ກຳລັງໂຊມາເລຍທີ່ໄດ້ຮັບການໜຸນຫຼັງໂດຍທະຫານຂອງສະຫະພາບອາຟຣິກາ ເລີ່ມການ
ປະຕິບັດງານບຸກໂຈມຕີພວກກະບົດ al-Shabab ທາງກໍ້າເໜືອຂອງນະຄອນຫຼວງໂມກາ
ດິສຊູຂະນະທີ່ກຳລັງປະສົມທີ່ໄດ້ຮັບການສະໜັບສະໜຸນຈາກອົງການສະຫະປະຊາຊາດສືບ
ຕໍ່ໃນການບຸກໂຈມຕີຄືບໜ້າຕໍ່ພວກກະບົດ ທີ່ເປັນເຄືອຂ່າຍຂອງກຸ່ມກໍ່ການຮ້າຍອາລກາຍ
ດານັ້ນ.
ໜ່ວຍປະຕິບັດງານຂອງສະຫະພາບອາຟຣິກາໃນໂຊມາເລຍທີ່ເອີ້ນຫຍໍ້ເປັນພາສາອັງກິດວ່າ
AMISOM ນັ້ນ ກ່າວວ່າ ການປະຕິບັດງານທີ່ເລີ່ມຂຶ້ນໃນຕອນເຊົ້າຂອງວັນສຸກມື້ນີ້ ແມ່ນ
ແນໃສ່ເພື່ອກວດລ້າງພວກນັກລົບຂອງກຸ່ມ al-Shabab ອອກຈາກເຂດຮອບນອກທາງກໍ້າ
ເໜືອຂອງນະຄອນຫຼວງໂຊມາເລຍບ່ອນທີ່ພວກກະບົດຈຸນີ້ຍັງສາມາດທຳການໂຈມຕີຫຼາຍໆ
ຄັ້ງເມື່ອບໍ່ດົນຜ່ານມາ.
ການເຄື່ອນໄຫວທີ່ວ່ານີ້ ມີຂຶ້ນ 2 ອາທິດ ຫຼັງຈາກທະຫານສະຫະພາບອາຟຣິກາ ໄດ້ສ້າງ
ຄວາມເສຍຫາຍຢ່າງໜັກໃຫ້ແກ່ກຸ່ມ al-Shabab ໂດຍບັງຄັບໃຫ້ພວກນັກລົບຂອງກຸ່ມດັ່ງ
ກ່າວ ຖອນອອກໄປຈາກເມືອງ Baidoa ຫົວເມືອງໃຫຍ່ອັນດັບ 3 ຂອງໂຊມາເລຍຊຶ່ງຖື
ກັນວ່າເປັນທີ່ໝັ້ນທີ່ສຳຄັນແຫ່ງນຶ່ງຂອງພວກກະບົດນັ້ນ.
ກຸ່ມ al-Shabab ຍັງສືບຕໍ່ຄວບຄຸມພື້ນທີ່ສ່ວນໃຫຍ່ ໃນເຂດພາກໃຕ້ແລະພາກກາງຂອງ
ໂຊມາເລຍ ແຕ່ໄດ້ສູນເສຍເຂດຄວບຄຸມຂອງຕົນມາເປັນລຳດັບ ຈາກການບຸກໂຈມຕີຂອງ
ເອທິໂອເປຍ ເຄັນຢາ ແລະກຳລັງທະຫານຂອງສະຫະພາບອາຟຣິກາ.
ກຸ່ມດັ່ງກ່າວນີ້ ໄດ້ຖືກຂັບໄລ່ອອກຈາກນະຄອນຫຼວງໂມກາດິສຊູ ໂດຍກຳລັງທະຫານລັດ
ຖະບານແລະສະຫະພາບອາຟຣິກາໃນປີກາຍນີ້ ແຕ່ຍັງສືບຕໍ່ທຳການໂຈມຕີຢ່າງກະຈັດກະ
ຈາຍໃນນະຄອນຫຼວງໂຊມາເລຍໂດຍໃຊ້ວິທີການແບບກອງໂຈນ.