ລິ້ງ ສຳຫລັບເຂົ້າຫາ

ຫລາຍໆຝ່າຍຍິນດີນໍາ ການຖອນອອກ ຈາກໂມກາດິດຊູ ຂອງກຸ່ມ al-Shabab

  • ທອງປານ ເທບວົງສາ

ເດັກນ້ອຍຊາວໂຊມາເລຍ ທີ່ເສຍຊີວິດຍ້ອນຄວາມອຶດຫິວຢ່າງໜັກໃນ ໂຊມາເລຍ

ລັດຖະບານໂຊມາເລຍ ທີ່ໜຸນຫລັງໂດຍສະຫະພາບອາຟຣິກາ ໄດ້ກ່າວ​ຊົມ​ເຊີຍການ
ຖອນຕົວຂອງກຸ່ມຫົວຮຸນແຮງ al-Shabab ທີ່ເຊຶ່ອມໂຍງ ກັບກຸ່ມອາລຄາອີດາ ອອກ​ໄປ ຈາກຖານປະຕິບັດການເກືອບທັງໝົດຂອງພວກເຂົາເຈົ້າ ທີ່ເມືອງຫລວງ Mogadishu
ທີ່ກໍາລັງ​ປະສົບ​ກັບ​ຄວາມ​ອຶດຫິວຢ່າງໜັກຂອງປະເທດນັ້ນ.

ໃນຖະແຫລງການສະບັບນຶ່ງທີ່ອອກເມື່ອວັນເສົາວານນີ້ ນາຍົກລັດຖະມົນຕີ Abdiweli
Mohamed Ali ກ່າວວ່າ ມັນເປັນບາດກ້າວໄປຂ້າງໜ້າອັນໃຫຍ່ຫລວງ ໄປສູ່ການມີ ສະຖຽນລະພາບຫລາຍຂຶ້ນຂອງໂຊມາເລຍ. ທ່ານນາຍົກອາລີກ່າວຕື່ມວ່າ ການຖອນໜີ ຂອງກຸ່ມອາລຊາບັບແມ່ນເປັນຍ້ອນ ການປະຕິບັດການໂດຍກອງທັບ ໂຊມາເລຍ ແລະ
ກໍາລັງຮັກສາສັນຕິພາບຂອງສະຫະພາບອາຟຣິກາ.

ນອກນີ້ແລ້ວ ໂຄສົກຄົນນຶ່ງຂອງກໍາລັງຮັກສາສັນຕິພາບສະຫະພາບອາຟຣິກາກໍໄດ້ສະ​
ແດງ​ຄວາມ​ດີ​ໃຈ​ນໍາອັນທີ່ທ່ານເອີ້ນວ່າ ການປາ​ໄຊຂອງກຸ່ມອາລຊາບັບ ໂດຍກ່າວວ່າ
ມັນເປັນຈຸດເລິ່ມຕົ້ນຂອງການສິ້ນສຸດລົງຂອງພວກຫົວຮຸນແຮງອີສລາມ ທ່ານ
Mohamed Ahmed Noor ເຈົ້າ ເມືອງ Mogadishu ກ່າວວ່າ ກໍາລັງທະຫານຂອງ
ລັດຖະບານຈະສືບ ຕໍ່ຕາມ​ລ່າພວກຫົວຮຸນແຮງໃນ​ເຂດອື່ນໆຂອງໂຊມາເລຍ ນັ້ນຕໍ່ໄປ.

ພວກເຈົ້າໜ້າທີ່ລະດັບສູງອົງການສະຫະປະຊາຊາດປະຈໍາໂຊມາເລຍ ກໍໄດ້ສະແດງຄວາມ ຍິນດີກັບຂ່າວດັ່ງກ່າວ​ເຊ່ນ​ກັນ ​ແຕ່​ໄດ້​ເຕືອນ​ໃຫ້ລະມັດ ລະວັງອັນຕະລາຍຕໍ່ຄວາມໝັ້ນ
ຄົງ ທີ່​ຍັງ​ມີ​ຢູ່​ແລະ​ບໍ່ຄວນ​ຖື​ເບົາ ອັນໂຮມ ທັງການໂຈມຕີຂອງພວກກໍ່ການຮ້າຍ ທີ່​ອາດ
​ມີ​ຂຶ້ນ​ໄດ້​ນັ້ນ.

ແຕ່ໂຄສົກຂອງກຸ່ມຫົວຮຸນແຮງອາລຊາບັບກ່າວວ່າການລ່າຖອຍ ທີ່ໄດ້ເລິ່ມຂຶ້ນເມື່ອ
ຕອນ​ແລງວັນສຸກ​ຜ່ານ​ມາ​ນັ້ນ ເປັນການເຄຶ່ອນໄຫວດ້ານຍຸທະສາດ ແລະວ່າພວກ​ຕົນກໍ
ຍັງຈະຄອບຄອງເມືອງອື່ນໆ ໃນພາກໃຕ້ຂອງໂຊມາເລຍ ນັ້ນຢູ່.

ກຸ່ມຫົວຮຸນແຮງ ອາລຊາບັບ ໄດ້ຕໍ່ສູ້ເພື່ອໂຄ່ນລົ້ມລັດຖະບານໂຊມາເລຍ ມາໄດ້ຫລາຍປີ ແລະຄອບຄອງພື້ນທີ່ອັນກວ້າງໃຫຍ່ຂອງໂຊມາເລຍ ໂຮມ ທັງເຂດທີ່ຖືກກະທົບ​ໂດ​ຍໄພ
ແຫ້ງແລ້ງ ແລະຄວາມ​ອຶດຫິວຢ່າງຮ້າຍແຮງ ທີ່ສຸດນັ້ນນໍາ. ກຸ່ມຫົວຮຸນແຮງອາລຊາບັບ ໄດ້ຄວບຄຸມການລໍາລຽງນໍາສົ່ງສະບຽງຊ່ວຍເຫລືອພວກ​ໄດ້ຮັບເຄາະຮ້າຍຈາກ​ຄວາມ​ອຶດ
ຫິວ​ນັ້ນຢ່າງເຂັ້ມງວດ ແລະໄດ້ສັ່ງຫ້າມບໍ່​ໃຫ້ອົງການຊ່ວຍເຫລືອ ນາໆຊາດຫລາຍໆອົງ
ການ ​ເຂົ້າ​ໄປ​ປະຕິບັດ​ງານ​ບັນ​ເທົາ​ທຸກ​ໃນ​ເຂດ​ເຫລົ່າ​ນັ້ນ.

ທັງໂຄສົກສະຫະພາບອາຟຣິກາ ແລະນາຍົກລັດຖະມົນຕີ Abdiweli ກ່າວວ່າ ບັດນີ້
ມັນຈະ​ເປັນ​ການງ່າຍຂຶ້ນກວ່າເກົ່າແລ້ວ ສໍາລັບ​ພວກອົງການຊ່ວຍເຫລືອຕ່າງໆ ທີ່​ຈະນໍາເອົາສະບຽງອາຫານແລະອື່ນໆເຂົ້າໄປຍັງ Mogadishu ໄດ້.

XS
SM
MD
LG