ລິ້ງ ສຳຫລັບເຂົ້າຫາ

 
ບໍລິເວນທີ່ຖືກໄຟໄໝ້ ໃນລັດຄາລິຟໍເນຍ ກຽມຮັບມືກັບໄພນໍ້າຖ້ວມ ຂະນະທີ່ລັດ ອໍເຣກອນ ກຽມຮັບມືກັບຝົນນໍ້າກ້ອນ ແລະ ຫິມະ
ວັນອັງຄານ, ໐໘ ເມສາ ໒໐໒໕

ບໍລິເວນທີ່ຖືກໄຟໄໝ້ ໃນລັດຄາລິຟໍເນຍ ກຽມຮັບມືກັບໄພນໍ້າຖ້ວມ ຂະນະທີ່ລັດ ອໍເຣກອນ ກຽມຮັບມືກັບຝົນນໍ້າກ້ອນ ແລະ ຫິມະ


ແຟ້ມຮູບ-ເສດຊາກຫັກພັງຂອງເຮືອນຊານທີ່ໄດ້ຮັບຄວາມເສຍຫາຍຈາກໄຟປ່າ ອີຕັນ ຕັ້ງລຽນກັນຢູ່ໃນຊຸມຊົນ ອາລຕາເດນາ, ລັດຄາລິຟໍເນຍ, ວັນທີ 21 ມັງກອນ 2025.
ແຟ້ມຮູບ-ເສດຊາກຫັກພັງຂອງເຮືອນຊານທີ່ໄດ້ຮັບຄວາມເສຍຫາຍຈາກໄຟປ່າ ອີຕັນ ຕັ້ງລຽນກັນຢູ່ໃນຊຸມຊົນ ອາລຕາເດນາ, ລັດຄາລິຟໍເນຍ, ວັນທີ 21 ມັງກອນ 2025.

ເຈົ້າ​ໜ້າ​ທີ່​ໃນ​ລັດ​ຄາ​ລິ​ຟໍ​ເນຍ ໄດ້​ແຈກ​ຢາຍ​ກະ​ສອບ​ຊາຍ, ກະກຽມນັກ​ລອຍ​ນ້ຳ​ກູ້ໄພ​ໄວ້​ລ່ວງ​ໜ້າ ແລະ​ບອກ​ໃຫ້​ປະຊາຊົນກະ​ກຽມ​ຖົງເຄື່ອງໃຫ້​ພ້ອມ ໃນ​ຂະ​ນະ​ທີ່​ລັດຖະບານ ກໍາລັງ​ກຽມ​ຮັບ​ມື​ກັບ​ສະພາບຊັ້ນ​ບັນ​ຍາ​ກາດທີ່​ອາດ​ຈະ​ພາ​ໃຫ້​ມີ​ຝົນ​ຕົກ​ໜັກ ໃນ​ວັນ​ພະ​ຫັດ​ມື້​ນີ້, ເຮັດໃຫ້ມີລົມ​ແຮງ ແລະ​ນ້ຳ​ຖ້ວມ​ ມາ​ສູ່​ເຂດ​ທີ່​ຖືກ​ໄຟປ່າເຜົາ​ໄໝ້​.

ໃນ​ຂະນະ​ດຽວ​ກັນ, ນະຄອນ ຜອດແລນ ກໍ​ໄດ້​ປົກຄຸມຖະໜົນດ້ວຍນໍ້າຢາປ້ອງກັນ​ນ້ຳ​ກ້ອນ 2,000 ກາ​ລອນ ​ໃນ​ຂະນະ​ທີ່​ເຈົ້າໜ້າ​ທີ່​ໃນ​ລັດອໍເຣກອນ ​ແລະ ລັດໄອດາໂຮ ​ໄດ້​ເປີດ​ບ່ອນ​ລີ້​ໄພ​ສຸກ​ເສີນ ​ເພື່ອ​ກຽມ​ຮັບ​ມື​ກັບ​ການຕົກຂອງຫິມະ ​ແລະນ້ຳ​ກ້ອນປະສົມ​ກັນ, ເຊິ່ງຈະເລີ້ມຂຶ້ນ​ໃນ​ວັນ​ພະຫັດ​ມື້​ນີ້.

ທາງບໍລິເວນພາກໃຕ້ຂອງລັດຄາລິຟໍເນຍ ອາດມີປະລິມານນໍ້າຝົນສູງຮອດ 15 ຊັງຕີແມັດ ຢູ່ເທິງພູ ແລະປະມານ 7.6 ຊັງຕີແມັດ ໃນບໍລິເວນແຄມຝັ່ງທະເລ ລວມທັງຮ່ອມພູ, ອີງຕາມການກ່າວຂອງ ທ່ານ ເບລັນ ບາວເອີ (Brent Bower), ນັກອຸຕຸນິຍົມຂອງໜ່ວຍງານສະພາບອາກາດແຫ່ງຊາດ. ລົມພັດ​ແຮງ ​ອາດ​ເຮັດ​ໃຫ້​ຕົ້ນ​ໄມ້ຫຼາຍຕົ້ນ​ຫັກລົ້ມລົງ, ໄຟ​ຟ້າ​ມອດ ​ແລະອາດສົ່ງຜົນເຮັດໃຫ້​ຖ້ຽວ​ບິນຫຼາຍສາຍຫຼ້າ​ຊ້າ.

ມີການອອກມາເຕືອນໃຫ້ອົບພະຍົບ ຢູ່ໃນເຂດຮ່ອມພູ ແມນເດວີລ ແຄນຢອນ (Mandeville Canyon) ແລະຂົງເຂດອື່ນໆທີ່ຖືກທໍາລາຍໂດຍໄຟປ່າ ພາລິເຊດສ໌, ເຊິ່ງເປັນເຫດການໄຟປ່າທີ່ໄດ້ສ້າງຄວາມເສຍຫາຍຫຼາຍທີ່ສຸດໃນປະຫວັດສາດຂອງ ນະຄອນ ລອສ ແອນເຈີເລັສ, ສໍາລັບຄວາມກັງວົນກ່ຽວກັບການໄຫຼຂອງເສດຊາກຫັກພັງ ທີ່ອາດຈະເກີດຂຶ້ນໃນລະຫວ່າງພະຍຸພັດເຂົ້າມາຮອດ. ນອກນັ້ນ, ຍັງມີການເຕືອນໄພສໍາລັບເຂດຮ່ອມພູ ທຣາບູໂກ ແຄນຢອນ (Trabuco Canyon) ແລະພື້ນທີ່ອື່ນໆ ທີ່ຢູ່ໃກ້ກັບຂົງເຂດ Airport Fire ທີ່ຖືກໄຟໄໝ້.

ໂຮງຮຽນໃນຂົງເຂດ ມາລີບູ ທັງໝົດ ຖືກປິດໃນວັນພະຫັດມື້ນີ້, ແລະ ສວນສະນຸກ ເບີຣິ ຟາມ ຂອງເມືອງ ນັອດ (Knott) ກໍຖືກປິດລົງໃນຕອນເຊົ້າຂອງມື້ວັນພຸດວານນີ້ ເນື່ອງຈາກກະແສນໍ້າໃນຊັ້ນບັນຍາກາດ, ເຊິ່ງເປັນແຖບອາຍນໍ້າທີ່ມີກວ້າງຍາວ ສາມາດສົ່ງຄວາມຊຸ່ມຈາກເຂດຮ້ອນໄປສູ່ບໍລິເວນພາກເໜືອໄດ້ຫຼາຍຂຶ້ນ.

ທ່ານ ແດນີລ ສເວນ (Daniel Swain), ນັກວິທະຍາສາດດ້ານດິນຟ້າອາກາດຈາກມະຫາວິທະຍາໄລ ດ້ານກະສິກຳ ແລະຊັບພະຍາກອນທໍາມະຊາດຂອງລັດຄາລິຟໍເນຍ ກ່າວວ່າ ພື້ນທີ່ດັ່ງກ່າວ ຕ້ອງການຝົນຮີບດ່ວນທີ່ສຸດ, ແຕ່ມັນອາດຈະຕົກລົງມາຢ່າງໜັກ ແລະໄວເກີນໄປ, ແລະອາດ​ຈະ​ສົ່ງຜົນ​ໃຫ້​ຂີ້​ເຫຍື້ອໄຫລຖ້ວມ ​ພ້ອມທັງເຮັດໃຫ້ເກີດ​ໄພ​ນ້ຳ​ຖ້ວມ​ທົ່ວຂົງເຂດທີ່​ເກີດ​ໄຟ​ໄໝ້ມາກ່ອນນັ້ນ​.

ທ່ານກ່າວໃນຖະແຫຼງການສະບັບນຶ່ງວ່າ ພື້ນທີ່ທີ່ຖືກໄຟໄໝ້ເຫຼົ່ານັ້ນ ມີຄວາມສ່ຽງຕໍ່ການໄຫລຂອງເສດຊາກຫັກພັງຫຼາຍຂື້ນ ເນື່ອງຈາກພືດຕ່າງໆທີ່ຊ່ວຍຮັກສາດິນຢູ່ບໍລິເວນນັ້ນ ຖືກໄຟໄໝ້ໝົດແລ້ວ, ແລະຍັງມີເສດຊາກຕ່າງໆທີ່ອາດລອຍມານໍາ ເຊັ່ນ ຂີ້ເຖົ່າ, ດິນ ແລະ ຫີນ.

ເຈົ້າ​ໜ້າ​ທີ່​ຂອງ​ແຂວງກ່າວ​ວ່າ ອາດມີການ​ປິດຖະໜົນ, ແລະ​ຮຽກ​ຮ້ອງ​ໃຫ້​ປະຊາຊົນພາກັນ​ກຽມ​ພ້ອມ ຖ້າ​ຈໍາເປັນຕ້ອງອອກຄໍາສັ່ງໃຫ້​ມີ​ການ​ອົບ​ພະ​ຍົບເກີດຂຶ້ນ​.

ອ່ານຂ່າວນີ້ເປັນພາສາອັງກິດ

ຟໍຣັມສະແດງຄວາມຄິດເຫັນ

XS
SM
MD
LG