ລິ້ງ ສຳຫລັບເຂົ້າຫາ

ຫີບແສງຕາເວັນ ຊ່ວຍສະໜອງໄຟຟ້າ ໃຫ້ສຸກສາລາທົ່ວໂລກ (ສະໄລ໌ກັບວີດີໂອລາວ/ອັງກິດ)

  • ທອງປານ ເທບວົງສາ

ອົງການ​ອະນະ​ໄມ​ໂລກ ຫລື WHO ກ່າວ​ວ່າ ຈໍານວນ​ພວກ​ແມ່ທີ່ຍິງ​ເສຍ​ຊີວິດ​ ຍ້ອນ​ການ​ຖືພາແລະ​ຄອດ​ລູກ ​ແມ່ນ​ໄດ້​ລົດ​ຕໍ່າລົງ​ເຄິ່ງນຶ່ງ​ ໃນຮອບ 20 ປີຜ່ານມານີ້. ​ແຕ່​ວ່​າ ​ເຖິງ​ແມ່ນ ນັ້ນຖື​ວ່າ​ເປັນ​ການປ່ຽນ​ແປງ​ທີ່​ໃຫ້​ກໍາ​ລັງ​ໃຈ​ປະການ​ນຶ່ງກໍ​ຈິງ​ຢູ່ ​ແຕ່​ກໍ​ຍັງ​ມີ​ບັນດາແມ່ ຈໍານວນ ປະມານ​ເຄິ່ງລ້ານ​ຄົນ ​ເສຍ​ຊີ​ວິດ​​ໄປ​ໃນທຸກໆ​ປີ. Linda Ringe ຜູ້​ສື່​ຂ່າວ​ວີ​ໂອ​ເອ ມີ​ລາຍ​ງານ​ ກ່ຽວ​ກັບ​​ແພດ​ຍິງ​ຄົນ​ນຶ່ງ​ແລະສາມີ ທີ່​ກໍາລັງ​ຊ່ວຍ​ຊີວິດ​ພວກ​ແມ່ຍິງ​ໄວ້​ຫຼາຍ​ຄົນ​ໃນ​ຂະນະ​ນີ້ ​ດ້ວຍ​ສິ່ງ​ປະ​ດິດສ້າງທີ່​ສະຫຼຽວ​ສະຫຼາດ​ຢ່າງ​ນຶ່ງ. ທອງ​ປານ ມີລາຍ​ລະອຽດ​ຂອງ​ເລຶ່ອງນີ້​ມາສະ​ເໜີ​ທ່ານ​.

ເບິ່ງວີດີໂອພາສາລາວ:

​ແມ່​ທີ່​ກໍາລັງ​ຖືພາ​ທຸກໆ​ຄົນ ​ແມ່ນຕ້ອງການ​ໃຫ້​ລູກ​ຂອງ​ຕົນ ເກີດມາ​ຢ່າງມີ​ສຸຂະພາບ​ສົມບູນ ​
ແລະ​ຢູ່​ລອດ​ຈົນ​ໃຫຍ່​ໂຕ ​ແຕ່​ສຸກສາລາ​ຫຼາຍ​ແຫ່ງ​ໃນ​ອາ​ຟຣິກາ ​ໃຕ້ເຂດ​ທະ​ເລ​ຊາຍ​ຊາ​ຮາ​ຣາ
​ລົງ​ໄປ​ນັ້ນ ຍັງຂາດ​ເຂີນ​ປັດ​ໄຈ​ຂັ້ນ​ພື້ນຖານຫລາຍ​ຢ່າງຢູ່ ຊຶ່ງ​ເປັ​ນປັດ​ໄຈ​ຂັ້ນ​ພື້ນຖານ​ ທີ່​ພວກ
ນາຍ​ໝໍ​ແລະ​ນາງພະຍາບານຕ້ອງການ​ ເພື່ອ​ຮັບປະກັນ​ຄວາມ​ປອດ​ໄພ ໃຫ້​ທັງ​ແມ່​ແລະເດັກ
​ເກີດ​ໃໝ່ ໃນ​ລະຫວ່າງກາ​ນຄອດ​ລູກ ເປັນ​ຕົ້ນກະ​ແສໄຟຟ້າທີ່​ກາງ​ຕໍ່​ໄດ້ທີ່​ໃຫ້​ແສງ​ສະຫ​ວ່າງ
ໃນເວລາ​ເຂົາ​ເຈົ້າ​ເຮັດວຽກ ​ເອົາ​ລູກ​ອອກ​ນັ້ນ​.

​ນາງ Zainab Yusuf ພະນັກ​ງານສຸກສາລາ​ ທີ່​ເມືອງຄາ​ໂນ ​ປະ​ເທດໄນ​ຈີ​ເຣຍ ອະທິບາຍ
ເຖິງສະພາບ​ການ​ປິ່ນປົວ​ຮັກສາ​ຄົນ​ເຈັບ​ໃນ​ຄວາ​ມມືດ​ນັ້ນ ວ່າ​ເປັນຄື​ແນວ​ໃດ:

“ມັນ​ບໍ່ງ່າຍ ທີ່​ຈະ​ທໍາ​ການ​ຄອດ​ລູກ ​ເອົາ​ລູກ​ອອກ ​ໂດຍບໍ່ມີ​ແສງ​ສະ​ຫວ່າງ. ພວກ​ເຮົາ​ຕ້ອງ​
ຊອກ​ຫາຕະກຽງ ຫຼື​ແນວ​ໃດ​ແນວນຶ່ງມາ​ໃຊ້. ຄົນ​ເຈັບ​ອາດ​ເລືອດ​ອອກ ​ເລືອດ​ຕົກ​ໄດ້ ທຸກ
​ສິ່ງ​ແມ່ນ​ສາມາດ​ເກີດ​ຂຶ້ນກັບລາວ​ໄດ້ ​ແລະ​ກໍ​ບໍ່​ມີ​ທາງ ບໍ່​ມີແສງ​ສະຫວ່າງ ທີ່​ຈະ​ພາ​ໃຫ້​ມອງ
​ເຫັນ​ວ່າ​ອັນ​ໃດ​ເປັນອັນ​ໃດ ຫລື​ແມ່ນ​ຫຍັງ​ກໍາລັງເກີດ​ຂຶ້ນກັບ​ຄົນ​ເຈັບ.”

​ແພດ​ເດັກ Laura Stachel ຕົກ​ໃຈ​ທີ່ໄດ້ເຫັນ​ສະພາບການຂາດ​ເຂີນແສງ​ສະຫວ່າງ ​ເວລາ
​ລາວໄປ​ຢ້ຽມ​ຢາມ​ອາ​ຟຣິກາ​ ເທື່ອ​ທໍາ​ອິດ​ໃນ​ປີ 2008. ລາວ​ເວົ້າ​ວ່າ:

​“ໃນ​ຍາມ​ຄໍ່າ​ຄືນ ​ໄຟຟ້າມັກມອດຢູ່ເລື້ອຍໆ. ພວກ​ເຂົາ​ເຈົ້າ​ຕ້ອງໄດ້​ໃຊ້​ຕະກຽງນໍ້າມັນ​
ກ໊າດ ​ເພື່ອພະຍາຍາມ​ປິ່ນປົວ​ພວກ​ຄົນ​ເຈັບ​ທີ່​ມີ​ອາການ​ສາຫັດ. ​ຕອນນັ້ນ ຂ້ອຍກໍາລັງ​
ເບິ່ງ​ການຜ່າ​ທ້ອງເອົາ​ລູກ​ອອກ ​ກໍເກີດໄຟ​ມອດພໍດີ ​ແລະພວກນາຍ​ໝໍຕ້ອງໄດ້ຜ່າຕັດ​
ໃຫ້​ສໍາ​ເລັດ ​ໂດຍ​ໃຊ້​ໄຟ​ສາຍ​ຂອງ​ຂ້ອຍ​ເອງ.”

Dr. Stachel ​ໄດ້​ຫັນ​ໄປ​ປຶກສາ​ກັບ​ສາມີ​ຂອງ​ລາວ ​ເພື່ອໃຫ້ຊ່ວຍ​ຫາ​ວິທີ​ແກ້​ໄຂ​ບັນຫານີ້.
ລາວ​ກ່າວ​ວ່າ:

“ສາມີ​ຂອງ​ຂ້ອຍ​ເປັນ​ຜູ້​ສິດສອນ​ກ່ຽວ​ກັບເລື່ອງໂຊ​ລາ ຫຼື​ແສງຕາ​ເວັນ ​ແລະ​ກໍເປັນ​ນັກ​
ປະ​ຄິດ​ຄິດສ້າງ​ຄົນ​ນຶ່ງ. ​ແລະ​ລາວ​ບອກ​ຂ້ອຍ​ວ່າ Laura ບາດ​ເຈົ້າກັບ​ບ້ານ​ແລ້ວ ບາງ
ທີ ພວກ​ເຮົາ​ອາດ​ຈະສາມາດ​ຄິດ​ຢ່າງ​ໃດ​ຢ່າງ​ນຶ່ງ​ໄດ້ ທີ່​ຢ່າງ​ໜ້ອຍ​ກໍ​ອາດຈະ​ຊ່ວຍໃນ
ເລຶ່ອງກະ​ແສໄຟຟ້າ​ໃນ​ໂຮງໝໍນັ້ນ​ໄດ້. ດັ່ງ​ນັ້ນແລ້ວ ​ເວລາ​ຂ້ອຍ​ກັບ​ຄືນ​ເມືອ ​ຈາກ​ໄນ​ຈີ
​ເຣຍ ພວກ​ເຮົາ​ກໍ​ພາກັນຄິດ​ກ່ຽວ​ກັບ​ວ່າ ​ເຮົາ​ຈະ​ເຮັດ​ຢ່າງ​ໃດ​ເພື່ອ​ຈະ​ຊ່ວຍ​ໂຮງໝໍແຫ່ງ​
ນີ້ໄດ້. ພວກ​ເຮົາ​ກໍ​ເລີຍ​ຄິດ​ເຖິງການ​ໃຊ້​ໄຟຟ້າ​ຈາກແສງຕາ​ເວັນ ​ເພາະວ່າ​ແສງຕາ​ເວັນ
​ເປັນ​ຊັບພະຍາກອນ​ ທີ່​ບໍ່​ຕ້ອງໄດ້ຊື້.”

ສອງ​ສາມີ​ພັນ​ລະ​ຍາ​ Stachel ເລິ່ມ​ຕົ້ນ​ດ້ວຍ​ການຕິດ​ຕັ້ງ​ແຜ່ນ​ກອງ​ແສງ​ຕາ​ເວັນ ຫລື solar
panel ແຜ່​ນ​ໃຫຍ່ໆຫຼາຍແຜ່ນ​ເຂົ້າກັນ ​ຢູ່​ຫຼັງ​ບ້ານ. ປັດຈຸບັນນີ້​ ທັງ​ສອງ​ໄດ້​ປະດິດ​ສ້າງຊຸດ
ອຸບປະກອນ ຫລື​ຄູ່​ມື​ ຜະລິດ​ໄຟຟ້າ​ທີ່​ມີ​ຂະໜາດ​ເທົ່າ​ກັບ​ຫີບ​ເດີນທາງ ທີ່​ສະໜອງກະ​ແສ​ໄຟ
ຟ້າ ​ໃຫ້​ແກ່​ສຸກສາລາ​ ເກືອ​ບ 200 ​ແຫ່ງ​ໃນທົ່ວ​ໂລກ. Dr. Stachel ​ເລົ່າ​ວ່າ:

“ຂ້ອຍ​ໄດ້​ຖາມ​ສາມີ​ຂອງ​ຂ້ອຍວ່າ​ ລາວ​ສາມາດອອກ​ແບບ​ຊຸດຄູ່​ມື ​ໃຫ້​ມີ​ຂະໜາດ​ພໍ​ທີ່​ຈະ​
ຍັດ​ໃສ່​ໃນ​ຫີ​ບເດີນທາງ​ໄດ້ບໍ່? ​ເພື່ອ​ວ່າ​ຂ້ອຍຈະສາມາດ​ໃສ່​ໃນ​ຫີບ ເລັດ​ລອດ​ການ​ກວດ
ກາ​ຂອງພາສີ​ໄປ​ໄດ້ຢ່າງ​ງ່າຍໆ ​ແລະນອກ​ນີ້​ຂ້ອຍ​ກໍ​ບໍ່​ຮູ້​ດີ​ປານ​ໃດ ​ກ່ຽວ​ກັບ​ລະບົບ​ແສງ
ຕາ​ເວັນ ຂ້ອຍກໍ​ເລີຍ​ຂໍໃຫ້​ລາວ
ປະດິດ​ມັນ​ຂຶ້ນ​ມາໃນ​ແບບທີ່​ຂ້ອຍ​ສາມາດໃຊ້​ມັນໄດ້​ງ່າຍ​ໆ
ສະຫລູ​ບ​ແລ້ວ ກໍ​ແມ່ນ​ວ່າປະກອບ​ທຸ​ກຢ່າງ​ທຸກ​ຢ່າງ​ເຂົ້າກັນ ​ແບບ​ທີ່​ຂ້ອຍ​ພຽງ​ແຕ່​ເອົາ
ສາຍ​ໄຟ​ສອງ​ເສັ້ນມາ​ຕໍ່​ເຂົ້າກັນ​ເທົ່າ​ນັ້ນ ​ແລະ​ສະ​ແດງ​ໃຫ້​ເຂົາ​ເຈົ້າຮູ້ວິທີ​ໃຊ້.”

​ໃນ​ການ​ເດີນທາງ​ໄປເຝິກ​ແອບພວກ​ພະ​ນັກ​ງານ​ແພດບັ້ນ​ນຶ່ງ ທີ່ປະ​ເທດ​ໄນ​ຈີ​ເຣຍ ​ເມື່ອ​ບໍ່
​ດົນ​ມາ​ນີ້ ຫີບເດີ​ນທາງທີ່​ບັນຈຸ​ໄຟຟ້າ​ຂອງ​ Dr. Stachel ​ແມ່ນ​ໄດ້​ຖືກ​ຮັບ​ເອົາ​ເປັນ​ຢ່າງ​ດີ.
ນາງ Zainab Yusuf ກ່າວ​ວ່າ:

“ພວກ​ເຮົາ​ຈະ​ດີ​ອົກ​ດີ​ໃຈ​ຫຼາຍ ​ແລະທຸກ​ສິ່ງ​ທຸກ​ຢ່າງ​ກໍ​ຈະສະດວກ​ດີ ​ແລະບັດ​ນີ້ ​ພວກ​ເຮົາ​
ກໍ​ຈະ​ພະຍາຍາມ​ຫຼາຍ​ຂຶ້ນ.”

​ເຖິງ​ແມ່ນ​ຈະ​ປະສົບ​ຜົນ​ສໍາ​ເລັດ​ໃນ​ສິ່ງ​ນີ້​ແລ້ວ​ກໍ​ຕາມ ​ແຕ່ Dr. Stachel ກ່າວ​ວ່າ ການ​ມີ
​ແສງ​ສະຫວ່າງ​ພຽງພໍ​ແລະ​ກະ​ແສ​ໄຟຟ້າ​ທີ່ກາງ​ຕໍ່​ໄດ້​ນັ້ນ ແມ່ນເປັນ​ພຽງ​ແຕ່​ຈຸດ​ເລິ່ມຕົ້ນ​
ຂອງ​ເລຶ່ອງນີ້​ເທົ່າ​ນັ້ນ.

ດຣ. Stachel ກ່າວ​ວ່າ ນອກ​ເໜືອ​ໄປ​ກວ່າ​ນັ້ນ​ແລ້ວ ກໍ​ແມ່ນ​ຄວາມຈໍາ​ເປັນ​ທີ່​ຈະ​ຕ້ອງ​ຮັບ
ປະກັນໃຫ້​ ພວກ​ພະນັກງານ​ສາທາລະນະ​ສຸກ​ ໄດ້​ຮັບ​ການສຶກສາທີ່​ຖືກຕ້ອງ ​ມີເຄຶ່ອງມື ​
ແລະ​ໄດ້​ຮັບ​ການ​ສະໜັບສະໜຸນ ​ເພື່ອ​ປະຕິບັດ​ວຽກ​ງານຂອງ​ພວກ​ເຂົາ​ເຈົ້າ​ໃຫ້ໄດ້​ດີ​.

ເບິ່ງວີດີໂອພາສາອັງກິດ:

XS
SM
MD
LG