ການວິນິດໄສ ພະຍາດຕິດແປດຕ່າງໆ ເຊັ່ນ HIV ນັ້ນ ຕ້ອງທຳ
ການກວດທາງແພດ ທີ່ສິ້ນເປືອງຄ່າໃຊ້ຈ່າຍຫລາຍ ຊຶ່ງເຮັດໃຫ້
ການວິນິດໄສ ແພງເກີນໄປສຳຫລັບພວກຄົນປ່ວຍ ທີ່ທຸກຍາກ
ຫຼື ພວກທີ່ອາໄສຢູ່ຫ່າງໄກສອກຫລີກ. ແຕ່ເທັກໂນໂລຈີອັນໃໝ່
ທີ່ເອີ້ນວ່າ “ຫ້ອງທົດລອງຢູ່ໃນ chip ຫຼື lab-on-a-chip”
ອາດຊ່ວຍໃຫ້ຫຼາຍໆຄົນເພີ້ມຂຶ້ນ ສາມາດໄປກວດໄດ້. ຜູ້ສື່ຂ່າວ
ວີໂອເອ George Putic ມີລາຍງານກ່ຽວກັບເລື້ອງນີ້ ຊຶ່ງ
ໄຊຈະເລີນສຸກ ຈະນຳມາສະເໜີທ່ານ.
ເບິ່ງວີດີໂອລາຍງານນີ້ ເປັນພາສາລາວ:
ພວກໂທລະສັບສະຫລາດຕ່າງໆ ໂດຍພື້ນຖານແລ້ວ ແມ່ນເປັນເຄື່ອງຄອມພິວເຕີຂະໜາດ ນ້ອຍໆ ໃສ່ໃນຖົງໂສ້ງຖົງເສື້ອໄດ້ ທີ່ສາມາດສັ່ງໃຫ້ເຮັດລາຍການ ທີ່ສະລັບສັບຊ້ອນ ຫລາຍໆ ຢ່າງໄດ້ ນັບຈາກຫລີ້ນວີດີໂອເກມຕ່າງໆ ໄປເຖິງ ໃຫ້ຊ່ອຍນຳພາທິດທາງ.
ອຸປະກອນຕິດໃສ່ໂທລະສັບສະຫລາດ ທີ່ເອີ້ນວ່າ “dongles” ຂະຫຍາຍຄວາມສາມາດ ດັ່ງກ່າວເຫຼົ່ານັ້ນ ອອກໄປຕື່ມອີກ.
ບັນດານັກວິທະຍາສາດ ທີ່ມະຫາວິທະຍາໄລ Columbia ໃນນະຄອນ New York ໄດ້
ພັດທະນາອຸປະກອນດັ່ງກ່າວ ທີ່ເປັນຄືກັນກັບ lab-on-a-chip ຫລື ຫ້ອງທົດລອງ ໃນ chip ຄອມພິວເຕີ ຊຶ່ງເວລາເຮົາຊຸບມັນເຂົ້າໃສ່ຮູ ຂອງໂທລະສັບແລ້ວ ກໍຈະເຮັດໃຫ້ໂທລະສັບ
ສະຫລາດກາຍມາເປັນເຄື່ອງມື ສຳຫລັບວິນິດໄສ ໂຣກຕິດແປດຕ່າງໆ ເຊັ່ນ HIV ແລະ
syphilis ກໍຄືກາມມະໂຣກ ຫລືໂຣກໜອງໃນ ທີ່ແມ່ຍິງຕິດແປດ ມາຈາກການຮ່ວມເພດ.
ທ່ານ Sam Sia ເປັນອາຈານສອນ ວິຊາວິສະວະກຳຊີວະແພດ ຢູ່ທີ່ມະຫາວິທະຍາໄລ Columbia ໃນນະຄອນ New York. ທ່ານກ່າວວ່າ ການພົບເຫັນແລະວິນິດໄສພະຍາດ
ໄດ້ແຕ່ຫົວທີ ອາດເປັນເລື້ອງຄວາມເປັນຄວາມຕາຍ ຫລືການຢູ່ລອດ ສຳຫລັບພວກຄົນປ່ວຍ ເຊັ່ນພວກແມ່ຍິງຖືພາມານ ຢູ່ໃນເຂດຊົນນະບົດ ຂອງອາຟຣິກາ.
ທ່ານ Sam Sia ເວົ້າວ່າ “ໂດຍການສະໜອງ ວິທີການວິນິດໄສໂຣກ ໃຫ້ແກ່ພວກ
ຄົນປ່ວຍເຫຼົ່ານັ້ນ ເຂົາເຈົ້າກໍຈະສາມາດໄດ້ຮັບການປິ່ນປົວ ແລະ ພວກທາລົກຂອງ
ເຂົາເຈົ້າ ກໍຈະສາມາດເກີດຂຶ້ນມາໄດ້ອີຫລີ ແລະເຕີບໂຕຂຶ້ນ ແລະມີຊີວິດຢູ່ຕໍ່ໄປໄດ້
ສະນັ້ນ ມັນຈຶ່ງເປັນເລື້ອງຄວາມເປັນຄວາມຕາຍອີຫລີ ຖ້າພວກເຂົາເຈົ້າ ບໍ່ມີວິທີ
ທີ່ຈະວິນິດໄສໂຣກໄດ້.”
ເປັນເວລາ 10 ປີ ທີ່ທ່ານ Sia ແລະທີມງານຂອງທ່ານ ໄດ້ທຳງານເພື່ອປະດິດສ້າງ ອຸປະກອນຕິດໃສ່ໂທລະສັບສະຫລາດດັ່ງກ່າວ ທີ່ພວກເຂົາເຈົ້າ ກ່າວວ່າ ສາມາດທຳງານໄດ້ດີເທົ່າທຽມ
ກັບອຸປະກອນທີ່ໃຊ້ໃນຫ້ອງທົດລອງ ລາຄາ 18,000 ດອນລາ ນັ້ນ.
ທ່ານ Sia ເວົ້າອີກວ່າ “ແທນທີ່ຈະດູດເອົາເລືອດໃສ່ຫລອດ ແລະເອົາຕົວຢ່າງ
ເລືອດນັ້ນ ສົ່ງໄປກວດຢູ່ຫ້ອງທົດລອງ ເຈົ້າສາມາດກວດໄດ້ຢູ່ກັບທີ່ໄດ້ ໂດຍ
ພຽງແຕ່ເຈາະນິ້ວມື ເອົາເລືອດໜ້ອຍນຶ່ງ ແລະເຈົ້າກໍຈະໄດ້ຜົນພາຍໃນ 15
ນາທີ ດ້ວຍຄຸນນະພາບ ຄືກັບການກວດສອບຢູ່ຫ້ອງທົດລອງ.”
ການກວດພວກຄົນປ່ວຍ ຂະໜາດນ້ອຍ ຢູ່ປະເທດ Rwanda ໄດ້ສະໜອງຜົນ ທີ່ມີຄວາມແນ່ນອນສູງ. ຄວາມລະອຽດອ່ອນ ໃນການກວດຫາເປົ້າໝາຍ ແມ່ນມີຄວາມແນ່ນອນເຖິງ
92 ຫາ 100 ເປີເຊັນ ໃນຂະນະທີ່ການໄຈ້ແຍກພວກຄົນ ທີ່ບໍ່ໄດ້ຕິດແປດພະຍາດ ອອກໄປ
ແມ່ນເຮັດໄດ້ ເຖິງ 79 ຫາ 100 ເປີເຊັນ.
ທ່ານ Sia ກ່າວວ່າ ຄວາມສາມາດຂອງ lab-on-a-chip ອຸປະກອນຕິດໃສ່ໂທລະສັບສະຫລາດນີ້ ບໍ່ໄດ້ຈຳກັດຢູ່ແຕ່ການກວດໂຣກຕິດແປດ ທາງເພດສຳພັນຕ່າງໆ ຫຼື STDs
ເຊັ່ນວ່າ HIV-AIDS ແລະ syphilis ຫລື ໂຣກໜອງໃນ ໄດ້ເທົ່ານັ້ນ.
ທ່ານ Sia ເວົ້າວ່າ “ແນ່ນອນວ່າ ພວກເຮົາສາມາດກວດເບິ່ງ ໂຣກຕິດແປດ
ທາງເພດສຳພັນອື່ນໆໄດ້ ເຊັ່ນວ່າ ໂຣກຕັບອັກເສບ hepatitis ໂຣກຜິວໜັງ
herpes ແລະ ອື່ນໆ ຕະຫລອດທັງໂຣກຕິດແປດອື່ນໆ ລວມທັງມາລາເຣຍ
ແລະ ອື່ນໆ ແລະຍັງລວມທັງ ພະຍາດຊ້ຳເຮື້ອຕ່າງໆ ອີກດ້ວຍ.”
ເວລານີ້ ທ່ານ Sia ກັບທີມງານຂອງທ່ານ ກຳລັງກຽມ ທຳການທົດລອງທາງການແພດ
ຂະໜາດໃຫຍ່ ທີ່ຈຳເປັນຕ້ອງເຮັດ ເພື່ອໃຫ້ອຸປະກອນດັ່ງກ່າວໄດ້ຮັບການຮັບຮອງເອົາ
ໂດຍອົງການອະນາໄມໂລກ.
