ອົງການຊອກຄົ້ນແລະກູ້ໄພແຫ່ງຊາດອິນໂດເນເຊຍ ກ່າວວ່າ
ໃນວັນພະຫັດມື້ນີ້ ພວກດຳນ້ຳຈະພະຍາຍາມໃຫ້ໄປຮອດສ່ວນ
ໃຫຍ່ສຸດຂອງຊາກລຳເຮືອບິນ ຂອງຖ້ຽວບິນ AirAsia ບ່ອນທີ່
ເຊື່ອກັນວ່າພວກຊາກສົບສ່ວນໃຫຍ່ຈະຍັງຢູ່ທີ່ນັ້ນ.
ທ່ານ Bambang Soelistyo ຫົວໜ້າອົງການດັ່ງກ່າວ ເວົ້າວ່າ
ລຳໂຕເຮືອບິນ ໄດ້ຖືກພົບເຫັນຢູ່ໃນທະເລຈາວາ 3 ຫຼັກກິໂລແມັດ
ຫ່າງຈາກສ່ວນຫາງຂອງເຮືອບິນ ແລະ 800 ແມັດຫ່າງຈາກເຄື່ອງ
ບັນທຶກສຽງແລະຂໍ້ມູນການບິນ ຫຼື “black box” ທີ່ໄດ້ພົບເຫັນ
ກ່ອນໜ້ານັ້ນ.
ເຮືອບິນໄອພົ່ນ Airbus ໄດ້ເກີດອຸບັດເຫດຕົກ ໃນວັນທີ 28 ທັນວາຜ່ານມານີ້ ພ້ອມດ້ວຍຄົນໂດຍສານແລະຈຸບິນ 162 ຄົນ ໃນເຮືອບິນ. ມາຮອດປັດຈຸບັນນີ້ ໄດ້ພົບເຫັນຊາກສົບຂອງພວກເຄາະຮ້າຍແລ້ວ 50 ສົບ.
ພວກຮູບພາບທ້ອງທະເລຈາກເຄື່ອງດຳນ້ຳ ທີ່ບັງຄັບຢູ່ໄລຍະໄກ ສະແດງໃຫ້ເຫັນລຳໂຕເຮືອບິນທີ່ແຕກຫັກແລະພາກສ່ວນປີກຂອງເຮືອບິນ.
ຖ້ຽວບິນ QZ8501 ຂອງສາຍການບິນ AirAsia ໄດ້ຫາຍສາບສູນ ຈາກຈໍ radar ໄປຫຼັງ
ຈາກບິນໄປບໍ່ຮອດເຄິ່ງທາງໃນເສັ້ນທາງບິນໄປສູ່ສິງກະໂປຈາກເມືອງສຸຣາບາຢາ ຂອງອິນໂດເນເຊຍ.
ສາເຫດຂອງອຸບັດເຫດເຮືອບິນຕົກນີ້ ກຳລັງຢູ່ໃນລະຫວ່າງການສືບສວນສອບສວນ.
