ນັກພັດທະນາສັງຄົມ ຢືນຢັນວ່າ ແມ່ຍິງລາວ ຕົກເປັນເຫຍື່ອ ຂອງການຄ້າມະນຸດ ສາກົນ ຫລາຍຂຶ້ນ. ໂດຍສະເພາະແມ່ນຖືກຫລອກລວງໄປແຕ່ງງານກັບຄົນຈີນແລະຖືກບັງຄັບໃຫ້ເປັນໂສເພນີໃນຈີນ.
ຜູ້ປະສານງານອົງການພັດທະນາສັງຄົມອ່າງແມ່ນໍ້າຂອງ ຢືນຢັນວ່າ ການຄ້າມະນຸດຂ້າມຊາດ ໂດຍກຸ່ມກໍ່ອາຊະຍາກຳຈີນຍັງສືບຕໍ່ເກີດຂຶ້ນຢ່າງຕໍ່ເນື່ອງ, ໂດຍຫວ່າງມໍ່ໆມານີ້, ມີແມ່ຍິງລາວ 30 ກວ່າຄົນທີ່ໄດ້ຮັບການຊ່ວຍເຫຼືອ ແລະສາມາດຫຼົບໜີອອກມາຈາກເຂດເສດຖະກິດພິເສດສາມຫລ່ຽມຄຳ ຢູ່ເມືອງຕົ້ນເພັງ, ແຂວງບໍ່ແກ້ວ, ທີ້ໄດ້ໃຫ້ການຢືນຢັນວ່າພວກຕົນຖືກຫຼອກລວງ ແລະ ບັງຄັບໃຫ້ຂາຍບໍລິການທາງເພດໃຫ້ກັບລູກຄ້າຂອງເຄືອຂ່າຍການພະນັນ ແລະ ອາດຊະຍາກຳທາງອິນເຕີເນັດ ຫຼື Call Centers ທີ່ຊຸກເຊື່ອງຢູ່ໃນເຂດເສດຖະກິດພິເສດສາມຫລ່ຽມຄຳ. ເຊິ່ງເປັນພື້ນທີ່ສໍາປະທານຂອງກຸ່ມບໍລິສັດດອກງິ້ວຄໍາຂອງຈີນ ແລະຜ່ານການສືບສວນ ສອບສວນ ແມ່ຍິງລາວທີ່ຕົກເປັນຜູ້ເຄາະຮ້າຍດັ່ງກ່າວ ກໍຍັງໃຫ້ການຢືນຢັນວ່າ ອາດຊະຍາກອນຈີນ ໄດ້ສົ່ງແມ່ຍິງລາວຫຼາຍຄົນໄປຈີນ ເພື່ອໄປແຕ່ງງານກັບຜູ້ຊາຍຊາວຈີນ ແລ້ວນໍາໄປຂາຍໃຫ້ຊ່ອງໂສເພນີໃນຈີນອີກດ້ວຍ.
ຟໍຣັມສະແດງຄວາມຄິດເຫັນ