ມີອົບພະຍົບຕື່ມອີກຫຼາຍພັນຄົນ, ເຊິ່ງຫຼາຍຄົນມາຈາກ ຊີເຣຍ
ແລະ ອີຣັກ ຫຼັ່ງໄຫຼເຂົ້າໄປໃນປະເທດໂຄຣເອເຊຍ ໃນວັນເສົາ
ວານນີ້ໃນການເດີນທາງທີ່ໄດ້ຮັບແຮງບັນດານໃຈໂດຍຄວາມ
ຫວັງ ເພື່ອຈະມີຊີວິດການເປັນຢູ່ທີ່ດີຂຶ້ນກວ່າເກົ່າ ໃນຢູໂຣບ.
ການຫຼັ່ງໄຫຼຂອງອົບພະຍົບ, ເຊິ່ງບັນດາເຈົ້າໜ້າທີ່ອະທິບາຍວ່າ
ບໍ່ເຄີຍພົບເຫັນມາກ່ອນ, ເກີດຂຶ້ນມື້ໜຶ່ງຫຼັງຈາກໂຄຣເອເຊຍ ໄດ້
ຍ້າຍສິ່ງກີດກັ້ນເຂດຊາຍແດນກັບເຊີເບຍອອກ ແລະຍຸດຕິການ
ປະເຊີນໜ້າ ທີ່ມີມາເປັນເວລາໜຶ່ງອາທິດ ທີ່ໄດ້ເຮັດໃຫ້ ສາຍພົວ
ພັນຂອງທັງສອງປະເທດບານກັງ ເຄັ່ງຕຶງຢ່າງຮຸນແຮງ.
ເຫດການດັ່ງກ່າວກໍຍັງໄດ້ເກີດຂຶ້ນ 2 ມື້ຫຼັງຈາກກອງປະຊຸມໃຫຍ່ສຸກເສີນຂອງ ສະຫະພາບ
ຢູໂຣບ ທີ່ໄດ້ປະຊຸມກັນເພື່ອແກ້ໄຂບັນຫາການເຄື່ອນຍ້າຍຂອງມວນມະນຸດທີ່ໃຫຍ່ທີ່ສຸດຢູ່
ໃນທະວີບ ຕັ້ງແຕ່ການສິ້ນສຸດຂອງສົງຄາມໂລກຄັ້ງທີ 2.
ພາຍໃນບໍ່ເທົ່າໃດຊົ່ວໂມງຫຼັງຈາກເຂດຊາຍແດນເປີດ ອົບພະຍົບຊຶ່ງກະປະມານ 10,000
ຄົນ ໄດ້ຂ້າມເຂົ້າສູ່ໂຄຣເອເຊຍ. ບັນດາເຈົ້າໜ້າທີ່ໃນນະຄອນຫຼວງ Zagreb ກ່າວວ່າ ອົບ
ພະຍົບ ປະມານ 65,000 ຄົນ ໄດ້ເຂົ້າມາໃນປະເທດ ທີ່ມີປະຊາກອນ 4 ລ້ານ 5 ແສນຄົນ
ພາຍໃນໄລຍະ 10 ມື້ທີ່ຜ່ານມານີ້.
ອົງການຂ່າວຂອງ ຝຣັ່ງ ໄດ້ອ້າງຄຳເວົ້າຂອງເຈົ້າໜ້າທີ່ໂຄຣເອເຊຍທີ່ກ່າວວ່າ ລັດຖະບານ
ອາດຈະໃຫ້ບ່ອນພັກພາອາໄສ ແກ່ພວກທີ່ມາຮອດໃໝ່ ເປັນການຊົ່ວຄາວ ທີ່ຖານທັບ Yu-
goslavia ເກົ່າໃນພາກໃຕ້ຂອງປະເທດ.
ໃນອີກດ້ານນຶ່ງນັ້ນ ໃນວັນເສົາວານນີ້, ການຢັ່ງຫາງສຽງໃນເຢຍຣະມັນ ໄດ້ສະແດງໃຫ້ເຫັນ
ວ່າ ຄວາມນິຍົມຂອງນາຍົກລັດຖະມົນຕີ Angela Merkel ແມ່ນໄດ້ຫຼຸດລົງ ໃນໄລຍະສອງ ສາມອາທິດທີ່ຜ່ານມາ, ເນື່ອງ ຈາກທ່ານນາງ ໄດ້ພະຍາຍາມທີ່ຈະໃຫ້ການຕ້ອນຮັບແກ່ອົບ
ພະຍົບຕື່ມອີກຫຼາຍແສນຄົນ.
