ທາງການໂຊມາເລຍກ່າວວ່າ ກໍາລັງຮັກສາຄວາມປອດໄພຂອງຕົນໄດ້ຍິງຫົວໜ້າເຄືອຂ່າຍ ອາລກາອິດາໃນອະຟຣິກາຕາເວັນອອກຕາຍໃນລະຫວ່າງການປະເຊີນໜ້າກັນທີ່ດ່ານກວດກາແຫ່ງນຶ່ງໃນຕົ້ນສັບປະດາຜ່ານມານີ້.
ເປັນທີ່ເຊື່ອກັນວ່ານາຍ Fazul Abbullah Mohammad ໄດ້ມີບົດ ບາດສໍາຄັນໃນການວາງລະເບີດສອງບັ້ນ ໃນປີ1998 ທີ່ໄດ້ພາໃຫ້ມີຜູ້ບາດເຈັບແລະລົ້ມຕາຍຢ່າງຫລວງຫລາຍ ແລະສ້າງຄວາມເສຍຫາຍຢ່າງຮ້າຍແຮງໃຫ້ແກ່ສະຖານທູດສະຫະລັດໃນກຸງ Nairobi ແລະ
Dares-Salem. ສະຫະລັດຖືວ່າຜູ້ກ່ຽວເປັນນຶ່ງໃນບັນດາພວກກໍ່ການຮ້າຍທີ່ນາໆຊາດຕ້ອງການໂຕທີ່ສຸດ ແລະໄດ້ສະເໜີໃຫ້ເງິນລາງວັນຈໍານວນ 5 ລ້ານໂດລາສະຫະລັດ ແກ່ຜູ້ໃດກໍຕາມທີ່ສາມາດໃຫ້ຂໍ້ມູນທີ່ນໍາໄປສູ່ການຈັບໂຕຜູ້ກ່ຽວໄດ້.
ທ່ານນາງຮີນລາຣີ ຄລິນຕັນ ລັດຖະມົນຕີການຕ່າງປະເທດສະຫະລັດທີ່ພວມຢູ່ໃນປະເທດTanzania ໃນວັນເສົາວານນີ້ ກ່າວວ່າ ການຕາຍຂອງນາຍ Fazul Mohammad ເປັນການປາໄຊທີ່ສໍາຄັນທີ່ສຸດແກ່ເຄືອຂ່າຍ ອາລກາອິດາ ແລະເປັນຈຸດຈົບທ່ີຖືກຕ້ອງຊອບທໍາແລ້ວ ສໍາລັບຄົນຜູ້ນຶ່ງທີ່ເປັນຜູ້ຮັບຜິດຊອບສໍາລັບການເສຍຊີວິດແລະຄວາມເຈັບປວດຂອງຜູ້ຄົນທີ່ບໍ່ມີຄວາມຜິດໃດໆ ຈໍານວນຫລວງຫລາຍນັ້ນ.
ທ່ານ John Brennen ຜູ້ຊ່ອຍທ່ີປຶກສາດ້າຄວາມປອດໄພພາຍໃນປະເທດປະຈໍາປະທານາທິບໍດີບາຣັກໂອບາມາແຫ່ງສະຫະລັດ ກ່າວວ່າ ການຕາຍຂອງຫົວໜ້າເຄືອຂ່າຍອາລກາອິດາຄົນນີ້ເປັນການປາໄຊຢ່າງໃຫຍ່ຫລວງສໍາລັບກຸ່ມກໍ່ການຮ້າຍກຸ່ມນີ້ ແລະພັນທະມິດຂອງພວກເຂົາ.
ບັນດາເຈົ້າໜ້າທີ່ໂຊມາເລຍກ່າວໃນວັນເສົາວານນີ້ວ່າ ນາຍ Fazul Mohammad ແລະຜູ້ຕ້ອງສົງໄສເປັນຜູ້ກໍ່ການຮ້າຍອີກຄົນນຶ່ງ ໄດ້ຖືກພວກກໍາລັງຮັກສາຄວາມປອດໄພຂ້າຕາຍ ໃນວັນພຸດສັບປະດາຜ່ານມານີ້ ທີ່ດ່ານກວດກາແຫ່ງນຶ່ງໃກ້ນະຄອນຫລວງ Mogadishu. ແຕ່ການປະກາດຂ່າວການຕາຍໄດ້ຊັກຊ້າມາ ກໍເພາະລໍຖ້າການຢືນຢັນ ຮູບລັກສະນະຂອງຜູ້ກ່ຽວຢ່າງແນ່ນອນ ຊຶ່ງທາງການໂຊມາເລຍກ່າວ ວ່າ ໃນຂັ້ນຕົ້ນ ເຂົາເຈົ້າໄດ້ຢືນຢັນດ້ວຍການສົມທຽບສົບໃສ່ກັບຮູບພາບຂອງຜູ້ກ່ຽວ. ລັດຖະບານໂຊມາເລຍກ່າວວ່າ ການກວດ DNA ໃນເວລາຕໍ່ມາ ໄດ້ຢືນຢັນວ່າ ແມ່ນສົບຂອງນາຍ Fazul Mohammad ແທ້.
