງເດັກແລະຜູ້ໃຫຍ່ເປັນສ່ວນໃຫຍ່.
ເຈົ້າຂອງອັນດັບທີ 4 ຄື “Wicked” ຈາກຄ້າຍດິສນີ້ ທີ່ຫຍັບລົງມາ 1 ອັນດັບຈາກອາທິດກ່ອນ ແຕ່ກໍເກັບເງິນໄດ້ເພີ້ມອີກ 19.5 ລ້ານໂດລາເຊິ່ງສູງກວ່າສັບປະດາທີ່ຜ່ານມາສົມຄວນ.
ຕາມຫຼັງມາຕິດໆ ກໍຄື “Moana 2” ຮູບເງົາແອນິເມຊັນພາກຕໍ່ຂອງເຈົ້າຍິງແຫ່ງດິສນີ້ ທີ່ອອກຜະຈົນໄພໃນມະຫາສະໝຸດຮອບໃໝ່ ພ້ອມໆກັນ ກໍເກັບເງິນຈາກຜູ້ຊົມເພີ້ມໄປອີກ 18.2 ລ້ານໂດລາ.
ຕ້ອງບອກວ່າ ການທີ່ “Mufasa: The Lion King” ລວມທັງ “Wicked” ແລະ “Moana 2” ຍັງຄົງເກາະກັນໃນ 5 ອັນດັບນຶ່ງທີ່ສ້າງລາຍໄດ້ປະຈຳສັບປະດາໄດ້ນີ້ ສະແດງໃຫ້ເຫັນເຖິງຄວາມສຳເລັດທີ່ດຳເນີນມາຢ່າງຕໍ່ເນື່ອງຂອງດິສນີ້ ອີກຄັ້ງ ໂດຍສະເພາະເມື່ອສອງເລື້ອງຫລັງສາຍມາແລ້ວກວ່າເດືອນ.
ອັນດັບຮູບເງົາໃນຕາລາງ Box Office ທ້າຍອາທິດ ຂອງວັນທີ 27 ຫາ 29 ທັນວາ 2024:
1. “Sonic the Hedgehog 3,” $38 million.
2. “Mufasa: The Lion King,” $37.1 million.
3. “Nosferatu,” $21.2 million.
4. “Wicked,” $19.5 million.
5. “Moana 2,” $18.2 million.
6. “A Complete Unknown,” $11.6 million.
7. “Babygirl,” $4.4 million.
8. “Gladiator II,” $4.2 million.
9. “Homestead,” $3.2 million.
10. “The Fire Inside,” $2 million.
ຟໍຣັມສະແດງຄວາມຄິດເຫັນ